هيامي وعشقي

البارت الثامن

هيام

مر يومين على اخر لقاء بيننا ماجان يحاول يتصل بيه بس جان مجرد يدز رسائل ...يسال عن الاحوال ...بس استغربت ..من اتصل بيه جنت كاعدة بغرفتي وجنت مكملة شغلي واتصفح النت وجانت الساعة ١١ وهند جانت نايمه على جربايتها شلت الموبايل وفتحت الخط .
هيام _ الو
يوسف _ مرحبا هيام
هيام _ اشعجب مخابرني ...انت متعود اتدز رسايل
يوسف _ اشتاقيت اسمع صوتج الحلو
هيام _ ممممم
يوسف _ مشتاق لشوفتج همين
هيام _ كافي يوسف
يوسف _ فدوة للخجلان ...ممكن اسالج سؤال
هيام _ اتفضل
يوسف _ اشلابسة هسة
هيام _ شنو هالسؤال الماسخ
يوسف _ سالتج سؤال محدد جاوبيني
هيام _ لابسة بيجاما
يوسف _ شنو لونها
هيام _ كافي يوسف انت صاير كلش ادبسز
سمعت ضحكته القوية من الموبايل
يوسف _ ههههههه اوكي ماشي افتهمنا خجلانه ...اني خابرت حتى اكولج خبري اهلج الخميس الجاي جايين نخطبج .ورا الساعة سبعة
هيام _ شنو داعي لهالاستعجال
يوسف _ اني بعد مااتحمل تاخير يلة مع السلامة
هيام _ مع السلامة
قفلت الخط ...واحس بداخلي مشاعر متضاربة
فرح على خوف على ضيق ...مااعرف شبية ..النوم طار من عيني لوجه الصبح ..

كعدت الصبح مااعرف احس بضيق بصدري وصداع لازمتني نزلت شفت والدتي داتحضر الريوك صبحت عليها ...
هيام _ صباح الخير ماما
ام هيام _ صباح النور بنتي تعالي تريكي ويايه
هيام _ اشو ماحد كاعد
ام هيام _ اخوج احمد راح للشغل وتمارا بعدها ماكاعدة .
كعدت وياها وجنت مترددة احجي وياها بالموضوع ...واخيرا تشجعت
هيام _ماما اكو فد موضوع اريد احجي بيه وياج .
هيام _ ماما اكو واحد اخو صديقتي يريد يتقدملي يخطبني .
ام هيام _ انتي شداحجين منو هذا وشلون اتعرفتي عليه ترة انتي بعدج صغيرة وماراح اتصور اخوانج راح يوافقون على زواجج .
هيام _ ماما انتي احجي وياهم وشوفي رايهم والاهم من كله راي بابا.

********** بالليل خابرت ماما على محمد وطلبت منه يجي ويجتمع الكل حتى تحجيلهم على الموضوع ابتدت حجتلهم ماما بالا فضل الصمت واحمد عارض
احمد _ اني ماموافق هيام بعدها صغيرة وهذولةىالناس مو من ثوبنا وماراح تكدر تعيش وياهم
محمد _ احمد انت لاتستعجل خلي نشوفهم ونسال عليهم وبعدين نقرر ..بعدين هاي قسمه زينه جايتها واحنا مانريد نوكف بطريقها .....بابا انت احجي سمعنا رايك
ابو هيام _ اني من راي محمد منستعجل نشوف الناس ونسال عليهم بعدين نقرر .والاهم من كله هذا راي هيام
******
الخميس اختاريت ثوب الماروني الوحيد عندي اللي هو حلو وراقي ويرهم للمناسبات البسيطة لبسته بوكتها بحفلة عمار ردانه كيبور
خليت شوية مكياج ورتبت شعري ونزلت ساعدت ماما بتحضير الضيافة واخيرا وصلو ا
جنت بالمطبخ وسمعت بابا يرحب بيهم وياخذهم على الاستقبال .
ورا شويه دخلت سرى وحظنتها قوي ورحبت بيها سحبتني من ايدي على الاستقبال بقيت واكفة بعيد ورحبت بيهم ...شفت يوسف ياربي اشكد طالع حلو وكشخة باوعلي بنظرة اعجاب وشفت والده وعمه وامه شفتها رحبت بيها جاوبت من ورا خشمها وكانها جاية مجبورة
اني طلعت وتركتهم استحي اكعد وياهم

*******ورا ماحجوا وبابا طلب من عدهم مهلة حتى يفكرون ويسالون وياخذون رايي
طلعوا واني دخلت غرفتي وسبحت وبدلت وقفلت تلفوني ونمت لان مااريد احجي ويا يوسف لان متاكدة را ح يخابر .

