سرقت مالي وقلبي

البارت 26

فتحت القاصة
طلعت منها ما اعرف شكد بس 5 بلوكات ام ال 50 الف
حطيتهن بالجنطة ورجعت كلشي لمكانة وطلعت بس الخوف اتملكني خايفة لا احد يشوفني
نزلت ع كيفي الحمد لله ماكو احد
فتحت الباب وطلعت
صعدت سيارتي ردت بس ابتعد من المكان
ابتعدت شوية وكفت السيارة خليت ايدي ع الستيرن وحطيت راسي ع ايدي بس انتبهت سواري ماكو بأيدي
توترت وخفت اكثر اتذكرت اني من فتحت القاصة السوار چلب بحلقة المدالية مال مفتاح القاصة وعتيت ايدي حيل منة من الاستعجال والخوف
احتمال انكطع بدون ما انتبه واحتمال وكع بالشارع لو بالسيارة
نزلت بسرعة من السيارة دورتها ماكو ملكيتة..
عزة العزاني مصيبة مصيبة اذا يطلع سواري واكع بغرفتة لو بالبيت
حرت شسوي ارجع ما اكدر ارجع
زين اغلس ع الموضوع بس خاف انكشف
صعدت بالسيارة اخذت نفس ايدي بعدها ترجف ما اعرف شلون راح اوصل
ظليت الطريق كلة امشي شوية بالسيارة واوكف
الا ان وصلت للبيت صعدت كبل لغرفتي ضميت الفلوس بالكنتور وظليت حايرة شسوي لازم الكة حل قبل ما انكشف..

اميرة: كعدت ساعة ب ١١ آشتي بعدها نايمة كلت خلي اشتغل وبعدين اسوي أكل
بديت بالقاط الفوك انظفة
وصلت لغرفة الاستاذ رامي
بديت انظفها

رامي: بعد ما وصلت لبيت رانيا واطمئنيت عليها وع الجهال ونطيتها المقسوم رجعت للبيت بسرعة احس نفسي محتاج راحة
وصلت للبيت صعدت كبل لغرفتي فتحت الباب لكيت اميرة بالغرفة
السلام عليكم..

اميرة: واني شاردة بأفكاري وبأيدي وصلة الاخشاب ودا ارتب بمكتبة حسيت الباب انفتح فزيت
يمة فززتني
عليكم السلام

رامي: شبيج فزيتي شدتسوين

اميرة: ارتبكت منة بدة يتقرب خفت ليتعدة علية..
لا لا مدا اسوي شي بس دا انظف الغرفة
يلة اني طالعة انت اخذ راحتك عود بعدين انظفها

رامي: وين رايحة نظفيها اني راح انزل جوة

اميرة: لا لا بعدين عود اخذ راحتك
طلعت وسديت الباب وراية ونزلت اركض لغرفتي

رامي: هاي شبيها انخطف لونها..
نزعت ملابسي لبست تراكسود وتمددت ع فراشي

اميرة: كلبي يدك سريع
بلة اني شجاني اول مرة اشوفة لو اول مرة انظف غرفتة
هسة شيكول علية
هففففف رجعت نظفت البيت من جوة صار الظهر وآشتي ماكو
دكيت عليها الباب ماكو متفتح
دخلتلها اكعد بيها لا حس ولا نفس
ركضت ع استاذ رامي
دكيت الباب

رامي: ادخل

اميرة: فتحت الباب وطبيت.
استاذ هاي آشتي ما ادري شبيها اكعد بيها ومتكعد

رامي: فزيت من مكاني
شنووو شبيها

اميرة: ما ادري تعال وياية ناخذها للمستشفى

رامي: يلة امشي البسي.
نزلت اركض عليها شلتها طلعتها للسيارة اميرة هاج السويج افتحي الباب