#ولد_خالتي (الجزء الرابع من سلسلة اقرباء ولكن )
الفصل الثالث
آسيا بخوف .. حي عليا يا حياة حي عليا مصيبة
حياة .. تي فهميني شنو في ترا هاتي نشوف
وكرت منها الفون وشافت الصور وبخوف اكبر من اختها
حياة .. حي علينا شنو بنديرو تو
آسيا بخوف ورعشة في جسمها كله من اللي شافاته ..والله ماني عارفة
حياة .. نخبرو ماما
آسيا بفجعة .. شنو لا لا والله تعدي فيها
عندي نخبر بابا اهون
حياة .. صبي خبريه امنا
آسيا .. لا تو خليها شوي نين نعرف شنو يبي ومن هو اصلا
حياة .. كيف بتعرفي بس الصور هذين من اعراس حاضرينهن مرات تطلع وحدة مش واحد اللي يبعث في الصور هذين وتكون هيا اللي مصورتك
آسيا .. ماهو اكيد عطاه مرئي يعني شفت الصور واكيد حيتصل او يبعث ويكتب شنو يبي ومتأكدة انه شاب لان الصور اللي بعتهن من فوني غير ركزي عليهن هذين مصورتهن بكاميرا فوني نا ووضعيات واخذتهن عشان التصوير لو وحدة مصورتني على غفلة مكننش الصور حيكونن هكي غير ركزي عليهن اكثرهن انتي او مريم مصوراتني
حياة .. صح كلامك به وكيف بتصبري
آسيا .. ماعندي ماندير غير ندعي لربي بس كيف جابهن كيف وصل ليهن بالذات ان فوني مانعطيش فيه لحد وديمة فاطنة يعني غيرك انتي ومريم وتين ورور وجوجو هذا هنا بس اللي نعطي فيهن فوني ومعاها حتى الباسورد مايعرفناش
حياة .. ربي يسهل هيا صبي غيري دبشك وجهك منصفر وتو ماما معاش تبطل سؤال على الاقل لما نطلعو تغطيه بكريمة يخف شوية
آسيا .. وين نطلعو
حياة .. نمشو لاي كافيه المهم تطلعي
آسيا .. هيا صبيت
*وفعلا طلعن الاثنين وآسيا محملة بهموم الدنيا من اللي يبعث في صورها الخاصة وهي بقصير وعريان مصورتهن في اعراس ومن كثر ماهي ادور في دوامة وراء دوامة من التفكير ما قدرتش اتغير حتى جو بالطلعة وروحن وفي طريقن وزي العادة
حياة .. والله ماتعبي عليا ماني مصبية
آسيا بترجي .. بالله عليك بالله عليك حرام شكله هذين بس اللي فاضلات
حياة .. والله ماما توريك
آسيا .. تعارك وتسكت
وفعلا صبت حياة قدام شايب مصبي على برويطة يبيع في جزر ونزلت آسيا
آسيا .. بكم الربطة يا عمي
الشايب .. بجنيه
آسيا .. كم ربطة فاضلات عندك
الشايب .. عشرة
آسيا .. خلاص عطيهن لي كلهن
الشايب .. بارك الله فيك يا بنتي والله مصبي غير عليهن بس
آسيا .. وفيك بارك الله يا عمي
لم الشايب الجزر اللي فاضل وحطهن في شكارة وبعد ماخلاصته آسيا .. ربي يستر عليك يا بنتي وينور طريقك
آسيا بتنهيدة .. ان شاءالله ياعمي
وركبت آسيا للسيارة وروحو للحوش واستقبلتهم امهن
صباح .. غير امتى تبطلي هالعادة كان تعطيهم الفلوس وخلاص مش اريح من كل مرة خاشة عليا بخضرة شكل
آسيا .. لو كان يبو الفلوس تجيهم بسهولة راه مايصبوش ببرويطة النهار كله بشوي خضرا مايجيش حقها خمسين جنيه ويفرح كان باع نصها وبعدين هالمرة ماجبتش حاجة تفسد تقدري تخزنيه في الفريز
على خشة قيس .. كنك يا صباح صوتك عالي
صباح .. بنتك وعادة شرية الخضرا
قيس بضحكة .. شنو جابت هالمرة
صباح .. جزر
آسيا .. يا بابا والله حرام المغرب قريب يذن وهو مصبي على هذين بس
