التاريخ : السبت ٣ فبراير ٢٠١٨ م
المكان : مدينة الطرفية
الزمن : الساعة ٦ مساء
- يلا يا بيبي مع السلامة عشان داخلة البيت خلاص
- خليك شوية ضحويتي
- أنا ماشة من الموقف للبيت برجليني و ماركبت مواصلات عشان أتكلم معاك ، لكن بعد وصلت مابقدر أتكلم قدام ماما
- أوووف طيب يلا ، خلي بالك من نفسك و لمن تلقي فرصة كلميني
- أوكي ياقلبي يلا بااااي
فتحت الباب ودخلت براحة وهي خايفة ، ولمن وصلت غرفتها وبتفتح في الباب نطت لمن سمعت صوت نهرة :
- بت يا ضحى ، اتأخرتي وين؟؟
- مامتي عسولتي ازيوووو
و باستها من خدها و بعدين جضمتها وقالت :
- حنونة إنتي الواحد يطلع ويجي يلقاك زايدة حلا
حنان لزت ليها يدها وقالت :
- ما حتاكلي راسي بكلمتينك ديل ، اتأخرتي ليه؟؟
- ياماما كنت في الجامعة و بعد المحاضرة خلصت جوني صحباتي قمت قعدت اتونست معاهم شوية
- أولا صحباتك ديل كلمتك ألف مرة إني ما برتاح ليهم
- حنان إنتي طبيعي مابترتاحي لأي زول ههههههه
- وبعدين تعالي هنا ، الليلة السبت الوداك الجامعة شنو
- والله شغالة محاضرات يا ماما ولو مامصدقة بكرة أصور ليك الجدول
- المهم تاني مافي تأخير ، تخلصي وترجعي على طول مفهوم؟
- حااضر يا جميل ، الغدا شنو أنا جعانة مووت
- أخدي حمام و ارتاحي شوية مسافة سمير يجي
- ياااه على راجلك ده مابريدوو أصلي ، خلاص خليتووو مادايرة آكل زاتوو
- عيب يا بت ، ده في مقام أبوك
ضحى غمزت ليها وقالت :
- الفات والقبلو برضو كانو في مقام أبوي
حنان ضربتها وقالت :
- شكلي ماعرفت أربيك خشي من قدامي يلا
- ماتزعلي ياخ بمزح معاك و أهو كلو بفايدة ، كل مرة جايبة لي أخت تفقع مرارتي أنا...
حنان دنقرت كأنها حتشيل الشبشب و هي بتقول :
- يا كلبة غوري من هنا
- ههههههه عسسل لمن تعصبي
ضحى دخلت الغرفة و حنان بقت تتبسم و هي بتدعي في سرها الله يحفظ بناتها التلاتة أغلاهم و أكبرهم ضحى
...
..
مقر مباحث و أمن مدينة الطرفية
انتفض من مكانو ووقف باحترام ما يقلل من هيبتو :
- سعادتك جاي لغاية مكتبي بنفسك كنت ناديتني و أنا أجيك
- أقعد يا مجتبى
مجتبى قعد ، و اللواء رضوان قعد قدامو وقال :
- عملت شنو في قضية سرقة مجمع الدهب
مجتبى اتنحنح و قال :
- احممم... لسه سعادتك
- طيب التلاتة البتاجرو بالمخدرات
- اااه.. في الحقيقة برضو لسه
- اممم... مشغول بشنو يا مجتبى ، لأني عارفك ما بتقصر في شغلك ما لم يكون في الأهم ، و شايفك ليك كم يوم ما بتطلع من القسم إلا شوية وترجع
مجتبى سكت ، و اللواء قال وهو بستنتج :
- حريق مخزن عبدالكريم صح؟؟
- صح سعادتك
- مجتبى عندك فكرة المدينة دي سموها الطرفية لشنو؟
- لأنها في الطرف
- صح ، وعشان هي في الطرف معرضة للجرائم ، ونحن مهمتنا نكون مركزين و مفتحين عيوننا كويس
- أكيد طبعا ، و كمان من مسؤولياتنا مانخلي مجرم يفلت من العدالة و ده الأنا بعمل فيهو حاليا
- لا أبدا... إنت بتضيع في زمنك و زمني ، الحريق ده حسب تحرياتنا ما مدبر ، و أصحاب المخزن نفسهم قالو إنهم ماعندهم عداوة ولا شاكين في زول
مجتبى قال بحماس :
- يا حضرة اللواء إنت طبعا عارف عبدالكريم ده ولد منو
- ولد خالد عبدالكريم ، علم على نار
- و عارف إنو خالد كان من الناجين في حادثة حريق قطار الربيع
اللواء خبط المكتب وقال بنرفزة :
- تاااني حترجع لي لقطار الزفت ده؟؟؟؟ دي حاجة حصلت من ١٣ سنة و اتقفلت على إنها حادث غير مقصود
- لكن في شهود عيان قالو غير كده
- كلام الشهود ما بنفي إنها حادث ، و المحضر اتقفل على إنو الاتعمل كان حماية لباقي الناس ، و أصلا القضية ماتخصصنا و لا تابعة لمحليتنا
- يا سعادتك أفهمني بس ، أنا متأكد إنو في رابط بين.....
قاطعو وقال :
- مجتبى ، اعتبر نفسك في إجازة لمدة أسبوع ، وبعدها لمن ترجع ما أسمع سيرة الموضوع ده تاني ، واضح؟؟؟
...
..
في بيت حنان ، وتحديدا غرفة البنات :
- دانية قوومي من سريري بسرعة
- أبيت أبييييت ماقايمة ، مش أمس كنتي نايمة في سريري و ما سألتك
ضحى الكانت ماسكة دفترها وبتقرا ، قفلتو بزهج وقالت :
- ياخي أنا ماقادرة أقرا بسببكم
- كلميها تقوم لي من مكاني
ضحى قامت من سريرها وقالت لدلال العمرها ٧ سنوات :
- خلاص تعالي نومي في سريري ، و إنتي يا دانية عيب عليك تعملي راسك براسها لأنك ماقدرها
دانية اتقلبت على الجهة التانية بلا مبالاة و قالت :
- أنا مزاجي أنوم هنا قصاد المكيف
