#ولد_خالتي (الجزء الرابع من سلسلة اقرباء ولكن )
الفصل السادس
الصافي بصدمة .. شنوووو
زين .. اللي سمعته
الصافي حاول يكون هادي لانه متاكد ان وراء خوه حاجة .. خش يازين والله نقولك استنى ناخذ روح وننزل نا وياك
زين بنرفزة ماقدرش يسيطر عليها قدام خوه الكبير .. تي وين ننزل نا وياك ومعاها بتاخذ روح
الصافي .. اصلا نا كنت نازال بنكلمك نتغذى نا وياك في مول ***** وبناخذ روح وصبر عشان يلعبن غادي بالذات تو معاش نبي رحيق تتعب
زين باستغراب .. كنها رورو سيبتها مافيها شئ امس
الصافي بفرحة .. بتبقى عم للمرة الثانية
زين بفرحة ونسى اللي معصبه ومن مايفرحش بي بيبي بيجي جديد .. والله الف الف مبارك يا خوي
الصافي .. خش مابيت غيرت دبشي
زين .. به
وخش زين بارك لرحيق وعلق عليها وعلى بداية خوف الصافي وحكت له رحيق الرعب اللي عاشه الصافي لما كانت حامل بروح بالذات لما فترة رمضان بداية حملها تعبت فيهن وقعد زين يعلق على خوه وضحكو ونسى شوي من اللي جاي فيه وكان معصبه لان زين بطبعه عكس الصافي يتعصب بسرعة ويهدى بنفس السرعة اللي حمق فيها
وطلع الصافي وزين وخذو روح معاهم بعد توصيات الصافي لرحيق انها مادير شئ وحتى غذاء تو يجب معاه ليها وتكو على عبدو خذو صبر معاهم وعدو للمول وقعدو البنات يلعبن وهما يحكو
الصافي .. ها يا زين احكي
زين .. شنو بنحكي اللي عندي قلته لك
الصافي .. اسمع يا خوي زي ما انت تعرفني نا نعرفك كويس اما انك غلطت مع آسيا وبتجي هكي تقولها ليا مستحيل ياخوي لو درتها صح كنت كذبت الف كذبة وماقلتش ليا انك غلطت معاها ومع ذلك مانبيش نضغط عليك لانك لو تبي تقولي كنت قلت ليا السبب طول وماقلتش الكلام هذا
زين طبس راسه لانه اكتشف انه خوه عارفه كويس
الصافي ورفع وجه خوه .. عمرك ما اطبس راسك حتى لي وحط عينك في عيني وانت تحكي وخلينا في الجد تو
شنو تبي
زين .. نبي نخطب آسيا لا مش خطبة قراية فاتحة وحتى كان يطلع فرح في اسبوع ماعندي مشكلة
الصافي .. في سبب مخليك مستعجل
زين .. اه في سبب بس سامحني خوي مانقدرش انقوله لكن قدامي اسبوع بس او تقدر اسبوع ناقص يوم
الصافي .. اكيد في بالك خطة
زين .. اذا انت معاي نقدر انفذها بسرعة وبدون ما انثير اي شك
الصافي .. نا معاك اكيد بالذات آسيا منا وفينا ونعرفوها كويس
زين .. بعد مانطلعو من هنا تاخذ باتي وعمي وتحكي لهم اني نبي نقرا فاتحة بحيث مايجيش المغرب الا وهما ماشيين لعمي قيس يخطبوها ويتفقو ان الفاتحة بكرة او بعده بالكثير
الصافي .. بس حيستغربو سبب الاصرار
والاستعجال
زين بهدوء .. ماهو انت بتقول اني بنقدم على اوراق بعثة على حساب الدولة ونبي نطلع معاي مرتي وبيش نبدا في الاوراق لازم يكون في عقد زواج من الاول
الصافي .. بس زين انت نتيجتك ماطلعتش
زين .. طلعت يا خوي وبتقدير ممتاز مع مرتبة الشرف اخرى
الصافي صبى حضن خوه .. الف مبارك يا خوي والله فرحتني وسنين سفرك ماعدنش على الفاضي
زين .. الله يبارك فيك ياخوي لاني ديمة حاطكم قدامي هذا ليش تفوقت
الصافي .. وانت بتقدم على بعثة صح او غير سبب بس
زين .. مش عارف الحق غير خليهم تو يمشو على اساس الكلام هذا وانا مش خسران حاجة لو صحلي حنقدم اوراق ابثعات لالمانيا وتكون فعلا آسيا مرتي وتمشي معاي ولو ماصحليش بنسافر شهر عسل لي المانيا وبعد مانروح نقوللهم ماعجبتنيش البلاد وبنستنى نين نلقى بلاد ثانية ننسجم ليها وهكي نين ينسو الموضوع وصدقني طالما نا قاعد بينهم مافيش حد حيسئلني شنو صار غير هذين اجابات للناس الثانية واهل آسيا وجدودي وهلنا لكن لامهاتي والله مايهمن حاجة الا نا احذاهن
الصافي سكت شوي .. مفكر في كل حاجة زي العادة
زين بضحكة وفهم على الصافي شنو يقصد .. اكيد عاد نا بو الخطط نخطط للناس مانخططش لروحي
الصافي .. خوي لو السبب اللي مخليك تتزوج آسيا بسببه كبير وتبي مساعدة نا قاعد امتى ماتبيني تلقاني
زين .. اكيد هذي ماعندي فيها شك لكن نبيك تعرف حاجة ياخوي اني نا عمري ماحبيت ولا حنحب غير آسيا في عمري كله هيا حب حياتي راه وممكن المشكلة اللي صارت عجلت الزواج بس لكن عمري ماكنت نتخيل مرا تكون على اسمي الا هيا
الصافي .. ربي يهنيك ياخوي وخلي الامور عليا وماتفكر في شئ وان شاءالله حتقرا فاتحة قبل نهاية الاسبوع وبما ان شقتك جاهزة ماناقصها شئ ممكن حتى الفرح نخلوه الاسبوع الجاي
زين .. ربي يخليك لي يا خوي
أنت تقرأ
(سلسلة أقرباء ولكن) الجزء الرابع و الاخير بعنوان ولد خالتي
Historia Cortaسلسلة أقرباء ولكن هي سلسلة متصلة ببعض وعشان تفهم الجزء الرابع لازم تقرا كل الاجزاء السابقة.. حياة التنزيل يومي باذن الله
