27
للحجية وانه يتأخر يومين اني ظل بالي عليه بس مكدرت احجي شي
غزوان،،،جان زيد بالمستشفى وكالوا الجيران سمعوا صوت اطلاق نار ورة نص ساعة دخلولة وشافوه غركان بدمة جان مصوب بصدرة وكالوا الحمدلله عبر مرحلة الخطر ووضعة مستقر سمحولي بزيارتة
بوستة من راسة وكتفة وجان يبجي وحالتة حالة
غزوان،،،منو الي ضربك زيد وشعندة وياك
زيد ،،،اوووف غزوان اخوك انداس تحت الرجلين من زمان
غزوان،،،ماعاش الي يدوسك ان شاء الله دومك مرفوع الراس احجيلي ياخوي
زيد،،،غزوان من اخذتها وهية صاحبة علاقات وحبيتها صدك وجنت متصور راح توب اكتشفت اكثر من مرة خيانتها وسامحتها لان احبها صار عندي ضعف وبصعوبة كمت ادبرها وكل شهر مرة كرهتني وكرهتني بعيشتي
غزوان،،،دنكت وكلبي انعصر من الي دأسمعة منة
زيد ،،،انهار وبدء يبجي اكثر غزوان لكتها مع عشيقها بفراشي وصوبني وانهزمت وياه
غزوان،،،دمعت عيني واني مصدوم بالي دأسمعة واقشعر جسمي همست والله جنت متوقع هيج نهايتك ونصحتك ياخوي والحجية جانت تنصحك وماسمعت من عدنة وسويت الي براسك
بست راسة وحضنتة وماعندي اي كلمات ممكن تواسي حالة
همست حسبي الله ونعم الوكيل زيودي متستاهل الي صارلك
زيد لاوالله يااخوي استاهل وربك يمهل ولايهمل هاي حوبة اليتيمة الي اتهمتها بشرفها واني ابن عمها واعرفها بريئة طلعت حجي عنها اشكال وحجيت للشيخ الله يرحمة عنها جذب وصحيح الى ان انجلط بحسرتها ويبجي
مجنت اعرف انه هذا قذف محصنات وعقابة عظيم عند رب العالمين الله يشهد كل هالسنين جان تأنيب الضمير يكتلني وبيوم الي شفتها خفت منها اي والله خفت منها يتيمة وشأنها عند رب العالمين عظيم وجنت افكر انه لو بيومها لازمها وبطيشي ورعونتي كاتلها وهي مظلومة وبريئة جان شلون عشت وشنو حالي ودمها بركبتي يكفي اني السبب بوفاة الشيخ ربك يمهل ولا يهمل لو بعد سنين اجتني زينة وانطتنة درس اني وامك مننساه للموت وعلمتنة ان الله حق
غزوان،،،جنت صافن بحجية جان منهار ويحجي عفتة وطلعت بدون مااحجي اي كلمة والي بي كافيه
ظليت يمة اسبوع الى ان استقر وضعة وكدرت اطلعة من المستشفى
زهراء،،،طلعوه لزيد واستقبلناه بالذبايح والهلاهل بس جان مكسور ونفسيتة تعبانة وميحجي مع احد ولا يختلط بينة ورة شهر كمت ادوخ وصارت تلعب نفسي كالولي حامل وفرحنة كلش جنة محتاجين لهيج فرحة بس تفاجأنة بخبر سفر زيد قرر يهاجر برة العراق وجان مصر على قرارة ودعناه وكلوبنا معصورة على فراكة وحالتة هالحالة استسمح مني قبل ليسافر وباسني من راسي بجيت من كل كلبي وجنت مشايلة عليه ابد واتمنى ربي يفرج عنة ويبقى بيناتنة لخاطر الحجية على الاقل بس جان مقتنع بالهجرة
غزوان،،،كامت تكبر بطن زهراء وجنت بين شغلي وسفري اتفاجأ بيها كل فترة شلون متغيرة جانت تعبانة بأشهرها الاخيرة
زهراء،،،جان يساعدني غزوان اذا اكون وحدي بس يهوسلي المطبخ وجانت امي تتمنى اجيب درزن بنات وتظل دكول الي ماعندة بنية مايشبع المية
وتظل دكلي اوف بنيتي والله الچنة بالبيت جنة
جان غزوان يكول ها يمة مسويات حزب ونضحك اتذكر بيوم ولادتي فجأة طك مي الراس اني ونايمة بالليل وخفت لان مجان اكو وجع وبدأ يزيد الوجع جنت مااعرف شنو اسوي او شنو الولادة
جنت اصرخ واجر بغزوان مااريدة يفاركني
غزوان،،،اول مرة بحياتي اشوف زهراء بهيج حالة خفت كلش ومجنت اعرف شأسوي جنت اسأل بأمي يمة ليش هيج زهراء تصرخ جنت خايف اخسرها
الحجية،،،غزوان جان وجهة اصفر وينطي الوان همست يمة هي هاي الولادة خابرنة على ام فؤاد وجابت القابلة وياها
وغزوان جان حاضنها وزهراء خرمشتة ولعبت فنة بالولد
غزوان،،،اجتي القابلة وطلعوني بس كلبي ظل يمها
زهراء،،،جنت اصرخ يدخلولي غزوان ويكولولي ميصير وليدي غير اذا يشوفج تولدين كدامة لا ينشده شدهة عمرة
غزوان،،،جنت برة والوب واني اسمعها تصرخ غزوان او اسمعها تريد امها جانت دمعتي بطرف عيني وادعي من رب العالمين انه دكوم بالسلامة باوعت لفؤاد يبجي ويشهك بالبجي ويحجي عليه ويكول كلة من غزوان