قيس .. وشايب هالمرة
آسيا .. اصلا نا ماناخذش الا منهم لان الشباب صح يسترزقو على حالهم حتى هما ومرات هله في رقبته لكن اسماه شاب مازال صغير وبصحته لكن لما نلقى شايب مصبي ببرويطة يوجعني ماصبا هالتصباية هذي الا للحاجة وعزة النفس
صباح .. معناها مافاصلتيش زي العادة
آسيا .. يا ماما حرام هيا الربطة بجنيه وتبيني نفاصل اخرى
قيس .. في السوق يا بنتي بخمسين قرش
آسيا .. والله يا بابا تمنيت يستغلني ويقولي حتى بجنيه ونص لكن هو مازادش وبالعكس جاء بيردلي اثنين جنيه عشان يبي يحسبهن ليا بثمانية العشر رباطي مابيتش ناخذهن وربي يفرج على هالناس
قيس بحب .. ربي يبارك فيك يا بنتي ويهديك
آسيا بحمق .. شنو يا بابا تشوف فيا نقطع في دبشي
قيس .. طريقة لبسك يا بنتي رغم انها مش عجبتني لكن عودتكن ما اديرنش حاجة الا بقناعة تامة منكن
آسيا .. حاضر يا بابا اصلا نا الموضوع هذا ليا فترة انفكر فيه وتقريبا بنعدي بكرة ان شاءالله لناصر ناخذ منه كم لبسة ولبسي هذا نخليه للزيارات العائلية بس
صباح .. الف حمدلله يارب
قيس .. بقناعة يا بنتي اهم حاجة
آسيا .. اكيد يا بابا اصلا نا الحمدلله ماتفوتش فيا صلاة ونصيم في الاجر ونحس ديمة في روحي اندير في حاجة غلط وحرام لان دينا مش هكي قال نلبسو
حياة .. يعني بتتحجبي
آسيا .. مازالت نفكر مع اني لما نشوف فيك ومريم نغار ونقول ليش نا مش زيكن لكن مازالت ماحسمت موقفي
قيس .. بشوي عليك بنتي اهم حاجة تغيري طريقة اللبس والحجاب بشوي فكري فيه
آسيا باستغراب .. انت عمرك ماتكلمت على لبسي يا بابا شنو اللي جد
فيس .. اللي جد انك خلاص كملتي جامعة واكيد ناجحة باذن الله وحتشتغلي وبطريقة لبسك هذي حتتعبي واجد في عملك لان وقتنا هذا اللي تلبس كيفك تبقى مستهترة والناس اظن بيها السو من اصحاب النفوس الضعيفة وحتى اللي نفوسهم تمام يابنتي يشوفك انك بنت مش مزبوطة نا مش عجبني لبسك لكن نبيك تتغيري بنقاعتك خوف من ربي مش مني
آسيا .. عندك حق مع اني ماخذيتاش من باب اللي فكرت فيه
صباح .. امنا من اي باب
آسيا .. من باب لو نموت بكرة شنو بنقول لربي لما بيحاسبني على لبسي وحجابي
حياة وصباح وقيس .. بعيد السو عليك
آسيا .. الموت كلنا ماشيين ليها لكن هضا هو تفكيري
فيس .. ربي يهديك للاحسن
حياة .. مريم وسيفان وين
صباح .. حوش خالتك امل
آسيا بقلب دق بقوة .. خير ان شاءالله
صباح .. سيفان قال بيمشي لرامز يكسد معاه ومريم قالت نعدي نساعد رحيق وخالتها امل وخلود في التجهيز لحفلة زين
حياة .. امتى بيجي
صباح .. بعد يومين
حياة .. عيب حتى نحن المفروض مشينا
صباح .. اكيد بنمشي بكرة ومرات حتى نبات عندهم وانتن براحتكن
حياة .. نا عادي ماعنديش مشكلة
قيس .. وانتي آسيا
آسيا .. ها
قيس .. ها شنو بتباتي عند خالتك بكرة او لا
آسيا .. مش عارفة لبكرة يفرجها الف فرج
وخشت آسيا لدارها وهي تفكر في مرواحة زين اللي همها نساها فرحتها بجيته وخشت حياة وراها
حياة .. سوسو ردي بالك تكوني بتتحجبي بسبب الصور وقصتهن
