#ولد_خالتي (الجزء الرابع من سلسلة اقرباء ولكن )
الفصل الاول
صباح .. يابنتي شنو اللي لابستيه هضا
آسيا .. عادي مام زي مايلبسو البنات
صباح .. لاحول ولاقوة الا بالله خلخال في الرجل وسروال قصير وتقوليلي لبس تي لبس هضا
حياة .. يا ماما البنات اغلبهن هكي يلبسن هذي الموضة
صباح .. يانعنبوك موضة اللي كيف هكي غير كيف باتكم مطواعها بس وبعدين شوفو مريم ماتقولش اختكم بكل وحتى انتي يا حياة على الاقل بحجابك صح مش الحجاب الصحيح لكن لبس مستور وشعرك مغطي
آسيا .. تي مريم بروحها هذي قصة تي تقول هي اكبرنا مش اصغرنا
صباح .. انا لازم من قعدة مع باتكم
آسيا .. هيا يا ماما وقت على محاضرتي (والتفت لحياة ) شنو مازال انتي والله نتصل بي بابا يجي يشيلني للجامعة
حياة .. هي واتية تخرب سيارتك وتجي على راسي
وطلعن الاثنين لجامعتهن
آسيا قيس عمرها عشرين سنة وتقرا في كلية الهندسة قسم ديكور سنة اخيرة مغرورة لانها جميلة واجد طالعة لجدتها ام امها وللاسف واخذة غرور جدتها ومع ذلك ديمة الشباب يجرو وراها لكن في قرايتها شاطرة وذكية وصديقاتها في نفس الكلية رغم انهن مش راضيات على طريقة لبسها وتعاملها مع غيرهن بغرور لكن عمرهن ماكرهنها لانهن يعرفنها كويس بعيد على غرورها هيا طيبة القلب واجد واجد وهنا وتين بنت خالها رواد وجيهان فاروق صاحبة رحيق وصحبتهن قوية رغم ان رحيق كاسبة سنة عليهن وتخرجت قبلهن بسنة الا ان صحبتهم كل سنة تقوى بالذات بتعلق صبر بنت وتين بي روح بنت رحيق
وفي يوم قربت السنة على نهايتها ويستعدو للامتحانات كانت آسيا تتبختر في مشيتها قاصدة تجمع صاحبتها المعتاد وهي لابسة سروال قصير بيج وكويش دمي وبلوزة دمية قصيرة لتحت مؤخرتها بالزبط وخلخال ذهبي في رجلها اليسار وشعرها الناعم زي الحرير والقصير اللي طوله يا دوب يوصل لتحت كتوفها بلونه الكستنائي الفاتح وعيونها العسلية الفاتحة بلمعة تهبل وشفايف صغار لكن مغريات وطبعا هي جسم رشيق ولا عارضة ازياء حتى طولها معقول مش قصيرة ولاطويلة واجد وهيا في طريقها وقفها شاب
الشاب .. معليش ممكن نحكي معاك كلمتين
آسيا عطاته نظرة من تحت لفوق وباستهزاء وغرور واضح .. انت تبي تحكي معاي نا (وهيا تشير بصبعها على روحها )
الشاب .. اه وشنو فيها هنا كلمتين تسمعيهن مني يا عجبك الموضوع يا لا
آسيا على نفس اللهجة .. ماتعبتش انت بالك تسحاب اني مش فاطنة ليك وانت تلاحق فيا في كل مكان نمشي ليه بس مهما كان موضوعك مايهمنيش نسمعه لاني مش حنتنازل نحكي معاك يكفي اني تنازالت وصبيت معاك تو
وبدون اي انتباه لشعور الشاب وانها كيف هانته بالذات صوتها كان عالي شوي وانتبوه ليه بعض من الطلبة والطالبات لكن سيبها وهو يتحلف فيها وهي كملت خطواتها بكل غرور بدون مايرف ليها جفن لشنو دارات ووصلت لمكان وتين وجيهان
أنت تقرأ
(سلسلة أقرباء ولكن) الجزء الرابع و الاخير بعنوان ولد خالتي
Short Storyسلسلة أقرباء ولكن هي سلسلة متصلة ببعض وعشان تفهم الجزء الرابع لازم تقرا كل الاجزاء السابقة.. حياة التنزيل يومي باذن الله
