انا وانت يساوي

الفصل ٣

-يعني ايه؟ يعني مش هنعرف ننزل السنه دي كمان ؟

عبدالرحمن بتنهيده: لا مش هنعرف يا ايمان

ايمان ببكاء: أنا بقالي اسبوع مش باكلمهم على اساس هننزلهم اخر الاسبوع ونعملهم مفاجأه وفي الاخر بردوا مش نازلين!

عبدالرحمن بعصبيه: عايزاني اعمل ايه يعني ما هو غصب عني بردوا اديكي شايفه مش راضيين يدوني اجازه في الشغل والمدير راسه والف سيف انه لو نزلت هيلغي العقد ويخليني ادفع غرامه 2 مليون ريال وانتي عارفه انه مش معايا المبلغ دا !

ايمان بكاءها يزداد اكثر فاكثر: منه لله ربنا على الظالم والمفتري

عبدالرحمن: هو شكله بيعمل اسلوب تطفيش علشان ادفع الـ2مليون ويجبرني على كدا

ايمان باستغراب: وهو يعمل كدا ليه؟

عبد الرحمن :سمعت انه فيه ازمه في الشركه ومحتاجين سيوله

ايمان: لا حول ولا قوة الا بالله ومش لاقي غيرنا يعني؟

عبدالرحمن:انا عارف .. ربنا يصلح حاله

ايمان: خلاص هاكلم البنات بكره ولوني مش عارفه هاقولهم ازاي انه احنا مش هننزل السنه دي والبنات وحشني اوي يا عبدالرحمن

عبدالرحمن باختناق: ووحشيني انا كمان ... بس ما باليد حيله

---------------

أكرم بحسره على صديقه: يااااااه للدرجه دي يا مصطفى وماكنتش حاسس بالموضوع دا خالص؟
أحمد: وهيحس ازاي ؟ طول ما هو كل همه البنات وبس

مصطفى بندم وغضب من نفسه : ايوه معاك حق يا أحمد كنت معتمد على المدير الزفت دا وكنت باشتغل واتابع بس بعدين بقيت اكبر دماغي ومره في مرة بعدت خالص واخد وش واتزفت خد فرصته وسرقني وهرب !

أكرم: معلش يا مصطفى الواحد بيعيش علشان يتعلم ويموت وهو بيتعلم وفي الاخر لعله خير قول الحمدلله

مصطفى بابتسامه خفيفه: الحمدلله

أحمد: هتعمل ايه دلوقتي طيب؟

مصطفى باستسلام: ابدا .. كنت جاي هنا ارفع عليه قضيه وادور عليه يمكن اخد حقي بس لسه مالاقتهوش

أحمد: اصلا ما اعتقدش هتلاقيه هو مش غبي لدرجه انه يفضل بعد ما سرق كل المبلغ دا اكيد خد ديله في سنانه وكت على بره وقال يا فاكيك

مصطفى بتفكير: انا عندي احساس انه هيطلع غبي ومش هيسافر دلوقتي وهلاقيه واعرف اخد حقي منه كويس اوووي وبعدين انا عندي ناس في المطار وبيقولوا انه لسه ما سافرش وهما لو عرفوا عنه ايه حاجه هيقولولي فورا

أكرم: مصطفى أبوس ايدك بلاش تهور
مصطفى وهويعود لطبيعته المرحه مادا يده لاكرم

وهو بيبتسم بخبث: طب بوس كدا