#ولد_خالتي (الجزء الرابع من سلسلة اقرباء ولكن )
الفصل السادس عشر والاخير
كرم .. زين بنقولك حاجة مرات توصلك لآسيا
زين بلهفة .. وساكت لتو قول
كرم .. نا شاك في الصافي
زين .. كيف
كرم .. مش ملاحظ ان صافي العصبي واللي دمه حامي مبرد وهادي اكثر من اللزوم
زين بتركيز .. صح
كرم .. وزيد معاها اكثر من مرة نشوف فيه ماشي هو ورحيق شور عمارة خالك
زين .. وين الغريب اكيد ماشيين لخالي
كرم .. صادفته اكثر من مرة ومرة من المرات شفته العشية وفي الليل في نفس اليوم واليوم هذا بالذات جيتك في حوش هلك ولقيت خالك غادي وقلت ليا انهم من العشية وهما عندكم
زين بشك .. قصدك الصافي هو اللي داس آسيا
كرم ببرود .. او ممكن يعرف مكانها هو الصافي يعرف حد في عمارة خالك غير خالك
زين سكت وقعد يجمع في افكاره وبعد مدة من التفكير
زين .. اضني وئام اللي يشتغل مع الصافي في المعرض الثاني شقته في الجهة هديكة بيتزوج فيها وحتى عرسه قريب
كرم .. اتصل بيه تأكد منه
زين .. لا مانيش متصل مرات يطلع يعلم ويكلم الصافي ويغير مكانها
كرم بنظرة خبث لانه وصل للي يبيه .. شنو بدير
زين .. بنراقب الصافي لما يطلع مع رحيق
كرم .. راي حتى هو غير راه يفطنلك الصافي
زين .. كون هاني
وعدى كرم بعد ماوصل زين للي يبوه كيف مادرات رحيق الخطة والصافي ثاني يوم طلع بدري هو ورحيق ومشى وراهم زين اللي كان يراقب فيهم من شقته وشافهم حطو روح في حوش هلهم وبعدها طلعو وتكو على محل خذا الصافي حاجات وطلع وفعلا الطريق جيهة عمارة خاله ونزل الصافي ورحيق وزين بعد شوي نزل وراهم وقعد يركب في الدروج بدون صوت نين شافهم فاتو شقة خاله وعرف الشقة اللي دقو عليها ونزل زين بسرعة وركب في سيارته وقعد يستنى فيهم يطلعو وفعلا بعد قريب ساعة الا ربع طلعو وخلاهم نين باعدو كويس من حذا العمارة ونزل ودق على الباب وحط ايده على العين بيش ماتشوفاش وفي نفس الوقت آسيا توقعت ان رحيق نست حاجة ففتحت بدون ماتقول من
آسيا بصدمة .. زين
وطاحت اغمى عليها وبخوف دخلها زين للشقة ورجع سكرها ودور على عطر مالقاش خش الكوجينة جاب بصل وفشخه قربه منها وبدت تفتح في عيونها
زين بخوف وحب ولهفة .. سي حبيبتي انتي كويسة
آسيا ومازالت متممدة على الصالون وبصوت واطي .. زين
زين .. يا روحه وعمره آسف آسف آسف ياقلبي سامحيني غلطت في حقك سامحيني
آسيا وقعدت تبكي .. انت وجعتني انت صدقت اني ندير حاجة كيف هذي
زين رفعها وضمها ليه .. حقك عليا الشك غلبني وبالذات بالرسائل لخبطني مع ان قلبي كان متأكد انك مش هكي بس شنو اندير النفس ضعيفة ياقلبي سامحيني
آسيا من بين دموعها .. اشتقت ليك
زين وزاد حضنها .. ونا ميت بلاك
وبعد وقت وهدت آسيا لكن مازالت في حضن زين اللي مباش يفكها تقول خايف انها تهرب منه مرة اخرى
وزين مباش يتكلم مكتفي انها في حضنه وبعد وقت كويس بعدت آسيا عشان تبي الحمام وخشت الحمام وغسلت وجهها لانها كانت ترجع وطلعت لقت زين عند الباب
أنت تقرأ
(سلسلة أقرباء ولكن) الجزء الرابع و الاخير بعنوان ولد خالتي
Short Storyسلسلة أقرباء ولكن هي سلسلة متصلة ببعض وعشان تفهم الجزء الرابع لازم تقرا كل الاجزاء السابقة.. حياة التنزيل يومي باذن الله
