متىَ ألقاكِ

١٢

ضليت اغلي واني أسمعه يهينه وهية بألاخير عافته

وصعدت فوك وهو بقى يحجي ويصيح

مااريده على مرته ((بنت عمي))مع انو البنيه حبابه ونادره

بس يبقى  السبب من عنده هو الي مامرتاحله ومارايدهه وجان مغصوب عليه مبين من تصرفاته

وحتى ملينه منا كلنا حتى امه لان يصيح ليل ونهار مااريده مااريده ويتعارك ويطلع  وهي المسكينه

ساكته لاتكول لاهله ولا تزعل وتروح شكد انقهر علية شلون متحملته وبعدهي عروس وهيج دمرها دمار لو غيرها وحده كان مابقت دقيقه وياه لان

دمرها دمر  كدام اهلة ونسوان اخوة ويرزل ويغلط ولا سوالها اي احترام داسها وكسرها  خطيه شكد انقهر عليه صح اني زوجي  جان عصبي ويضربني مرات بس كنا بيناتنا محد يدري بينا ولا يطلع مشاكلنا برة الغرفه و بي طبع حلو من  يضرب

مايخليني انام زعلانه ومايطول الزعل بيناتنه ابد لان هو حنين واني احبه ومااشيل بكلبي عليه ابد ومن اضوج من ضربه   امشيه قانون

((ضرب لحبيب مثل اكل الزبيب))

وكلشي اتحمل منه كمت وحتى  صار بيه طبع تعلمت ماانام الا على ايده وحتى لوزعلانين مااعرف انام ع مخده ومن اريد انام ايمد ايده عود تعاي ونامي🤭عرفت سوالفه وحفضتهن  ومن زوجته لهذا ليوم ابد مانايمه على مخده.

واعتبرها احلى ايام كانت ماتنسي صحيت من

صفنتي على صوت عمتي صيحلي حتى اجي اكل رحت اكلت وياهم وكملنا بعدين  ومرت حماي غسلت الاماعين عليه واني رحت سويت جاي وجبته اصب بيه كعدت يم عمتي والكل ملتمين وبديت اصب الهم وهو يتأفف ويحجي يم أمه.
_فكيني منها الله يفكج ماريدها اكرهه.

جاوبته امه بصوت ناصي.
_يمه لبنيه ما جاي اشوف بيه قصور من اوديه الى اهله شنو اكلهم.
جاوبها وهو معصب وبتهديد.

_لا تخليني اشرد وعوف البيت والله اهج وبعد مشوفوني وديه لأهله.

شربت جاي واخذت عمتي نفس وتأففت بصوت عالي وحجت.

_شنو اكلهم مابيه شيء مو زين مو عيب، انت الصوج منك مو هذا اخوك وياك شجاك ما سلكتلك مرة.
صاح بعمتي واني من يمي كمزت وخفت  وعاف جاي وطلع برة .

باوع وراة اياد وحجه وهو يخوط بلستكان ويباوعلي ومبتسم.

_يمه هم اني وديها مرتي وياج وخل أخلص هههه.
عمتي نفشت رشيها وصاحت.

_يبوو موتوني ابتليت زوجتكم مو مال نسوان فشلتوني وي العالم .

ضحك وهو يمرر أصابعه بين شعرة ويحجي بصوت خشن لكن نبرة صوته وحبه فاضحته ومفهوم قصده.

_ لايمه بعد تورطت اني مو مال أرجع  لو ابدل خليني متحمل لحد ماتفرج امري الى الله اتحمل واسكت احسلي بس ما اوصيكم اذا سمعتو دبجه فوك بعد أخوكم افزعولي .