هحبك من تاني بقلم / انوشه

الفصل الاول

بعد منتصف الليل و داخل قصر كبير يسوده الظلام و الهدوء تتحرك فتاه ترتدي بنطلون اسود و جاكيت اسود و تغطي شعرها المعقوس تحت طقيه الجاكيت التي تخفي نصف وجهها تقريبا تتحرك بخفه و هدوء حتي لا ينتبه لها أحد و هي تحمل حقيبتها علي ظهرها يتبعها سيده كبيره في العمر قد تعدت الخمسين عام حتي خرجت من باب المطبخ بهدوء و التفتت لها .
السيده الكبيره بصوت منخفض: ها يا بنتي هتروحي علي فين يا فرح .
فرح بهدوء : لازم امشي يا داده انت عارفه هما ناويين على ايه معايا مش هقدر احمي نفسي دلوقتي .
داده حليمه ببكاء : علي عيني يا بنتي تخرجي دلوقتي و لوحدك
فرح : خلاص يا داده كلها كام شهر و ارجع و اقدر اقف قدامهم كلهم .
داده حليمه: طيب هتروحي فين .
فرح : مش لازم تعرفي علشان اكيد هيضغطوا عليكي علشان يعرفوا انا فين خلي بالك من نفسك بس انت و عم محمد .
داده حليمه: طيب خدي الفلوس دي .
فرح : لا معايا و اخدت كمان عقد ماما علشان طنط ألفت ماتخدهوش ادعيلي انت بس .
داده حليمه: دعيالك يا بنتي ربنا يستر طريقك و يردك ليا سالمه غانمه.
احتضنتها فرح بدموع فهي التي ربتها بعد موت والدتها هي و ياسين ابن عمها و تركتها و تسللت خارج القصر .
داده حليمه من داخل القصر : ربنا ينتقم من اللي كان السبب و يحفظك يا حبيبتي يارب. و تحركت بهدوء حتي تعود لغرفتها.

خرجت فرح بهدوء متسلله حتي وصلت لبيت صديقتها ساره التي يبعد عده بيوت وجدتها تنتظرها بقلق بادي احتضنتها فرح و بدأت في الكلام .
فرح بقلق : عملتي ايه يا ساره طمنيني .
ساره : كله تمام جهزت مكان تقدري تبقي فيه لغايه أما تتمي الواحد و عشرين سنة و ماتخافيش مكان ماحدش يقدر يوصلك فيه .
فرح : طيب فين و اقدر امشي امتي.
ساره : طبعا انت عارفه انك ماتقدريش تسافري بره البلد لأن عمك و الزفت التاني هيوصلوا ليكي في اسرع وقت فأنا جهزت مكان جوه مصر عند ولاد عمي زي ما قولتلك في الأقصر هتقعدي هناك و تشتغلي و انا كلمت فارس ابن عمي و هو هيشوفلك شغل هناك و ماخلتش حد يعرف هويتك ولا انت بنت مين علشان تكوني في أمان و اوعي تعرفي حد انت مين لحد لما تسيبي المكان هناك .
فرح بدموع : انت متأكده من المكان ده انا خايفه اوي يا ساره .
ساره بقلق : متأكده بس انا قولتلك نقول لفريد
و هو هيقدر يوقفهم عند حدهم .
فرح بسرعه: لا فريد من ساعه ما بابا تعب و هم الشغل كله فوق دماغه و كمل عليه المصيبه اللي حصلت في شغل ألمانيا و اللي خلته حتي مايقدرش ينزل يحضر جنازه بابا و غير كده مش عايزه اخليه يقف قصاد عمي ده ابوه و كفايه المشاكل اللي بنهم .

ملحوظه هنا :فريد يبقي ابن عم فرح و متربي معاها أخوها في الرضاعه كمان لأن امه ماتت بعد ولادته بشهور بسيطه و بعدها اتجوز ابوه منصور ألفت اللي كانت أسوء مرات اب في الدنيا فانتقل فريد لعند عمه صلاح اللي كان مراته لسه مخلفه فرح و أتربوا مع بعض و بعدها بفتره ماتت أم فرح لتظل فرح و فريد يحظون برعايه صلاح حتي أصبحا شابين لكل منهما دراسته و اهتماماته و لكنهما لم ينفصلا ابدا.