(سلسلة أقرباء ولكن) الجزء الرابع و الاخير بعنوان ولد خالتي

الفصل الخامس

#ولد_خالتي (الجزء الرابع من سلسلة اقرباء ولكن )

الفصل الخامس

زين .. كنك سي
آسيا..  صداع راسي بيطربق وخذيت باندول هدا شوي لكن مازال قاعد قلت اندير ليمون بالك ضغطي هابط
زين بضحكة .. ضغطك هابط وبديري ليمون يا دايخة الليمون يزيد يهبطه خوذي زيتون
آسيا .. صح غابت عليا
زين وقرب منها .. ترى وريني عيونك
(وفتح عين آسيا وشاف خط العين ابيض عارفينه الخط اللي نكحلو فيه جبده شوي بيش بان اللي تحت )  سي اظني حتى سكرك هابط لان خط عينك ابيض واجد راه
آسيا وتوتر من قرب زين منها وعطره اللي طول عمرها وهي تعشق ريحته غزت خشمها .. تو ناكل حاجة حلوة
زين .. لا خوذي تمر تو يرفعه كويس او اميه وسكر فوتيه الحلو
آسيا .. به
وخذت تمرات وكلهتن تحت نظر زين ويشبح فيها بنظرات ماركزتش عليهن آسيا

زين بهدوء .. سي ماتفكري في شئ عندي الحل ان شاءالله بس بنسئلك
آسيا .. تفضل
زين .. آسيا انتي مرتبطة او تحبي
آسيا بثقة .. لا يا زين مش عشان لبسي كان قصير وضابط ومش محجبة نبقى بنت منحلة عمرك ماتفكر فيا هكي يا #ولد_خالتي زي الثقة اللي خلت بابا مايتكلمش على لبسي هيا نفسها اللي منعتني اندير حاجة في الخفاء ومانقدرش انواجه بابا بيها فعمري ماكنت عندي علاقة ولا حتى حاجة اسمها صداقة بشاب لاني ديمة كنت نخاف من الاستغلال وفي نفس الوقت ديمة نفكر اني لما نعصم قلبي ونخليه للي بيكون راجلي فربي حيرزقني براجل حتى هو عاصم قلبه وماخشه حد قبلي
زين ومعجب بكلام آسيا اللي ماتوقعاش منها .. خلاص سي كوني هانية ان شاءالله عندي الحل بس ايش مانقولك قولي باهي نين نحلو القصة وبعدها اللي تبيه ديريه
آسيا بتوتر .. به شنو بدير
زين .. خليني بنشوف حاجة قبل ما نحكيلك كل شئ
آسيا .. به (وبعدين فطنت ان زين خش للكوجينة وما خذا شئ) زين انت ليش جيت للكوجينة
زين خبط جبته .. حي نسيت كرم زنتله في كابتشينو وجيت بندير ليه وليا
آسيا بضحكة .. تو كرم يقول شكله يصنع في النسكافيه ههه عدي زين تو انديرها لكم ونجيبها
زين .. به

ودارت آسيا الكابتشينو وهي حاسة براحة رغم خوفها الاول من زين وان ردت فعل زين هادية وانه فعلا يفكر في الحل ليها ورفعت ليهم السفرة وخشت للدار للبنات ولقتهن شبه راقدات لكن جيهان تستنى فيها وحكت لها ليش طولت

جيهان بصوت واطي بيش مايسمعنهاش البنات .. مافيش جديد صار
آسيا .. لا عادي ماقال شئ
جيهان .. نقولك حاجة سوسو
آسيا .. شنو
جيهان .. احساسي يقولي ان زين يحبك
آسيا بفرحة .. كيف عرفتي
جيهان .. عيونه سوسو انتي عميه والله شنو
آسيا باستغراب .. كيف
جيهان .. تعرفي من لما خش زين ونا مركزة معاه وكان عادي فرحان زي اي حد فرحان بانه كمل جامعته وخلاص بيرجع لبلاده لكن لما جاء سلم عليك في نظرة في عيونه غير في بسمة شفتها زايدة
آسيا .. ممكن عشان طريقة لبسي تغيرت بالذات انه كان يقولي يا بنت خالتي مافي شئ يعيب فيك غير طريقة لبسك
جيهان .. كنك انتي نا نقولك عيون وانتي تقوليلي لبس
آسيا باحباط .. مانبيش نعطي لروحي امل مانبيش نعلق روحي بحبال وتطلع ذايبة
جيهان .. ان شاءالله يا سوسو يطلع حظك كيف وتين ورحيق حتى تعذبن لكن شوفي حياتهن تو
آسيا بامل .. يارب يارب حتى انتي جوجو يطلع حظك كيفهن
جيهان .. نا ما ظني
آسيا .. ليش تقولي هكي
جيهان .. اهو الفرح قرب ومافكرش حتى يحاول يتقرب مني بطريقة اني بنكون مراته لا قاعد تعامله معاي كأني بنت عمه اللي عمرها خمسة سنين يتعامل معاي وكأني طفلة مش بنكون مرته بعد كذا شهر لدرجة نقعد نضحك من تصرفاته 
آسيا .. تصدقي جوجو نا محيرتني حاجة
جيهان .. شنو
آسيا .. ليش باتك اختارك لاوس وحتى عمي محمد بروحه من لما ولدتي اختارك لاوس رغم انه يكبرك بي 12 سنة
ليش ما اختاروش ليك باسل ولد عمك  ياسين والله شاهين ولد عمك الجارح بالذات انهم مناسبين لعمرك يعني باسل اكبر منك بسنتين وشاهين اربع سنين
جيهان بحيرة .. مش عارفة ولا فكرت نسئل رغم ان صقر تزوج فاطمة عن حب وهو اكبر منها بخمس سنوات واسد يكبر خاتون بي ستة سنوات وحتى عائشة مسمية لصياد وهو اكبر منها باربع سنوات وام كلثوم مسمية لعقاب وهو اكبر منها بسنتين
آسيا .. تحسي حاجة تحير وغريبة ماسئلتيش على السبب بالذات ان ام كلثوم كانت اقرب وحدة لي اوس في العمر
جيهان .. مش عارفة لكن تصدقي تو يوم نقمعز مع ناصر نخليه يسئل بابا
آسيا .. هيا خلينا نتمددو ونرقدو بكرة فرخات وتين ورحيق يوعنا بدري هنا وجداتهن
جيهان بضحكة .. تسمعك عمتك خلود تعلقك من وذناك على كلمة فرخات
آسيا بضحكة .. والله صدقتي