***************
واخيرا تم الموافقة واتحدد موعد الخطوبة والعقد وصار كلشي بسرعة وبيوم الجمعة خابرني يوسف بانه امه وسرى راح يجون عليه ياخذوني يشترون ملابس وذهب ولوازم النيشان
وفعلا جتي امه وسرى والسايق ورحنا للسوك ....ام يوسف جانت كالبة خلقتها .....وكلشي اختاره تعيب عليه وتكول عليه ذوقج مو راقي ...اغلب الغراض هي اختارته حتى الفستان اللي اختاريته اعترضت عليه انهظمت وبلعت حتى مااسوي مشاكل مااريد من اول يوم تكول عني وكحة واراددها
كملنا كل شي ويوم السبت الخطوبة والعقد ماحبيت اروح للصالون ...كلتلها لسرى مرا اروح
ااشو صارت الساعة وحدة الظهر حماتي خابرتني وصارت عصبية وتصيح عليه اتكول الخطوبه بالقاعة اشلون ماتروحين للصالون هسة ادزلج اثنين بنات من اكبر مركز تجميل ....راح يهتمون بيج .....الظاهر ..هاي البلوة ناهدة ( ام يوسف ) ماناوية تعديها على خير وماراح تخليني ارتاح سكتت وبلعت وماحجيت لماما حتى ماتنقهر
كملنا كلشي وتوجهنا للقاعة جنت كلش طالعة حلوة الماكياج اصريت ان يكون فاتح ....وشعري سويته تسريحة بسيطة .
تمت المراسيم وكانت كلش حلوة وتبادلنا الخواتم ولبسني الذهب وهمسلي باذني
يوسف _ بس كوليلي شنو هالجمال لخاطر الله
خجلت ودنكت ولما رفعت عيني غمزلي غمزة خلتني مخدرة ..ومااحس
بروحي ومن جان يلبسني الذهب جان يتعمد ..يطخ ايده بجسمي واني من الخجل جسمي جان يرجف واخيرا باسني من كصتي ..وبعدين تم العقد ..وانتهى كلشي والحفلة خلصت بس فعلا ماجنت احلم تكون خطوبتي هيجي وبدا المعازيم يروحون ....همسلي باذني
يوسف _ شنو رايج نروح لبيتنا .....وتشوفين بيتنا او نروح لبيتي اني ...
هيام _ ابد ماممكن مستحيل ...
يوسف _ ليش انتي ماعندج ثقة بيه بعدين احنا عقدنا .
هيام _ مو مسالة ثقة اليوم مااتصور اهلي يوافقون ...وبعدين احنا اليوم تعبانين خليها لغير يوم ...تعال عدنا نكعد بالبيت شوية
ماادري حسيت بيه ضاج
يوسف _ ماكو داعي ....بس حسبي حسابج باجر نروح نعقد محكمة وتتغدين ببيتنا .
هيام _ ماشي موافقة بس لاتزعل

قبل الظهر اجا يوسف عليه ورحنا اني من كل عقلي راح نروح للمحكمة اشو كاللي القاضي داينتظرنا ببيتهم حتى يعقدلنا ....وصلنا للبيت ....ماجان بيت قصر ....دخلنا  وشفت حدايق جبيرة ...وعلى الاطراف شفت مسبح كبير بحياتي اني ماشايفة هيج بيت حلو .دخلنا للاستقبال القاضي جان موجود وياه موظف ...عقدلنا وطلع ..بقينا بالاستقبال دخلت علينا خدامة فلبينية شايلة العصير خلتها وطلعت واول ماطلعت كام يوسف وقفل الباب اني خفت وكلبي بدا يدك سريع.