التاريخ : الأحد ٤ فبراير ٢٠١٨ م
المكان : مقهى بمدينة الطرفية
الزمن : الساعة ١٠:٣٠ صباحا
مجتبى عاين في ساعتو ، ورجع عاين لشاشة تلفونو بقلق.. مواعيدو مع حسن فاتت ليها قريب نص ساعة و تلفونو مقفول ، زهج و فكر يقوم يمشي ليهو في القسم لكن تاني اتذكر اللواء رضوان لو شافو حيشك إنو لسه مصر على القضية دي ، لكن أخيرا حسن ظهر و قعد قدامو و أشر للجرسون طلب قهوة وبعد داك قال لمجتبى :
- مخزن عبدالكريم خالد عبدالكريم اتسرق
- اتسرق؟؟؟ متين ؟؟ والسرقو منو؟؟ وكيف اتسرق وهو أصلا محروق
- الكلام ده الليلة الفجر ، و الحريق ما كان أتلف كل البضاعة و السرق استغل إنو المخزن لسه ما اتصان كويس وفيهو فتحات ومداخل
- ده شي غريب
- الأغرب إنو في عبارة لقوها مكتوبة على حيطة المخزن (النار بالنار)
- يعني شنو؟؟
- مامعروف.. والأغرب كمان إنو السرق الحاجات ختاها في الميدان الغرب السوق ، يعني ما أخدها معاهو
- ده زول داير يوصل رسالة ياحسن
- بالضبط ، و الرسالة دي معناها أنا لو داير أدخل مخازن عبدالكريم بدخلها مع إني ما محتاج للفيهو ، المهم أنا جبت ليك أسماء الناس العندهم مصلحة يأذوا عبدالكريم ، و طبعا هم نفسهم بمثلو مشتبه فيهم في الحريق و السرقة...
الأول : اسمو صلاح الزين ، ده كان صديق شخصي لخالد عبدالكريم بحكم عملهم المشترك في السوق
التاني : ياسر عوض ، شاب ثري لعبنجي وبتاع نسوان و سكر و كلام فارغ ، تاجر معروف في السوق، ماعندو خلافات مع العيلة دي لكن يعتبر من أكبر منافسينهم
التالت : كمال حسنين ، ماعندو علاقة مباشرة بأسرة خالد عبدالكريم ، لكن هو شخص فاسد جدا و كل شي متوقع منو
مجتبى سحب منو الورقة الكان بقرا منها و طبقها دخلها في جيبو و قال :
- نحن نبدا من كمال حسنين ده
- يا مجتبى ما....
مجتبى قاطعو :
- حسن شكرا ليك..
وقام مشى خلاهو قبل مايلحق يقول شي.
.
.
في نفس اليوم بعد الضهر ، ضحى واقفة قدام البورد و قالت :
- الجدول ده مالو صعب كده و مافي قابات نهائي ، أنا كده ح أرسب أكيد
إسراء قالت :
- السمستر الفات قلتي نفس الكلام ده و جبتي معدل عالي
لجين كانت بتشرب عصير و بتلعب بالمصاصة و قالت بلا مبالاة :
- إنتو الاتنين ماعندكم برنامج ، ما قادرين تستمتعو بفترة الجامعة دي
ضحى فجأة مسكت لجين من كتفها و قالت بحماس و هي بتعاين بعيد :
- إنتي اللابس قميص رمادي مخطط داك مش محمد كمال؟
- ياهو ، ليه مالك
- عايني ، مش هو بقرا رياضيات و نحن التلاتة عندنا مشكلة رياضيات ، يعني ممكن يشرح لينا لو لقينا زول يكلمو لينا
لجين بقت تضحك و تقول :
- نحن التلاتة مقرراتنا حقت الرياضيات مختلفة من بعض ، و تاني شي إنتي شكلك عاجبك الولد ماقصة شرح ولا شي
ضحى ضحكت وقالت : ياخ كساااار عدييييل
إسراء استغربت وقالت : أول مرة أشوفك تعلقي على ولد ، وبعدين وينو حبيبك داك؟
- مالك دعوة بيهو
لجين بقت تضحك : هههههه والله مفتحة يا ضحوو ، يوم مافكرتي اخترتي أوجه ولد في الجامعة ، و ولد أغنى الأغنياء في البلد كمال حسنين هههههه طلعتي خطيرة يا صحبتي
- عندك زول بعرفو ؟؟
- سامي
- أووففف مافي غيرو؟؟؟
- مابعرف غيرو ، أكلمو ؟؟
- كلمي
.
