Words and Heart at Work

Isa, Dalawa, Tatlo ng isang Guro

Isa...
Isa akong bagong guro
At nais kong magturo
Dahil gusto kong makatulong sa hinaharap mo.

Dalawa...
Dalawang beses akong minalas
Sa demo teaching ko nung naghahanap ako ng trabaho.

Tatlo...
Sa pangatlong eskwelahan na tinawag ako
Tinakasan ako ng kamalasan
Kaya pinalad akong makapasok sa trabaho.

Apat...
Apat na beses akong nagpabalik-balik sa banyo
Dahil sa kaba ko nung unang araw ng pasukan.

Lima...
Limang section ang tuturuan ko ng English
At bigla ay natakot ako
Dahil hindi ko alam kong
Kaya ko bang ibigay ang isang daang porsyento ko.

Anim...
Sa pang-anim na araw ng pasukan
Tsaka pa lang ako nakapasok sa iba't-ibang section
Na tuturuan ko.

Pito...
Pitong estudyante ang ngumiti
Tandang-tanda ko pa
Nung magsimula akong magsalita sa harap
At turuan sila ng kaalamang dapat matutunan nila.

Walo...
Ika-walo ng setyembre, 2018
Nakatanggap ako ng fita na may cheese at hotdog
At kung ano-ano pa
Na gawa ng mga estudyante sa kanilang T.L.E
At kahit masama ang loob ko sa kanila
Kinain ko pa rin iyon
Dahil wala namang kasalanan ang pagkain sa akin.

Siyam...
Siyam na beses akong nagmumura
Madalas sa isang araw
Minumura ko ang sarili ko dahil pagod na ako,
Nasasaktan na ako,
Parang ayoko nang maging guro.
Pero kahit ilang beses pa akong magmura
Kasabay ng pagpatak ng aking mga luha
Lumalaban pa rin ako.
Pumapasok sa trabaho
Dahil ayokong takbuhan ang responsibilidad ko.

Sampu...
Sampung estudyante ang nakausap ko
Nung pilit kong hinahanap ang sarili ko,
Nung pilit kong iniisip kong bakit ako naririto,
Yung sampung estudyante na iyon
Na hindi nahiyang magsabi ng pinagdadaanan sa akin
Ang siyang nakapagpaalala sa akin
Kung bakit ko pinili ang bokasyon ng pagtuturo.

Ang isa hanggang sampu na naranasan ko,
Ito ang mga bagay
Kung bakit hanggang ngayon
Pinapangako ko sa sarili ko
Na mas magiging mabuti pa akong guro.

(Sya nga pala...uumpisahan ko na ang pangalawang taon ko sa Don Bosco.❣️)