14
غزوان ،،،انتظرت ربع ساعة بس جنت كاعد على جمر وانتظر دخلت ام فضة ولمحت اكو وحدة بظهرها دتمشي غمضت ودنكت
ام فضة،،،كان متربع والمشروب كدامة وجان الظاهر ديشرب والسلاح كدامة اشرلي اطلع ترددت اطلع بس خفت وطلعت
غزوان،،،جان صوت الموسيقى والاغاني عالي يوصل الى يمي استغربت من البنت اخذت راحتها وماخافت مني ولا تلبكت من شافتني واخذت راحتها وانطلقت بالرقص ذهلني الموقف جانت لابسة نفس الكلابية السودة واباوع لرجلها نفس الشامة ووجهة مغطى وبس عيونها مكشوفة جنت اباوعلها بغضب ومابطلت شرب
ام فضة،،،رحت للخيمة الي بيها زهراء دخلت عليها
زهراء،،،وكفت ها يمة شصار
ام فضة،،،دخلت البنت الي لبسناها لبسج وخلينالها نفس شامتج بس مااعرف شصار اشرلي اطلع وطلعت
زهراء،،يايمة انتي عندتي وطلعتي هالفكرة حرام البنت لاتروح بيها ويقتلها وتصير خطاتها بركبتي
ام فضة،،،ماراح يقتلها غزوان شايل سلاحة بس ماراح يضرب بي الا كبريائة الي ديكابر بي على حبة وشوقة الج عيونة مليانة حنين وشوق ولهفة مستحيل يتجرأ يأذي الي يحبها
زهراء،،،لعد ليش ما خليتيني اطلعلة يمة
ام فضة،،،مااجازف بيج اذا ماكتلج فراح ياخذج من هني وميخليج لحظة يمي ومااعرف شنو راح يطلع منة ساعتها اريدة يكطع نفس من هني وميخطينا بعد
زهراء،،،دنكت وكلامها اذاني
غزوان،،،كانت البنت جريئة ورقصها جريئ زادت النار بية وخلتني اعصب اكثر كمت وجريتها من شعرها خافت وكامت تصرخ شمرتها بالكاع وخليت السلاح على راسها كانت تتكلم بلهجة بدوية جريت الي كانت حاطتة على وجهة وانصدمت كانت ترجف وخايفة كعدت على رجلي مصدوم ودمعي بدء يصب على خدي تمنيت تكون هية واشوفها وابرد نار قلبي المتلهف لشوفتها
زهراء،،،دخلت البنية ترجف وخايفة وتصرخ على ام فضة شلون دخلوني على واحد مجنون حط سلاحة براسي شمرت الكلابية علينة وطلعت
زهراء،،،كتلها يمة الله عليج طمنيني عنة روحي شوفي شحالة هسة غزوان
ام فضة،،،ان شاء الله بس ديري بالج تطلعين
رحت وجانت سيارتة بعدها تقربت من خيمتة وجان صوتة ديبجي تألمت على منظرة ومجنت اريد ادخل ويحسني شفت دمعاتة وينحرج كلت سبحان الله كل جبروتك قبل ساعة وقساوتك وغضبك وشلون جنت تهددني وعيونك تنكط شر وملامح وجهك الحادة شلون هيج انقلبت طفل وتون بالبجي رجعت بدون ماادخل
زهراء،،،كعدت ام فضة بدون متحجي وجانت مقهورة همست راح غزوان
ام فضة،،،لا بعدة
زهراء،،، ليش ماراح يمة شبي غزوان بس لا رجع يشرب!!!
ام فضة،،،بس يشرب انهار وديبجي مثل الطفل ولا جنة ذاك الشيخ وبكل هيبتة وجبروتة والقساوة الي جان يكلمني بيها هسة منهار ويبجي مكدرت ادخل عليه
كامت تبجي زهراء وحضنت رجلها وخلت راسها عليها
واني جنت على اعصابي ومنتظرة يمتة يروح ويفك عنة دزوا علية يريدوني لان ماكعدت ولا حضرت السهرة اليوم طبطبت على ظهر زهراء وكمت رحت للسهرة كعدت بس مامرتاحة وبالي مشغول
زهراء،،،ورة ماراحت ام فضة ظليت ابجي وكلبي وجعني على غزوان والي اجاه من تحت راسي شكد جانت دمعاتة غالية ومابحياتي شايفتة يبجي من جان صغير لعد شكد مجروح وواصل لدرجة بعد ميتحمل ورة نص ساعة طلعت برة اشتم الهوى وروحي اختنكت شفت سيارتة تقدمت عليها وكمت امشي للخيمة الي هو بيها بخطوات ثكيلة باوعت من جهة جان ممدد ورايح من الشرب ميعرف الدنيا تشرق ولا تغرب تقربت منة
غزوان،،،بجيت من كل قلبي حسيت طلعت كبت هالسنين وضيم كلبي شربت الى ان ضيعت وبعد مااحس بروحي فجأة كعدت كدامي زهراء حسيت نفسي ضيعت وكمت اتخيلها بكل الوجوه
زهراء،،،جان تعبان وعركان ودموعة غاسلة وجهة كعدت يمة وخليت راسة بحضني ومسحت دموعة بأيدي بس جانت دموعي دنزل على وجهة
همسلي بصوت تعبان كوة يطلع،،،زهراء!!!
زهراء،،،دنكت عليه وبستة من كصتة وهمست بأذنة روح وقلب ودنيا زهراء
