زهراء ،،،قصتي قصة احتمال تكون خيالية وبعيدة عن واقعكم لكن صدقوني تحدث حالات اتعس وامر من حالي
بدأت قصتي بناحية من نواحي الجنوب من منطقة صحراوية
اني اكبر اخوتي وعندي اخت اصغر مني بسنة واخ عمرة 3 سنين والثاني عمرة 3 اشهر باللفة يرضع
بأحداث 2003 جانت الاوضاع مو زينة والطيران يقصف مرات عشوائي
اتذكر جنت بالاول ابتدائي عمري 6 سنين وبالدوام صار قصف قوي خفنا شوي بس متعودين كملنا دروسنا اجتى المعلمة مالتنة وجانت كلش تحبني وخلت ايدها على راسي وكعدت كدامي وكالت زهراء بابا وماما صعدوا للسماء وعيونها تدمع باوعت للسماء ومافهمت كلت ست شلون صعدوا وليش مااخذوني وياهم حضنتني بدون متجاوب
رجعنة اني وصديقاتي نتمشى ونسولف وماخليت بالي الي كالتة المعلمة وصلنة لمنطقتنة وجانوا ناس كومة وبيتنة مقصوف وواكع للأرض قاصفتة الطيارة جنت ماافهم شنو موت ماافهم شنو فقدان اخذوني لبيت عمي الي هو شيخ عشيرتنة صارت الفاتحة هناك جنت اشوف العالم تبجي والنسوان تخمش بوجهة بس مااعرف ليش وشنو السبب
اجوي كل كرايبنة وجنت احب العب وياهم وكت اللعب اظل العب وياهم وانسى حتى اهلي بس جنت من اكعد وحدي او احط راسي على المخدة احن لأخوية واختي الصغار الي ماتوا مع امي وابوية وجانت كل وحدة من جوارينة واقاربنة من يشوفوني ابجي واحن الهم يكولولي عذر شكل وابجي شوي واسكت
والكل جان يعاملني بحنية ويستخطوني يمكن من رحمة رب العالمين انه مجنت افهم شنو موت وشنو فقدان
مرت الايام وخلصت الفاتحة عمي الشيخ جان ذهب وحنين عاملني وعبالك بنتة ولو ابوية عايش ميدللني بكدة
رب العالمين مارزقة ببنية بس 3 ولد جانت زوجة عمي بالبداية دكول رب العالمين مانطاني بنية وعوضني بزهراء وجانت زينة نوعا ما معاملتها
كمت احن لأهلي وماابطل سؤال عنهم خاصة من بعد ما خفت العالم وظليت وحدي ومامتعودة العب مع ولد جان غزوان ابنهم الكبير اكبر مني بخمس سنوات وزيد بكدي وزيدان اصغر مني جان غزوان بحالة ميلعب ولا يختلط قليل بس يدرس
جنت العب مع زيد وزيدون جان زيد عصبي وميحب البنات ودائما يضربني ويكلي لتجين تلعبين ويانا
زوجة عمي كامت تطلعني وياها وين متروح ودكول للعالم هاي بنيتي وتشتريلي وتكشخ بية
كملت الاول وطلعت اولى وزيد مثلي هم بالاول طلع راسب وعمي ضربة وكلة شوف زهراء مو بكدك وطلعت اولى البنية احسن منك حبس نفسة زيد بالغرفة وزعل
اني جنت فرحانة بنتيجتي واشوف العشرات وشايلة طوك وقراصات الي انطتني اياها المعلمة هدية وفرحانة بيها غزوان جان سادس ابتدائي وميطلع كومة يظل يقرأ بيومها من نمت خليت النتيجة مالتي والهدية يم راسي كعدت الصبح لكت النتيجة مشككة بجيت كومة جان عبالي انه اذا تشككت يعني ماراح اروح للثاني وماكو اثبات اني نجحت
ظلوا يقنعون بية ويسكتوني اتذكر لاول مرة جان يحاجيني غزوان كلي اني اروح لمعلمتج للبيت تسويلج بطاقة ثانية زوجة عمي كالت اسكتي وراح اشتريلج هدية نجاحج جنت اناديها يمة
وفعلا اجوي الغجر بوكتها جانوا اكو غجر يفترون على البيوت وهمة متنقلين ميستقرون بمكان يقرون الكف ويبصرون ويبيعون ويشترون من الناس جانن بناتهم حلوات بس لبسهم فاضح وجانن يركصن بخيمهم ويسوون سهرات وتعاليل والعالم تكيف يمهم
اتذكر شفت بناتهم شلون حلوات وشلون مخليات مكياج كتلها يمة اريد اصير مثلهن