آسيا .. لا والله بالذات مطمنة لانه لو يبي يضرني كان دار بيهن حاجة اخرى مش يبعث فيهن ليا لكن والله الحجاب وتغير طريقة لبسي من فترة ونا نفكر فيه بالذات لما نشوف قروبي وتين وجوجو و رورو كيف لبسهن حلو وبحجابهن تي حتى رحيق بعبايتها الشرعية منظرها يهبل نحس في وجهها نور وبالذات لما شفت فرحة الصافي لما قررت لبستها كيف كانت وانا نقول كني مش زيهن وخاطري نشوف الفرحة هذي في عيون بابا وماما
حياة .. شنو بتلبسي العباية الشرعية مرة وحدة
آسيا .. بناخذ الحجاب بالخطوة
حياة .. كيف
آسيا .. يعني تو بنغير طريقة لبسي لحاجة اكثر حشمة وممكن نتحجب وكل مرة اندير خطوة نين نوصل للعباية الشرعية زي ما درات رحيق وممكن لو درت نا زيها حتى وتين وجيهان يديرن زينا
حياة .. ممكن وان شاءالله ربي يهديك للاحسن ويحفظك من كل سو يارب
آسيا .. يارب
حياة .. به شنو متوقعة يبي منك
آسيا بتنهيدة .. والله ماني عارفة حتى حاوالت نتصل بيه مايردش عليا وبعتتله على الواتس وقلت شنو تبي رد عليا بكل شئ في وقته حلو واهو قاعدة نستنى
حياة .. مش كان خبرنا بابا خير
آسيا .. والله ماني عارفة خليني قبل نعرف شنو يبي وبعده يصير خير
حياة .. ان شاءالله
وثاني يوم طلعت آسيا وحياة للسوق وشرت دبش وهالمرة وهيا مقتنعة وخذت لبسة حلوة لجية زين ومتنمية انها تلفت نظره بعد ماتغيرت وقررت التغير من اليوم لما مشو كلهم لحوش خالتهم وعمهم في نفس الوقت بيساعدوهم ويباتو عندهم عشان بكرة زين بيروح بالسلامة ونهائي ولبست سروال واسع وطويل لونه اخضر ولبست معاه بلوزة قصيرة لونها اصفر هادي ومازالت مالبست الحجاب ولمت شعرها بشكل ذيل قصير اللي اول ماوصلت فرحن البنات بطريقة تغيير لبسها وحست انها فعلا كانت ماشية في طريق غلط
وجاء ثاني يوم والاستعداد لجية زين والعيلة ملتمة فرحانة برجعة الغايب ولبست آسيا فستان طويل ضيق من عند الصدر وواسع من تحت بوسعة حلوة ومبين خصرها الرشيق لونه رصاصي مخطط خفيف بدون اكمام وتحت بلوزة بيضاء بكم مزخرف بسيط لكن حلو وانيق ووصل زين بزغاريد امهاته وخلاته وحتى عماته وفرحة رحيق وبنات العيلة وبعد ماسلم وصل عند آسيا اللي قعدت منستهة فيه نين نغزتها حياة
آسيا
ديمة انقول ان البدلة الرسمية مستحيل تطلع على زين خصوصا انه استايله كان غريب يعني كان شعر طويل يدير فيه كعكة وشناب زي الاتراك طوال مقوسات ولحية كثيفة وسروايل على الموضة قصيرة ومثنية وسواري مبينات تفاصيل جسمه ومفتوحة لنهاية صدره لكن اللي نشوف فيه تو حاجة ثانية شعر مقصوص قصير جمة نازالة على جبته بحكم طبيعة شعره الناعم اللي لونه اسود وسبحان الله فيه خصلات بنية تقول ميش داير وبدلة تقول صممت ليه
زين وهو يمد في ايده وبضحكة سلبت عقل وقلب آسيا ...........
#حياة
تصحيح اخطاء املائية وحوارية # الصابرة
أنت تقرأ
(سلسلة أقرباء ولكن) الجزء الرابع و الاخير بعنوان ولد خالتي
Short Storyسلسلة أقرباء ولكن هي سلسلة متصلة ببعض وعشان تفهم الجزء الرابع لازم تقرا كل الاجزاء السابقة.. حياة التنزيل يومي باذن الله