.
في المساء ، في البيت :
- ضحى
- نعم يا دندوش
دانية دنقرت عشان ضحى ماتشوف دموعها لكن ضحى لاحظت ليها و رفعت ليها راسها وقالت بإنزعاج :
- مالك يابت
دانية قالت بحزن :
- اشتقت لبابا و نفسي أشوفو
ضحى ماقدرت تقاوم دموعها و ضمتها عليها وقالت :
- هو لمن يجي من السفر حيجي يشوفك
- لا ياضحى ماتغشي علي ، أنا عمري ١٣ سنة وماحصل شفتو غير تلاتة مرات و كلهم بالصدفة
ضحى بقت تمسح على شعرها وتقول :
- البعجبني فيك إنك فاهمة و سابقة سنك ، و مادايرة تعيشي نفسك في وهم وعارفة إنو ما حيجي عشانك ، لكن يا دانية إنتي قولي الحمدلله على الأقل أبوك عايش و عندك أمل تشوفيهو ، أما أنا......
وسكتت لأنو العبرة خنقتها ، و دانية مسحت دموعها وقالت : آسفة قلبت عليك لمواجع
.
.
بعد ٣ أيام :
الأربعاء ٧ فبراير ٢٠١٨ م
في بيت لجين عزام الشفيع
ضحى شالت تلفونها الكان بهز وهو صامت و براحة دخلتو في جيبها و قالت :
- لجين الحمام وين؟
- هدا قدامك ، حمام داخلي جوة الغرفة
- ااه مافي غيرو؟ لأنو إسراء جوة و أنا مزنوقة شدييييد
- ههههههه طيب أطلعي برة الغرفة على يدك اليمين
ضحى طلعت و قفلت وراها باب الغرفة و فتحت الخط و قالت بهمس و هي بتتلفت وراها :
- ألوو
- وينك ياخ مابتردي
- أنا مع لجين في بيتها
- أمك خلتك ؟؟
- ما كلمتها ، جيت الصباح وحنقعد نقرا لغاية ٣ بطلع أمشي البيت
- ضحى ٣ شوكة تطلعي فاهمة؟؟
- حاااضر
وواصلت وهي بتتلفت حوالينها وتعاين فوق :
- ياخ الناس ديل عايشين في جنة عديل ، إنت عارف إنو الغرفة الوحدة عندهم أكبر من بيتنا كلو
- بطلي الكلام الفارغ ده و ركزي في الحاجة الجيتي عشانها
قالت وهي لسه منططة عيونها بعد ما مدت يدها و فتحت باب الحمام :
- وااااااااو ده حمام لا لا لا مستحيييل
- بت ياضحى
- أوووف طيب طيب خلاص ، يلا باي
- بالتوفيق حبيبتي
.
.
الساعة ٣:٠٧ مساء
بناء على الخبر العاجل الوصل الان اتحركت قوة أمنية بقيادة حسن على بوكس تابع للمباحث ، و خلال أقل من ١٠ دقائق كانوا داخلين بشارع بيت عزام الشفيع.... في نفس اللحظات دي ظهرت عربية المطافي داخلة من شارع تاني
حسن انتبه إنو في ولد كان واقف في نص الشارع وخاتي يدينو في راسو وهو بعاين للبيت و براقب الحريق المنبعث من الطابق الثاني ، وأول ما شاف عربية الشرطة طوالي جرى على عربيتو الكانت واقفة في الجهة التانية ، لكن الشرطة كانت أسرع منو و مسكتو في آخر لحظة قبل ما يهرب ، و هو بقى يصرخ ويقول : فكوني إنتو ماعارفين أنا منووو؟؟ والله أوديكم في داهية كلكم لابعرف شرطة لاغيرو. أنا ولد كمال حسنين.... فكوووني حاااالا
.
.
الجريمة الكاملة ، بقلمي : رحمات صالح
تابعوني..... لكم مني كل الود