زوجة عمي لا يوم الله يستر عليج ويسلمج منهن ومن امثالهن اشترتلي تراجي ذهب ولبستها الي شكد فرحت بيومها وكل شوي اباوع لنفسي بالمرايا علمتني زوجة عمي وجنت اساعدها بأي شي
كمت سنة عن سنة افهم واوعى لوضعي وللي صار وياية كمت احن لأهلي ومن يصير شي وياية ابجي اريد امي وابوية
مرة جنت انظف غرفة الولد ولكت نستلة فتحتها واكلتها اجة زيد وكلي شلون تمدين ايدج على كلشي تلكي ضربني وغزوان جرني من ايدة وتضاربم بيناتهم
بيومها انهزمت لبيت اهلي وكعدت على الانقاض جنت اتمنى يرجع بيتنا مثل قبل ويرجعون امي وابوي واخوتي وبجيت من كل كلبي جانوا كالبين الدنيا عليه واجوني للبيت ولكوني كاعدة على الانقاض اخذني عمي وجان غزوان وياه كلي عمي شلون تطلعين من البيت ومدكولين لاحد ظل بالنا عليج لتعيديها ابد عمي الوضع مو زين والدنيا مو حلوة
زهراء،،،عمي مااريد ارجع يمكم اريد اروح لأهلي
باوعلي بحسرة عمي وكال احنة اهلج يابة وزيد بعد ميتعرضلج واذا تعرضلج غزوان يدافعلج
غزوان ،،،اي يابة اني مااخلي احد يضربها ولو كايلتلي تريد نستلة اني انطيها بس لتطلب وتحتك بزيد
جان عمي يباوع ع غزوان ويبتسم
من رجعت زوجة عمي جانت زعلانة مني وكالت شلون تطلعين بلا مدكوليلي كتلها يمة مااعيدها ابد
فعلا بعد مااحتك بزيد ولا هو يحاجيني
عدت سنة على سنة جانت زوجة عمي متخلي شي متجيبلي وعلمتني على كلشي
نجحت على الخامس ابتدائي بوكتها جان غزوان ثالث متوسط بكلويا وتتأخر امتحاناتة
جنت شنو اريد وشنو اطلب ميكولي لا وجنت حاسبتة اخوي من امي وابوي
بأمتحاناتة جنت اكعد من الصبح واسويلة ريوك لان امي جانت تكعد من الصبح تخبز على الطين خبز حار واخليلة الريوك ويتريك ويطلع جانت زوجة عمي تدعيلة وبكلبي اكول امين يارب
زهراء،،نجح غزوان وفرحنا كلنا بنجاحة لان طلع الاول على المتوسطة الموجود بالناحية مالتنة
واني نجحت للسادس جان غزوان ثكيل وميتواجد بالبيت واذا تواجد ميطلع يظل بغرفتهم وزيد ميحترم ولا يستحي من احد جنت مااحب زيد وحذرة منة واخاف لان شراني واي زلة مني يضربني بس اذا غزوان او عمي موجود ميسطر يتمادة عليه وزيدون جان فقير وطيب جان عدهم ابن خالة بكد زيدون بس منغولي خطية جنت اني وصغيرة اخاف منة بس بعدين تعودت عليه جان طيب وعبالك طفل صغير جنة نلعب سوة ومن يجي احسة عبالك اخوية الصغير اوكلة والعب وياه واستخطي احسة طير من طيور الجنة
وبمرة من المرات جنت امسح بالبيت وبطني كامت توجعني كملت تنظيف بعدين طبيت للحمام شفت بملابسي دم خفت طلعت على زوجة عمي احجيلها
زوجة عمي انصدمت وتغير وجهة ورزلتني وكالت روحي عن وجهي وكعدي بغرفتج رحت للغرفة وكمت ابجي وكلت شبيها اول مرة هيج تحاجيني
زوجة العم،،،صخام بوجهج نجاة معقولة بلغت شبسرعة بعدهي صغيرة سودة عليه عطت بوجهة هية شعليها اووف ياضيم كلبي شبت البنية وصار حملها اكبر
زهراء،،،اجتي زوجة عمي طيبت خاطري وفهمتني ونبهتني بعد ماالعب مثل قبل ومااطلع يم الولد كمت اتحجب بالبيت وكرهت نفسي بفترتها صرت انعزالية
زوجة العم،،،ياشيخ هاي بنت اخوك بلغت ترة
العم،،،اي خير وبركة قابل مانعرف بيوم من الايام راح تبلغ وتشب وتصير عروس
زوجة العم ،،،شلون هالحجي شيخ وانت عندك 3 شباب وهاي تفتر بوسطهم تريد تكسر ظهرنا تالي هالعمر
الشيخ ،،،البنية فقيرة وانتي وياها وياها لتتركيها وظلي علميها وحذريها وان شاء الله ماكو الا الخير
