#ولد_خالتي (الجزء الرابع من سلسلة اقرباء ولكن )
الفصل العاشر
زين
اليوم من اول ما وعيت ونا مش عارف كني ونحس في قلبي مسيطر سيطرة كبيرة على عقلي بالذات اني نا رقدت على السرير من لما انتقلنا للشقة بعد ما اكتشفت آسيا ان وحدة من الكنبات تنسحب وتتحول لسرير لكن بسبب طولي طبعا مستحيل يرقدني واول مابحتت شفتها راقدة بعمق فقعدت على سريري نتفرج عليها لاني لو بننزل نخش للحمام حتفطن بسبب القرب وحسيت بيها تتحرك وقمعزت وانتبهت ليا اني مقمعز وصبحت عليا وبخدود راحو حمر في البداية استغربت وبعدين فطنت لروحي عادة نومي مستحيل نرقد ونا لابس حاجة من فوق سوى صيف او شتاء وضحكت عليها لما خشت للحمام بسرعة وخذيت طرف بيجامتي ولبسته ونزلت
آسيا طلعت من الحمام .. صباح الخير
زين .. صباح النور ان شاءالله رقدتي مرتاحة
آسيا .. وليش مانكونش
زين .. بسبب السرير مرات مش مريح
آسيا .. بالعكس مريح بكل واضني اريح حتى من السرير اللي رقدت عليه وبعدين حتى لو مش مريح مع الايام تعودت عليه لكن والله مريح وواجد اخرى
زين .. به الحمدلله
آسيا .. خليني نجهز الفطور
زين .. آسيا
آسيا .. نعم
زين بهزة راس .. لا خلاص
واستغربت آسيا ومشت شور المطبخ تجهز في الفطور وحاسة بان زين يبي يقول حاجة وفيه تغيير والتغيير حلو لانها لاحظت حتى وزين يتعامل معاها عادي في الايام اللي فاتن لكن المعاملة فيها شوي حرص او جفاء عكس اليوم كأنه زين اللي تعرفه قبل مايتزوجها وقبل حتى مايسافر وشوي جهزت الفطور على سفرة الاكل ونادته جاء ومغير دبشه وهيا جت بتكر الكرسي تقمعز عليه لقيت زين مصبي قدامها ورفعت راسها شوره
زين بنبرة مافهمتهاش آسيا بس استغربتها .. آسيا انتي زوجتي على سنة الله ورسوله صح
آسيا باستغراب من سؤاله ونبرته .. اه
زين .. يعني حلالي
آسيا بهزة راس وقلب بدا يدق بقوة .. اه
ومافطنت آسيا الا وزين يحضن فيها في البداية ارتبكت لكن على طول فهمت سبب سؤاله وكأنه كان يبرر ليها ليش حضنها وشوي وبادلته الحضن وطول زين حاضنها ورغم احراج آسيا الا انها فرحت بالحضن واستبشرت خير وبدون اي كلام سيب زين حضنها وباس على راسها وقمعز على الكرسي وبدا يفطر وآسيا دارت زيه وفي نفسها خلاص اكدت قرارها بالذات معاش مازال واجد على مرواحتهم
وطلعو زي العادة ادهورو وشافت اماكن واجد وزين يوصف ويشرح ليها واليوم بالذات زين من بعد الحضن الصبح وهو يتقرب منها واجد وديمة ضامها ليه بيد وحدة من عند كتفها لما يكونو في مكان زحمة واذا مافيش زحمة يقعد ماسك ايدها مايسيبش فيها وعدو تعشو في مطعم سراج بعد ماكلمتهم غادة انهم يتلاقو غادي والمطعم مش بعيد من مكان السكن وبعد جو سمح روحو مع بعض وغيرو دبشهم وزين مقمعز يتفرج جت آسيا بتوتر بعد ماقررت انها تعترف ليه بالذات انه هو تو حلالها وانحسبت عليها زيجة على الاقل تكون حاولت انها تخلي الزيجة هذي تستمر وزين ينسى حبيبته
أنت تقرأ
(سلسلة أقرباء ولكن) الجزء الرابع و الاخير بعنوان ولد خالتي
Short Storyسلسلة أقرباء ولكن هي سلسلة متصلة ببعض وعشان تفهم الجزء الرابع لازم تقرا كل الاجزاء السابقة.. حياة التنزيل يومي باذن الله
