#ام_البنات
بقلمي ام مصطفى
البارت السابع
لبست عباتي وكدت بناتي ورحت لبيت عقيل اول مره اخاف اول مره احتاج سالم حسيت بالمسؤوليه كلش، جبيره علي
اربع بنات وين راح اروح بيهن وابوهن عايفهن علي وملتهي بولي العهد ابنه
ممصدك اجاه ولد متعجب بيه
مااعرف شلون اطاه كلبه يعوفني اني وبناتي وحدنه بهيج وقت ووضع ع الاقل جان جابها واجه يمنه
اذا ميكدر يعوفها
اووف ع حضي
وحض بناتي الي ابوهن متبري منهن عبالك مسوين جريمه
عايفنه وراكض وره الولد
اريد اشوف الولد راح يخليله تاج ذهب
لو شيسويله مثلا
مااعرف شنو من عقل عنده
طلعت من بيتنا ورحنا لبيت حماي
جانت طافيه الكهرباء،
وهيفاء مشغله فانوس ولازمته بيدها
شافتني
-ها حليمة ضل بالي يمج انتي وبناتج كلت اكيد اخترعن هسه
كمت ابجي اني اي والله اخترعنه
واحنه وحدنا حسبي اللة ونعم الوكيل
شنو ذنب بناتي غير كون هسه ابوهن فوك راسهن وخاتلات بسده
ليش هيج ياربي
-كولي يالله حبيبه وفوتي جوه مو وكت هالحجي خيه
البنات فاتن
وفرشت فراش الهن وتغطينه ابطاطين بس نرجف مدري خوف مدري برد
عقيل كال
باجر اطلع بيكم لبيت عمتي كاظميه للكوت اخذكم واروح هناك ماكو قصف هواي مثل بغداد
خصوصا متطقتنا الفرقة الحزبيه قريبه علينا
ويرمون ع الطيارات وع ساعة تضربنا بصاروخ
باجر اول ما يطر الصبح
لمن اغراضجن
شكو خبز تمر فلوس ذهب ومستمسكات
لمنهن ونطلع
كتله ابو مهند وسالم
خاف يجي يسئل علينا ويضل باله
-هو وينه لو بي خير ماعايف بناته ومكابل هاي الجنها نمر متعجب بيها
عود عيونها خضر
ادري ميفكر ميكول مرتي بناتي منو الهن شنو من عقل عنده
كمت ابجي
اني ام دميعة ع كولشي ابجي
يمكن لان مهضومة ومقهوره ومظلومه الدمعه دوم بطرف عيني
كتله خويه ابو مهند انوب انت تورطت بيه وبناتي فوك حملك
زدتك حمل
-شنو القصة خويه
قابل محشم اني عليكم هذن بنياتي الله شاهد حالهن من حال منار بنتي
بس اني محترك كلبي من هذا الماعده غيره ع مرته وبناته هذا سويلم شيكول لروحه وعايف خمس نسوان وحدهن
وراكض وره الولد اخخخ يابه تمنيت ابوي عدل
بس هو دواه
-الله يرحمه
-الله كريم خويه ربك ماينسى عبده
عود كلت اخذ البنات ولروح لبيت اهلي اشوف وين يرحون اروح وياهم
-وسفه عليج واني وين رحت
ابوي ع فراش الموت ويوصيني بيج وبناتج
الله يرحمه جان يعرف سالم مو كد مسؤوليتجن
باجر من الصبح روحي للبيت لمي غراضجن وتعاي نروح اخليكم بالسياره اجودرها وحطكم كلكم ليوره ونطلع
-الله يخلك خيمة فوك روس جهالك خويه رحمة الله والديك
ضلينا للصبح كاعدين من الخوف مرعوبين
جان قصف كلش قوي من اول يوم
لوجه الصبح يله شويه سكت القصف بقت اصوات رمي خفيف
عفت بناتي نامن غفن خطيه
كمت توضيت وصليت
وخلصت لبست عباتي كلت لبو مهند خويه اطلع وياي خلي الم غراضنا
طلع وصلني لباب البيت وراح
اجت الكهرباء وي طبتي للبيت
الف الحمد لله ع الاقل اشوف شويه
