#ام_البنات
بقلمي ام مصطفى
البارت الثامن
تفاجئت من شفتهم ابيتي
وماخذين راحتهم وهاي البومه بغرفتي نايمة وابنها خالته بسرير اطياف
بناتي ركضن حضنن ابوهن بابا بابا
هو بوسهن وحضن انفال واحسه بجه ومسح دموعه بويه ضل بالي يمجن
نفوله بويه شلونج طگ كلبي عليج
-بابا اشتاقيتلك هواي وين رحت وعفتنه
-بابا مرحت رجعت عليكم اخذكم ومالحكت لكيتكم رايحين
وبعد مكدرت اطلع كعدت بالبيت
بقيت ساكته اني بس اباوعلهم حتى سلام مسلمت
اجه هو يمي
-حليمة شلونج
-من الله بخير
-ادري بيج زعلانه علي بس والله من صار القصف بالليل كلش ضل بالي عليج وع البنات
واجيت عليكم الصبح مالكيتكم
جنتو طالعين ستوكم سئلت الجوارين كالوا طلعو وره صلاة الفجر
بقيت عايده يم اهلها
واجيت للبيت
كلت ابقى هنا انتظركم
بعدين جبت عايدة واجيت
-والله زين من ضميرك انبك علينا زين من ذكرتنه
اكو رجال يعوف مرته وبناته بهيج اوضاع احجي كلي اكو رجال هيج يسوي
راد يحجي كتله
كلشي لا تحجي بعد اخذ هاي مرتك واطلع من بيتي يله
حجت هي
-حبيبتي هذا بيتي وبيت زوجي مو بس بيتج وطلعه ماالنه شنو ماخذتلج بيت شكبره واني متبهذله بالايجارات
تره حالي من حالج اني هم زوجته وام ابنه هم
يعني البيت الي والبني
-خلصتي كلامج يله اطلعي بره بله ما اتعبيني يله
بيتها هيه والله يا الله
سالم: كافي يمعودات اني احلها منا لباجر اجيب عامل يتظف القاط الثاني
واصعد عايده فوك
وانت تبقين ابيتج جوه
-شنو لا فوك ولا جوه مل كعده ماالها ابيتي
سالم تره احنه اتفقنا وشرطت عليك وابو مهند شاهد ع هذا الكلام
عفته ودخلت لغرفتي
لكيتها هوسه وريحة تكتل
وملابسها الوسخة تارسة الغرفه مالتي
ذبيت عباتي
صحت اكلج تعاي لمي خيستج من غرفتي يله واخذي ابنج واطلعي بره بيتي
هي سمعت هيج حجيت ركضت علي
جرتت حجابي وجلبت بشعري وتصيح
-منو تطلع بره اني
حاولت افك روحي منها
سالم جرها بس هي نابته بشعري
جرها حيل جرت شعري بيدها
كعدت بالكاع ابجي
هو شافني ابجي
كام وضربها
كلها هاي مره مديتي ايدج ع ام ايلاف انوب اكسر ايدج سمعتي لولا
بكل صلافة عاطت بيه اسكت يله
تره والقران اخذ ابني واخلي حصرة بكلبك شوفته
وخليها عود تفيدك ام البنات هاي
عطت بيها
-بناتي يسون راسج اطلعي بره يله اطلعي
سالم: كومي لمي غراضج اوديج لهلج واني اتصرف
عايده: والله طلعة مالي من البيت سمعت لولا
مثل ما هو بيتها هم بيت رجلي وبيتي
واني ام الولد وهي ام البنات
لازم اني الي ابقى وهي تنطرد
-كافي لغوه زايده وكومي امشي اوديج يله
-كتلك مااطلع وع جنازتي اطلع تريد اعوف الها البيت واني متبهذله بالايجارات
ضلوا يتصايحون وع كعدتي وبناتي بصفي يتباجن وياي
ردت اكولهم البيت مالتي وباسمي بس مدري ليش خفت
اخاف تصير مشاكل
اكبر من هاي ضليت ساكته
بس كمت وكومت بناتي
-سالم طابه لغرفتي ساعه ماالكة هاي الزباله ابيتي طلعها من البيت
-اني زباله ماكو زباله غيرج لو بيج خير ماازوج عليج ام البنات
ههههه والله يا الله عبالك عيبه خلفت بنات كل شويه صايحه ام البنات
كتلها اي ام البنات اني
وبناتي تاج راسي وافتخر بيهن
ماذابتهن عليج حبيبتي
سالم سوي شي زين بحياتك الي والبناتي وطلعها منا
وخلينه كاعدين
صاح كافي انتن ولا تحترمن عبالك مموجود اني
كافييي
لزم النفاضه جانت ع الطبله وشمرها ع التلفزيون وكسره
وضل يشيل بالغراض ويضرب بالكاع
كافي كافي
انعل والديجن اليوم يابو ساعة الشفتجن بيها
محد الها كلمه اني الي اقرر سمعتن لولا
انتي حليمه جوه وذيج اطلعلها درج من بره
وخلصت السالفه
غير كلام ولغوه زايده مااريد سمغتن
-بس اني مااريدها ابيتي لا فوك ولا جوه
-بسسسس
عفته وفتت جوه للغرفه كمت ابجي
