21
جنت احجيلها واني فرحانة بجت ام فضة ع فراكي وحضنتها وحسيتها فعلا امي الي ماجابتني حسيتها فعلا ام مفاركة بنتها لان راح تتزوج تمنيتها تجي وياي وماوافقت وكالتلي ماراح اتركج وراح اظل اتواصل وياج
زهراء،،،بكد مجنت مقهورة على فراك ام فضة بكد مجنت فرحانة جنت برغم كل الي صار مشتاقة لأمي ام غزوان ونفسي ارجع انام بحضنها مثل مجنت اني وطفلة
ظليت افكر بغزوان وبأيامي الجاية وياه ومتشوقة لبيتي الي تربيت بي وجمعتي اجمل ذكريات
غزوان،،،من رجعت واني بس افكر بيها وبالمنظر الي شفتة مشبعت منها شوف جنت اتمنى لو بس جايبها وياي بعد مااتحمل فراكها
ثاني يوم كعدت من الصبح وكتلهم راح اجيب زهراء واجي جانوا فرحانين وديحضرون بالبيت والاكل وكأنه مو زهراء جاية
خابرت على زيد وحجيتلة بالي صار وانه ظلموها لزهراء وجان زيد متغير وكأنه صار واعي ورجال مو ذاك زيد الطايش باركلي وكلي تظل بنت عمنا ومن لحمنا ودمنا ويتيمة ومكطوعة وماالها غيرنا وباركلي طلبت منة انه لازم يحضر زواجي ويجيب زوجتة ويطيب خاطر الحجية وتتصافة القلوب وكلي ان شاء الله خير
رحت اجيب زهراء وجانت متأثرين كلش زهراء وام فضة ويبجون ووصتني بيها
زهراء،،،تمنيت لو تجي تعيش وياية ام فضة وحسيتها امي بس مجانت توافق ووعدتني انه راح تظل تتواصل وياية وتجيني جانت تبجي وكأنه ام دتودع بنتها الي راح تتزوج وفعلا من ركبت السيارة حسيت عفت كلبي يمها
غزوان،،،جنت اسوق وبأيدي الثانية حضنت زهراء لان اثرت بية دموعها همست لتبجين اوعدج اكون الج ام واب وحبيب وزوج
زهراء،،،ان من زمان من جنت صغيرة جنت احسك ملاذي الآمن وامي وابوي وابن عمي وحبيبي ودنيا كلها
غزوان،،،اوعدج متنغثين ابد واعوضج عن كل الايام المرة الشفتيها
زهراء،،،جنت اباوعلة والدنيا مسايعتني من الفرحة
وصلنة البيت ونزل غزوان وفتح الباب ولزم ايدي ودخلنة انعصر كلبي واني ادخل البيت وتزاحمت الذكريات بين حلو ومر استقبلتني خالتي ام فؤاد وهلهلت وحضنتني وبجينة وكالت لغزوان كرة عينك بشوفة زهورة
اجة فؤاد يصفك وهو يكمز ويضحك وعبالك طفل اجة يركض يريد يحضني خالتي صارت كبالة وحاولت تبعدة عني وعيونها تراقب نظرات غزوان الي جرني من ايدي وكلي خلي اوديج للحجية
استغربت شعجب ماطلعت استقبلتنة فتح باب غرفتها وشهكت من شفتها على الكرسي المتحرك جانت تبجي وفاتحتلي ايدها رحت اركض وحضنتها واني اهمس شبيج يمة اسم الله عنج
الحجية،،،ابوس بيها واشمشمها اووووف يمة زهورة شسويت بيج سامحيني يمة يتيمة حوبتج متعدتني
زهراء،،،جنت ابجي واهمس مسامحة يمة جانت تجر بأيدي تريد تبوسها ومااخليها كمت اتذكر او ماجابوني للبيت شلون جانت حنينة علية اتذكرت من جانت تغسلي وتبدلي تلبسني اجمل الملابس
اتذكرت من جانت تظفرلي شعري وتنومني بحضنها وزيد وزيدون يغارون مني
تذكرت من جانت تدرسني وتترك دراسة ولدها همست يمة ليش قسيتي علية ماالي الا حضنج وتعذبت بعدج
الحجية ،،،اوف زهورة بعد امج الشيطان شاطر عمة على كلبي ودفعت الثمن غالي
زهراء ،،،جنة كلنا نبجي نزل غزوان وحضن امة حيل وباست راسة وطلبت يسامحة
زهراء،،،افتريت بالبيت جان ممتغير بس جان متبهذل ومونفس النظافة والترتيب الي جان بي قبل
غزوان ،،،افتر مع زهراء وشفتها شكد مشتاقة وتحن للبيت
زهراء،،راحت خالتي تصب الغدة واجاني فؤاد ضاج غزوان كتلة خطية فدوة لتكسر بخاطرة
غزوان،،جان فؤاد لازم ايدها ويبوسها ويخلي ايدها على راسة وينزلها على كتفة واظهرة شاطت روحي وكتلها وين يريد يوصل هذا ست زهراء
زهراء،،،خفت وجريت ايدي ورحت لغرفتي
غزوان،،،تقربت لفؤاد وهمست زهراء ميصير تلمسها فؤاد الله يحركك بنار جهنم مثل مدتحركلي كلبي مخلي نفسك متفهم وتمسح بأيد البنية على صماخك 😒😒
رحت لغرفتي واني ادردم عليه وكمت اكره حتى جية خالتي من وراه
