16
زيد ،،،اي تزوجتها وهسة بالطريق جايين للقرية افرحولي ولتنغصون علية فرحتي واتمنى اشوفك ببيت الشيخ وتستقبلنة
غزوان،،،همست ان شاء الله مع السلامة ميار الشمري
وشمرت الجهاز وكعدت
الحجية ،،،بس لا تزوجها
غزوان،،،يمة صارت على ذمتة وميفيد الحجي بعد جايبها وجاي ومياخذ حجي وكل واحد يتعلم من جيسة
غزوان،،،امي كامت تبجي كعدت يم رجلها وهمست يمة ليش هيج احنة ماعدنا حظ
جانت دموع امي تنزل على خدي
وكالت يمة اني سبب بتعاستكم واكو حوبة متعدتني وراح تحركني وتحرك كلشي احبة بالحياة
غزوان،،،كمت ومسحت دموعها وبست راسها وخليتة على كتفي لا يمة لدكولين هيج انتي الخير والبركة لتغثين نفسج هذا كلة يطلع على صحتج
الحجية ،،،غزوان يمة الله يرضى عنك صار وكت الي تنور بيت الشيخ وتلزمة وتكون الك كلمتك اني ضاعت مني الامور ولازم يرجع بيت الشيخ مثل قبل واحسن
غزوان،،،صعب يمة الي ذكريات مرة بهذا البيت مكدر ادخلة من جديد
الحجية،،،غزوان الله يرضا عنك على الاقل بس ايام الي تتواجد بيها بالقرية اني تعبت وانت هم لازم تفكر تزوج اريد افرح بيك
غزوان،،،لا يمة احتمال اجي للبيت ازوركم بس مكدر ارجع اعيش بي وبالنسبة لفكرة الزواج شيليها من بالج نهائيا اني ماالي قسمة بالزواج
الحجية ،،،خليت ايدي على خدة مانسيتها ؟
غزوان،،،دنكت وهمست هية منو يمة شدتسولفين
الحجية ،،،لزهراء
غزوان،،،باوعتلها وكامت تبجي بحركة همست يمة زهراء ماتت وانتهت بالنسبة الي
الحجية،،،خليت ايدي على حلكي واشتعلت بنار الندم اكثر جنت خايفة لا اخذ بثارة غزوان وكتلها
غزوان،،،حاولت اقفل على الموضوع واتهرب من عيونها كلت يلا يمة خلي اغير ملابسي وحتى نروح لبيت الشيخ نستقبل هذا الطايش هو ومرتة ونحضر الذبايح
الحجية،،،وتريد تذبحلة هم !!
غزوان،،،لعد مو اخوية يمة ويظل ابن الشيخ يصير يزوج هيج على الصامت لازم نسويلة عرس وهوسة هو الواحد كم مرة يتزوج بالعمر
الحجية ،،،بس ياغزوان....
غزوان،،،يمة هو الي اختار هو راح يتحمل نتيجة اختيارة والي علينة لازم نسويه خلينا نتصرف طبيعي على الاقل كدام العالم
الحجية،،،مااقتنعت بحجي غزوان بس فرحت انه اذا بزواج زيد ممكن غزوان يرجع يدخل بيت الشيخ فراح اتقبل اي شي يسويه
غزوان،،،اخذت الشباب والعاملة الي عدنا بالمضيف والحجية ورحنة للبيت دخلوا كلهم كدامي من دخلت حسيت احاسيس جانت ميتة بداخلي بكل ركن وبكل زاوية بهل بيت جانت الي بيها ذكريات مو ذكرى وحدة من زيدون على الشيخ على زهراء واجمل ايام عدت عليه اووووه خمس سنين وعبالك البارحة مامتغير شي بالبيت بس مابي حياة ميت حالة حال قلبي
بدأت العاملة تساعد امي وجانت امي تعبانة كوة تشيل نفسها اجتي خالتي ام فؤاد وجنت صارلي زمان مشايفها حضنتني وبجت
صارت عيني على فؤاد وتذكرت مراهقتي وغيرتي منة على زهراء من شافني فؤاد دار وجهة وعبالك شايل بكلبة علية لحد هسة اني اخذت زهراء منة
ضحكت استهزاء على تفاهة الدنيا وسخرية الاقدار
حضرنا الذبايح وخابرت زيد وفرح من حسنا انه فرحانين لفرحة وصل وسوينالة عرس بسيط بحكم انه صار مفاجئ وبأستعجال بالليل عفتهم ورجعت للمضيف مكدرت اظل بالبيت
بيومها ظليت ادكلب وماجاني نوم مدتروح من بالي زهراء معقولة بيومها جنت حلمان بيها لو صدك جانت يمي شكد جنت مشتاقلها والموقف الي صارلي مع الغجر خلاها متروح من بالي وكمت احن الها واشتاق والاشتياق ياكل بكلبي
زهراء،،سمعت من البنات انه صاير عرس بيت الشيخ وبيومها مانشفت دمعتي تمنيت يكون مو غزوان الي متزوج
مرت الايام وكمت الح على ام فضة نمر من بيت الشيخ ومرة شفنة وحدة واكفة على باب بيت عمي وكانت لابسة برمودة وجسمها مكشوف وواكفة على الباب وكانت حلوة كلش متت موت
ام فضة،،،زهراء جانت تباوع وعيونها تصب دم مو دمع وخايفة لا تكون زوجة الشيخ من كمنة نطب للبيوت وسمعت هاي زوجة زيد بردت نار قلبها
الحجية،،،زينة زوجة زيد راوتني نجوم الظهر كانت متحترم وصلفة وتطلع تفتر بسيت النوم ومتشتغل اي شي ومتكعد الى اذان الظهر جنت من احاجيها تستهزء وتلبسني وتمشي وزيد على ميها وميحاجيها اي شي وكأنه عاجبتة الوضعية
غزوان،،،كانت تخابرني الحجية مرات وتلح علية اروح اتغدة او اتعشى يمهم من جنت اروح جانت تطلعلي زوجة زيد بلبس فاضح اتكلمت مع زيد يضب زوجتة ومافاد وياه
زينة ،،،من شفت غزوان انصدمت شنو من حسن شنو رزانة وثكل وثقافة فعلا شيخ وزينة الشيوخ جان يختلف على زيد ولا عبالك اخوه اني خريجة ومثقفة وبنت المدينة وزيد همجي لا دارس ولا يعرف حتى يحجي ولا عندة اسلوب بس ماصدكت يزوجني ويستر على الي بطني الي ماجنت اعرف ابنة او ابن غيرة
جنت من اشوف غزوان ترد روحة بس جان طينتة ثكيلة ومينطيني ريك ولا متقبلني ومن يجي الى ان يروح وهو مقابل الحجية وكاعد وحتى ميباوع بخلقتي
كمت يوم عن يوم احبة اكثر بس جانت الحجية تكرك براسة وجان يوم عن يوم يكرهني اكثر وبمرة من المرات رزلني على ملابسي وكلي انتي بيت الشيخ تحترمي وتلبسين الي يليق بي
