رامي: ما عرفت شلون اوصل صار الطريق علية سنة مو نص ساعة وصلت للبيت لكيت الناس ملتمة هوسة عياط صياح كلها تباوع علية دخلت تلكتني رانيا
رانيا: امي ماتت ولك رامي امي ماتت راحت
رامي: كعدت بالهول ع اركبي جسمي نحل ظهري انكسر انذليت كلشي حوالية اظلم احس الدنيا تركتني دموعي جفت بعيني ما احس بس ضوضاء صوت عالي صوت صياح صوت كلش زعجني يجي صوت امي من بين الاصوات ويختفي الناس تنظرلي نظرة شفقة
رانيا مكابلتني وتبجي وتلطم والجهال يتصارخون واني بس عيوني تلف حواليهم احس جسمي كلة مات وبس عيني ع قيد الحياة
ظلت عيوني اتدور عليها بكل زوايا البيت باوعت ع مكانها فراشها مكان كعدتها علاكة الادوية مالتها شحاطتها جزدانها كل غراضها موجودة بس هي ماكو مشفتها
بية مابية حاولت اوكف ع حيل وما ابين للناس كسرتي
رانيا: فقدت الوعي ما ادري بنفسي ممصدكة امي ماتت مو بوعيي ادك الطم ابجي اصرخ الناس تباوع علية واني ما ادري بروحي من كثر الصريخ الجيران والعالم ملتمة علية بس اني ما اشوفهم ولا اريد اشوفهم اريد اشوف امي كاعدة اريد اسمع صوتها اريدها تكعد تكول ترة اني بس متخربطة مامتت
جهالي يبجون يفترون بين رجلية واني مثل المخبلة فاقدة الشعور
من دخل رامي علينا وشاف حالتنا وكع من طولة كابلتة وادك والطم وانعى واخوية ما ابدة اي ردة فعل لهناك وكف ع حيلة
رامي: وينها
رانيا: بفراشها خوية بفراشها
رامي: استغربت هستوني باوعت لفراشها ماشفت شي الظاهر حتى عيني خدعتني
ركضت ع فراشها مغطيتها رانيا بعبايتها شلت العباية وحظنت راسها ودموعي جرن للمرة الثانية اباوع ع دموعي متوكع ع خدي توكع ع خدها
ما اصدك ميتة جنها نايمة وجها يشع نور نايمة بهدوء مو ميتة امي ألي ماشبعت منها هاهية عافتني للأبد رجعتها لمكانها ع كيف ما اريدها تتأذة من حركة ايدي غطيتها بعبايتها
رانيا مكابلتها وتبجي ومن الصريخ حتى صوتها اختفى
لزمت اختي حظنتها بجينا اني وياها لحد ماملينا...
خلص كافي لتبجين شكيتي كلبي ما اتحمل بعد والله مو صخر
رانيا: ولك خوية عافتنا الحنينة ولك راحت شمعة البيت
شلون اعيش بلياها
رامي: بية مابية طلعت موبايلي اتصلت بكم واحد من كرايبنا بلغتهم وطلبت منهم يبلغون البقية
حتى نطلع نشيع وندفن
ساعة وحدة والكل التمت حتى شيوخ العشاير والمعارف
صفاء وعبير وروان واهلها ما اعرف منو كايللهم
المهم النسوان تتصارخ والجهال تبجي واحنة الزلم طلعنا برة
اخذناها للمستشفى خلصنا اجراءات الوفاة
شيعناها وطلعنا للدفنة بس احنة الزلم
لل 3 الفجر يالة رجعنا
حالتي متتسولف احس ضاعت حياتي مني
الدنيا بعد مابيها طعم كلشي طلع من عيني
ما اعرف شلون خلصنا الفاتحة صفاء والكادر والممثلين كلهم حضروا للفاتحة..
خلص انتهت حياة شخص جان يعنيلنا كل الحياة
اليوم ودعنا اغلى شي بالدنيا
راحت العالم كلها ع بيوتها من بعد تعب 3 ايام
فرغ البيت بقينا بس اني ورانيا والجهال
الحيطان حزينة البيت رغم الاضوية بس بعيونا اظلم...
نسيت بيتي ونسيت آشتي واميرة
نسيت سيارتي والشركة وروان ألي حتى مهتميتلها ولا عبرتها بالفاتحة نسيت اني شنو ومنو نسيت شغلي ومسلسلي وفلوسي واملاكي كلها نسيتها
هسة حسيت بالضعف والانكسار هسة صدك انكسر ضهري
أنت تقرأ
سرقت مالي وقلبي
Romanceهو شخص غامض متسلط وقوي وهي فتاة سارقة مشاغبة تجمعهم الصدفة لتلعب دورها فهل ياترى من سينتصر ؟؟
