يوسف
فتحت عيني ...واني اتلفت واشوف هيام واكفه مااعرف شجانت تسوي لماحست بي اقتربت وابتسامتها اللي نور وجهها دليل فرحتها على افاقتي احساسي جان احساس واحد راجع من الموت مااعرف المده اللي قضيتها بغير عالم
اطرافي وجسمي كلها متخدرة وبلاوعي وبلا ارادة مني نزلت دموعي ... اقتربت مني وكعدت بصفي وبكل حنان باست جبيني ...اتذكرت ابويه جان ويايه بالحادث .....سالتها عنه غيرت الموضوع ..عرفت اكو شي بالموضوع
وراايام رجعت للبيت واني ماعندي اي سيطرة على جسمي وعرفت ابويه مات وانحجز على شركتي ...وكلشي راح بغمضة عين ...بس باقية هيام لاتمل ولاتكل تداريني ليل نهار وتشتغل بدون اي تعب اوملل ...مرات استغرب ...قبل جنت احسها انسانه ضعيفة ماتتحمل شي بس هسة اشوفها وحدة قوية عدها قوة ارادة وتحمل ....حسيت بنفسي ضعيف كدامها وعلمود هل الاحساس بالضعف جنت مااريد اشوفها كدامي ولا اريدها تهتم بيه واللي زاد احساسي بالذنب لما عرفت هي عافت دراستها هالسنه علمودي بينما سرى داتداوم عادي واخوية هم رجع للدوام .....اني اذيتها هواية والله انتقم من عندي لان اني اذيت هواية بشر وهوايه ناس ...مااريد بعد ااذيها ..اريدها تشوف حياتها .
هيام
ماادري ليش هيجي دايعاملني ولا كانه اني زوجته صارلنا ستة اشهر بس اني ماراح استسلم
لانه اني رغم مساوئه احبه ...ورغم انه كان يستمتع باذيتي ..ماكدرت اكرهه ...
اليوم جمعة ومثل ماتوقعت فيصل جان مسافر ويا عائلته ...خابرنا واعتذر عن الحضور ...وانطانا رقم صديقه حتى يجي ورادت عمتي تخابر ماخليتها تخابر كلتلها اني اتعلمت من فيصل طريقة التدليك والحركات الرياضية ...
اخذت زيت الزيتون الخاص بالتدليك واخذت الموادزكلها ادوات التعقيم والخاولي الخاص بيه
ورحت عليه بغرفة عمتي ...جان كاعد
هيام _ تريد اساعدك بنزع التراكسوت لو انت تنزعه
يوسف _ ولويش انزع ..فيصل اجا
هيام _ فيصل ماكو اليوم اخذ اجازه اني راح اسويلك التمارين .
استغرب وعقد حواجبه
يوسف _ ومنو كالج اني راح اقبل تسويلي التمارين وبعدين انتي منين تعرفين تسوين
هيام _ اعرف اسوي واليوم ماعندك جارة اتحملني فد ساعة فدوة لكلبك .
سكت وماحجا ...واستسلم وحاول ينزع البنطلون وساعدته وبقى بس بالشورت ....
بديت بالتدليك .....وبعدين بالحركات الرياضيه ....ومن جانت تجي عيني بعينه جنت اشوف بعيونه الرغبة والشوك...خلصت كلشي خلال نص ساعة ...ورا ماخلصت لزم ايدي وجرني وكعدني يمه على السرير....باسني من خدي واخذني بحظنه ....وكال
يوسف ،_ اووف شكد مشتاك لحظنج .....
بقيت لحظات بحظنه بس هو بعدني عن حظنه وبقيت كاعدة كباله
يوسف _ هيومي ...اني مااريدج بعد تتاذين وتتعذبين ....اريدج ترجعين لبيت اهلج وتعيشين حياتج ....واذا تحبين نتطلك هم ماعندي مانع ....اهم شي انتي ترتاحين كافي اذية وتعب ...اني بعد ماافيدج
استغربت حجيه وكلامه ...اني ادري هو يحجي هالحجي من ورا كلبه مايريدني اشوفه ضعيف كدامي
هيام _ شنو هالحجي الي تحجيه ؟
يوسف _ كل هذا الحجي صدكيني لمصلحتج .
