#ولد_خالتي ( الجزء الرابع من سلسلة اقرباء ولكن )
الفصل الحادي عشر
آسيا
كملت القراية لان معاش في شئ بعدها ومع نهايتها قلبي قريب يوقف وفهمت تصرف زين لانه مش فاهم بس اني كذبت عليه لا معاها فاهم اني مش بنت واني غالطة وسلمت نفسي للحقير عصام به ليش زين مافكرش اني لو فعلا درت هكي ليش انهرت لما كان يساوم فيا على شرفي بس كيف انبعتت الرسائل من فوني ونا عمري ماعطيته لحد
وقبل ماتنهار آسيا لبست حجابها وخذت المفتاح وطلعت لغادة بعد ماردت الاوراق والفون لمكانه
غادة بفجعة من شكل آسيا .. كنك سوسو شنو في زين دار فيك حاجة اخرى
آسيا حضنتها وقعدت تبكي وبس تبكي على بختها اللي طيحها بين ايدين واحد كيف عصام بيش يلعب اللعبة هذي وتجي قدام حب عمرها بكت بقهر ووجع وألم وبعد ماهدت خششتها غادة جوا وجابت ليها امية
غادة بخوف .. كنك يا سوسو شنو في
آسيا بهدوء .. قبل مانحكيلك اي حاجة تساعديني ياغادة
غادة .. اكيد حنساعدك ولو بنصبي في وجه سراج
آسيا خذت نفس وبدت تحكي ليها كل حاجة من لما هزبت عصام وغادة سمعت ليها بتركيز واهتمام ومرات ينزلن دموع آسيا بالذات لما قعدت تتذكر في تصرفات زين كيف كانن نين وصلت لقراية المحادثات الكذابة اللي بينها وبين عصام
غادة .. به كيف صار هكي
آسيا بقلة حيلة .. والله مانعرف كيف وصل اصلا لصوري ومعاها في محادثة بيني وبينه ونا عمري ماعرفته الا يوم صباني في الجامعة
غادة .. هذي حاجة تحير بس انتي شنو تبي
آسيا .. انا نفكر في حاجة بس اهم شئ سراج مايعلمش بلي حكيته لك نين نفكر في طريقة نخلي زين يكتشف اني بنت
غادة .. نا معاك في اي شئ تبيه ولو تبيني نكشف عليك بيش نأكد ليه ماعندكش مشكلة
آسيا .. لا مش هكي نا اصلا مانبيشي يعلم اني قريت المحادثات او شفت الفون
نبيه يعلم بطريقة توجعه زي مانا حاسة بالوجع تو والقهر نبيه ينقهر زي ماقهرني وبدل مايواجهني سكت وصدق اني ممكن اندير هكي
غادة .. ما تلوميش زين اي حد مكانه اكيد كان دار هكي واكثر اخرى
آسيا بهزة راس .. لا يا غادة زين مش #ولد_خالتي بس زين #ولد_عمي يا غادة راه بات زين وبابا ضنا عم وعلاقتنا مع بعض قوية بكل كبرنا مع بعض ومناسبتنا مع بعض وكل واحد فينا يعرف طبع الاخر كويس يعني زين ممكن اكثر واحد يعرف اني مانعرفش نكذب وحتى لو كذبت بسرعة ماتنكشف كذبتي وكلهم عارفين فيا الطبع هذا لدرجة ضنا عمي وخوالي مايحبوش يقولو حاجة حذاي لان لو دارو مشكلة على طول الكبار يجوني نا يسئلوني لانهم عارفين اني مستحيل نكذب
غادة .. بس لازم تعرفي منو اللي استخدم فونك وراسل عصام وعطاه صورك
آسيا .. لما نروح اول حاجة بنديرها هيا هذي اكيد ... تو بنخليك وشكرا انك سمعتيني
غادة .. عيب ماتقوليش هكي نا اختك ويعلم الله غلاوتك كيف غلات زين عندنا وربي يهدي بالكم ويجمع بينكم وتنكشف هالغمامة
آسيا .. آمين يارب
أنت تقرأ
(سلسلة أقرباء ولكن) الجزء الرابع و الاخير بعنوان ولد خالتي
Historia Cortaسلسلة أقرباء ولكن هي سلسلة متصلة ببعض وعشان تفهم الجزء الرابع لازم تقرا كل الاجزاء السابقة.. حياة التنزيل يومي باذن الله
