17
زينة،،،حبيتة لدرجة كمت اسمع كلامة اكثر من زيد
جنت اكره الحجية وبمدي اخنكها بأيدي وكرهت زيد وتمنيت اتخلص من الجنين وفعلا كمت اشيل اشاء ثكيلة حتى اجهض ومن اجهضتة فهمت زيد انه الحجية دتعبني بشغل البيت وخلتني اجهض زاد كره زيد لأمة وهو من الاصل تعاملة تعبان معها
تمنيت لو بس تموت واخلص منها ومرة من المرات خليت صابون ومي على باب غرفتها ورحت لغرفتي ورة شوي سمعت عيطتها وجنت مستمتعة بصراخها وونتها كانت تبجي وتون من الوجع وتستغيث وقبل ليجي زيد بشوي رحتلها وكلت خوما بيج شي حجية
الحجية ،،،وج زينة اتصلي بزيد او غزوان وكعت وبعد مكدر اتحرك وتبجي
زينة. ،،،لا مابيج شي غزالة ماشاء الله وجنت مستمتعة وهي تستنجد بية واني دأكل تفاح ومن اجة زيد كعدت يمها حاولت اكومها وناديتلة اجة زيد واخذناها للمستشفى وخليت نفسي خايفة عليها كالوا صاير عدها كسر بالحوض وبسبب عمرها يتأخر يلا يلحم
جان غزوان متأثر على امة كلش
من طلعناها من المستشفى صارت مشاكل واتهمتني الحجية انه اني الي زحلكتها وشجاب الصابون عند بابها وانه من تزحلكت جانت تناديني وماجيتها دافعلي زيد وصارت مشكلة واخذني ورحنة للمدينة اجرلي بيت هناك جنت مو حابة اطلع من بيت الشيخ وتعلقت بي وحبيتة وحبيت رجولتة
غزوان،،،كمت ابات يم الحجية واداريها جانت تبجي ومتأثرة بالي صار وياها همستلها يمة هية مسألة وقت وترجعين مثل قبل واحسن لتبجين يمة ان شاء الله دكومين بالسلامة
الحجية،،،اووووف ياغزوان الي شفتة من زينة علمني ان الله حق وكما عملتم تلتقون هاي حوبة زهراء والي شافتة مني
غزوان،،،بأستغراب شجاب زهراء بالموضوع يمة
الحجية،،،غزوان اني جنت السبب بهروب زهراء وهية طفلة مراهقة بعمر 15 سنة متعرف شي بهل حياة ولا تميز الصح من الغلط جنت انت مو هنا بوكتها وحاولت اجبرها تتزوج فؤاد صح الشيخ رفض بوكتها بس هية جانت فاهمة انه راح اقنعة فخافت وشردت وتبجي
غزوان،،،كعدت بالكاع كبالها وهمست ليش يمة؟؟؟ ليش كل هذا شنو سوتلج البنية حتى هيج تطفشيها
ليش يمة حرمتيني منها جانت حب عمري ومن فتحت عيوني للدنيا واني مااعرف شنو بنت وشنو انوثة الا زهراء
الحجية ،،،،اوووف ياغزوان غيرة نسوان انعمى على كلبي من حسيت اكو علاقة بينكم من وراية وانها كدرت تاخذ قلبك ومحبة الشيخ مجنت افهم انها اخذت قلوبكم بطيبتها وحنانها بالرغم حملناها المسؤولية على صغر سنها وتعبت ويانا بس ماعرفت قيمتها الا من خسرناها
غزوان،،،دمعت عيني يمة مصدوم بالي دأسمعة منج انتي تعرفين شنو سويتي يتيمة وجانت متربية تحت جناحج وماالها بالدنيا الا احنا (اما اليتيم فلا تقهر)
يمة اني مقهور عليج مو منج كون ربي يغفرلج ويسامحج على اذية هاليتيمة الي منعرها عايشة ولا ميتة بأرض ولا بسما جانت امي تبجي بحركة وتأنيب الضمير مأذيها عفتها ترتاح وطلعت كعدت بالمضيف واني تعبان ومخنوك ضيعت حب عمري ومجنت على وعدي وياها تمنيت لو يرجع بية الزمن ليورة الا اتزوجها واني ابن 15 لو ترهم
حسيت الله سلط زينة على امي حتى تعرف ان الله حق ويمهل ولا يهمل ولو بعد سنين بس بعديش بعد ماضعنا وتطشرنا كان الدرس قاسي وحوبة هاليتيمة متعدتهم
بس ظلت غصة بكلبي انه اشوف زهراء او الكالها طريق
جبت لأمي العاملة الي جانت يمي بالمضيف داريها بالنهار واني بالليل يمها وجانت خالتي تروح وتجي عليها والجوارين هم
ام فضة،،،شكد مالحت علية زهراء حتى اروح اطمن على غزوان رحتلة للمضيف وبحجة اقرالة الكف
غزوان،،،دخلت لمكتبي وارتبكت كتلها ام فضة تعالي للديوان اخاف يجوني ناس
ام فضة،،،بعد متبين عدنا كلت المزيون ميجينا احنا نجيلة ونقرالة الكف
غزوان،،،،ضحكت ام فضة اني مااؤمن بهل خرافات كذب المنجمون ولو صدقوا
ام فضة،،،عفية عليك بس اعتبرها لعبة تسلية احتمال افتحلك عيونك على اشياء غافل عنها والحجي اذا ماعجبك انسى الموضوع ولا كأنه صاير
غزوان،،،ابتسمت وكتلها قنعتيني شالت كومة احجار كريمة ملونة وخلتها بأيدي وفرشت قطعة قماشة كلتلي اشمرها شمرتها ورتبتها وهية فاتحة ايدي وعين على الاحجار وعين على ايدي
ام فضة،،،همدتك بهماد ورشيتك برماد خيرك بين عينيك وشرك بين جنبيك وبعون الله انت خيالها وهية تصعد عليك
غزوان،،،هية منو ؟؟
ام فضة،،،طيبة السريرة وصاحبة ظفيرة لاهي بيضة ولا هي سميرة ولاهي طويلة ولا هي قصيرة
غزوان ،،،اتجيت على ايدي الثانية وصفنت بكلامها
ام فضة،،،وجعك وجعها ونارك نارها انظلمتوا وظلامكم منكم وفيكم
مزيونتك تنتظرك وقلبها يمك وخايفة منك وعليك وتحاول تهرب منك عليك
غزوان،،،همست بعجلة وينها وين الكاها