هيام _ مو انت اللي تقرر مصلحتي وين ...هاي حياتنا اثنيناتنا ومايصير انت تصدر قرار يخصنا اثنيناتنا .....كمت على حيلي
هيام _ اني كملت العلاج الطبيعي اذا محتاج شي اسويها الك .
يوسف _ سلامتج بس ممكن تصيحيلي مصطفى رايده بشغله
هيام _ اوكي هسة اصيحه ...خو مو جوعان اجيب لك اكل .
يوسف _ لا بعدني مو جوعان .
طلعت من غرفته ودخلت المطبخ شفت عمتي داتحضر الغده .
هيام _ خليني عمه اساعدج بالغدا
ام يوسف _ يمه بنتي كافي عليج شايلة البيت كله على دماغج ...اشو كل الشغل انتي تسويه ...وفوكاها اهتمامج بيوسف ...الله يبارك بيج بنتي ماتقصرين كعدي شويه ارتاحي ...راح اسويلنا كهوة اريد احجي وياج كلمتين .
هيام _ اتفضلي عمة
ام يوسف _ هيومه سمعيني زين ..اني اشوفج هوايه تتعبين وهاملة روحج ...منا واغاد حاولي تهتمين بروحج ماشالله انت حلوة وماتحتاجين شي بس اني اشوفج ٢٤ ساعة لابستلي تراكسود وشاده شعرج وبدون ماتخلين مكياج اني اعرفج حزينه ...كلنا حزينين على المرحوم وعلى حال يوسف بس مايصير دادة هيجي ....اني اشوف لوتهتمين بنفسج شويه الشغل مايخلص ترة ...والدكتور اكدلنا حالته النفسية ليوسف ترة تاثر على سرعة استجابته للعلاج ...وانتي حاولي يومية من تخلصين الصبح اشغالج تصعدين غرفتج تلبسيلج فستان حلو وتخلين مكياج وترتبين شعرج ...حتى يشوفج حلوة ومو حزينه عليه حتى هو هم نفسيا يرتاح
هيام _ ماشي عمة راح اسوي اللي تكولين عليه
ام يوسف _ دكومي هسة انتي مكمله شغلج كومي روحي بدلي .....مصطفى راح ياخذ يوسف للحديقة بدلي وطلعيله برة .
صعدت فوك لغرفتي سبحت وبدلت ملابسي لبست فستان احمر قصير للركبه ورتبت شعري وخليت شويه ميكب ...وطلعت كبل للحديقة شفته كاعد وحده على الكرسي المتحرك ....اقتربت منه ردت اجيب كرسي واكعد وياه بس ترددت ..شافني مبدلة سالني
يوسف _ وين رايحة ...مبدلة وكاشخة
هيام _ مارايحة لاي مكان بس ضجت من ملابس البيت ...وتعرف اني ماعندي طلعات وطبات ردت اغير .
يوسف _ روحي بدلي ملابسج وغسلي وجهج ..انتي ناسيه مصطفى بالبيت وهو شاب مايصير تتحركين بالبيت بهاي الملابس لو عاجبج
يباوعلج هيج ...امشي روحي بدلي واياني اشوفج بعد لابسة قصير وتفترين بالبيت .
بالكوة جنت لازمه روحي حتى ماابجي ....بس الدموع خانتني وبسرعة اتداركت روحي وكلتله
هيام _ ماشي ..يوسف مثلماتشوف . كبل طلعت لغرفتي نزعت الفستان لبست التراك مالتي ولميت شعري مثلماجان ومسحت وجههي ونزلت للمطبخ .....تلكتني عمتي استغربت
ام يوسف _ هاي ليش بدلتي جان الفستان يخبل عليج اني من الشباك شفتج جنتي طالعة كمر
الدموع خانتني مرة لاخ .
هيام _ عمه هو مايقبل ...طلب مني ابدل ..الله يخليج عمه بعد سدي الموضوع .خلينا نصب الغدا احسن .
أنت تقرأ
هيامي وعشقي
Genç Kız Edebiyatıقصة بلهجة عراقية رومانسية جريئة تتحدث عن مشكلة توجد في مجتمعاتنا ولكن يتم جعلها بطي الكتمان .
