(سلسلة أقرباء ولكن) الجزء الرابع و الاخير بعنوان ولد خالتي

الفصل الثامن

#ولد_خالتي ( الحزء الرابع من سلسلة اقرباء ولكن )

الفصل الثامن

كرم .. اهدء زين ورد بالك ادير حاجة اضرها لو انت خلاص معاش تبيها خليها فترة معاك وبعدها طلقها انت مش مجبر تكمل معاها
زين بحيرة .. والله ماني عارف شنو اندير المشكلة ان قلبي فرحان انها معاي اخيرا وعقلي حاقد كان يلقى يقتلها وقلبي الخاين ينبض بقربها بقوة
كرم .. اعطيها فرصة اسمع منها زين وشوف مبررها ليش كذبت عليك وزي ما انت قلت اكيد في سبب خلاها تسيبه وماتقولكش انها كانت بعلاقة
زين .. تعرف لاول مرة اندير خطوة ونندم عليها تعرف المفروض خليتها فاتحة وراه هجيت وبعد وقت راه طلقتها وخلاص
كرم .. تكذب على روحك يا صاحبي انت تحبها ماتقدرش ادير هكي واللي مخليك متعذب بالشكل هذا انك تحبها وواجد اخرى

آسيا
خششني زين للشقة وطلع لكرم اللي استغربت اصلا ركبته معانا لفوق توقعته زي عقاب اصحابه يسيبوه قدام العمارة ويمشو ولعند تو مازال ماخش رغم اني غيرت الڤيلو ولبست بيجامة قماش قطني تركية حلوة لونها ابيض وعلى حواشي رقبتها وكمامها وسروالها خط رقيق احمر وسروالها فيه قصرة شوي بالذات اني عارفة روحي مش حبيبته غسلت وجهي وحولت مكياجي وتوضيت وصليت ودرت برمة في الشقة اللي لو انا اللي مفرشتها راه درت زي ماهيا بالزبط الالوان اللي نحبهن درجات القهوي والبيج ومدمج معاهن الفوشيا والاصفر غير الكوجينة اللي روعة وتركيب الالوان وتنسيقها حاجة خيال فعلا رحيق بذلت مجهود فيها بس ليش الوانها هكي وزعمك حبيبته تحب الالوان هذي زيي بالذات ان رورو قالت الالوان من اختيار زين لكن التشكيلات اختيارها هيا وبتنهيدة عليك بخت حتى حبيبته تحب الالوان هذي كيفي وكملت برمتي وهو مازال ماخش ومعاش عرفت شنو اندير فتحت الشاشة اللي في الدار وقعدت نتفرج نين خش عليا

زين .. ممكن آسيا تسخني العشاء نحس في روحي جعان
آسيا .. حاضر

وطلعت آسيا تسخن في العشاء اللي عطوه لهم من عشاء الصالة وزين غير دبشه ولبس بيجامة قطنية خفيفة سودا بخطوط بيض بسيطات وتعشو بهدوء بدون اي كلام بينهم وكملو وضمت آسيا الطاولة وغسلت العوايز ونشفتهن وطلعت لزين بشاهي اخضر لانها عارفة انه يحب يشربه بعد الوكال وخذاه منها
ومعاش عرفت شنو ادير او شنو تقول وتحس في الموقف كله غريب عليها وعليه وبالذات حاسة ان في زين حاجة متغيرة

زين بهدوء .. خشي آسيا كان بترقدي اكيد تاعبة وبالذات بكرة ورانا صباحية غذاء راه لان بنعدو في المغرب طيارتنا
آسيا .. حاضر تصبح على خير
زين .. وانتي من اهله

وخشت آسيا للدار وهي متأكدة ان فعلا زين فيه حاجة لكن شنو هي مش عارفة
وبحيرتها لقت دمعتها تنزل لانها ماتخيلتش حتى في حلم الليل انها لما ترتبط بزين يكون هكي الارتباط وتوقعت انها لما تصير مراته حيكون ليها لكن اللي صار حست زين واحد غريب عليها بكل لدرجة تأكدت ان في حاجة لانها بالعادي لما تكون مع زين يحكو ويضحكو مش لابال تو لكن تحس فيه جاف
وزين من كثر ما حايس بين عقله وقلبه رقد وهو يفكر فلي دارته آسيا حبيبته