بارت خامس
زهراء،،،ظليت ابجي والوب ومكدرت انام الليل لازم غزوان يعرف لازم يلحكني مستحيل اصير لغيرة مااصدك جان يضحك علية معقولة صح عندة حبيبة وياه بالجامعة جنت اون بحسرتي وافكر شلون اذا طلع عليه الصبح والشيخ وافق
فكرت انه اطلع وجه الصبح ومااظل بهذا البيت دقيقة وحدة ولعل وعسى اذا طلعت منا اكدر اوصل لغزوان او انطيه خبر كمت الم اغراضي
،،،،،،،،،،،،،،،،،،،،،،،،،،،،،،،،،،
بنفس الوقت وبجانب اخر
ام غزوان ،،،شيخ اريد افاتحك بموضوع قبل لتنام
الشيخ ،،،ام غزوان تعبان ومتهدهد واريد انام
ام غزوان،،،الموضوع مهم ياشيخ يخص زهراء
الشيخ كعد على حيلة وكال بأستغراب شمالها زهراء؟؟
ام غزوان،،،،اممم والله مااعرف منوين ابدي ومنوين انتهي
الشيخ ،،،عاط بيها احجييي عاد شكو شمالها زهراء
ام غزوان،،،مابيها الا العافية بس ام فؤاد اختي فاتحتني بموضوعها لان شافتها متعلقة بفؤاد وشافتهم يميلون لبعض وهية سبعة ومعدلة حتى داريهم وتدير بالها عليهم
الشيخ،،،وكفت وجريتها من ايدها وج انتي تخبلتي خرفتي تالي هالعمر تريدين تنطين بنت اخوي هاليتيمة لواحد فاقد الاهلية ومرفوع عنه القلم شمالج تخبلتي؟؟؟
ام غزوان،،،ياشيخ طول بالك وصلي على النبي احنة عدنا شباب مثل الورد وهي ماعدها حيا وتفتر كدامهم والشيطان مامات
الشيخ ،،،الله يكسر راسج على هالسوالف المكسرة البنية بعدها طفلة صح كبرت قبل اوانها وتحملت مسؤوليتنا بس بعدهي مراهقة بنت 15 المفروض منج تعلميها وتوعيها مو تروحين تنطيها لواحد ميعرف شنو مرة وفاقد الاهلية شنو ماعندج رحمة بكلبج يتيمة ومكطوعة وصارت امانة بركبتنا نشمرها هيج شمرة لا والله والرسم هالشارب بوجهي لتظل طول عمرها بعز وخير وتعيش معززة مكرمة تحت جناحي
ام غزوان،،،يعني شنو !!!!
الشيخ،،،يعني من يجي غزوان هالمرة اعقدلة على زهراء وشوكت مايريد تكون الدخلة واسويلهم عرس تحجي بي العربان كلها حتى تبرد نار قلبج
ام غزوان،،،تركني وراح نام وظليت الليل كلة اعض اصابيعي ندم اني بيوم جبتها ودخلتها بيتي راح تاخذ شمعة بيتي وفرحة عمري اووووف كون ميصبح الصبح واشوفج كبالي يازهراء وابجي بقهر
زهراء ،،،ظليت الليل كلة ابجي وخايفة لا يصبح الصبح ويزوجوني لفؤاد
وقبل لا يأذن الفجر طلعت على رؤوس اصابيعي وامشي بسكوت لا احد يشوفني وكلت اذا كدرت اهرب الله يكون بعوني زاذا ماكدرت اهرب ورجعوني اموت نفسي ولا اخضع لهل مصير
طلعت للبستان وجنت لابسة عباية راس ومغطية وجهي مطالعة بس عيوني ظليت اركض واوكع من كد الخوف والرعب الي جان بية بوكتها ماعرفت وين راح اروح وين اتوجه مجنت اطلع كومة ولا اعرف الاماكن اتوجهت لأنقاض بيت اهلي شمرت نفسي على احجار البيت وابجي بحسرة والوم بيهم ليش عفتوني ورحتوا ليش عفتوني للمذلة يابة الدنيا مارحمتني ثاري الي ماعدها ابو تعيش بذلة ومهانة
صرخت يمة وينج من عفتيني والدنيا تكفخ بية من كل صوب محتاجة صدرج ارتمي عليه واشكيلج تعب سنيني وظلم البشر ثاري يمة اليتيم يتيم الام
شبعت بجي اذن الفجر وكامت الناس تطلع تريد تصلي بالجوامع خفت لا احد يشوفني ويعرفني ويرجعوني لبست عباتي وظليت اركض انكطع نفسي بعد كوة اكدر اجر النفس
ام غزوان،،،صلينة الفجر وكمت اسوي الريوك وتريكنا طلع الشيخ وطلع زيد لشغلة كلت شو الحية ماطلعت اليوم شنو قصتها توجهت لغرفتها وجنت احاجي بروحي واكول شلون عدج حظ من السما اذا الشيخ واكف وياج وغزوان وغسلتي عقلة دفرت الباب وينج زهيران كومي يلا شمسج عالية اليوم ميار الشمري
مافتحت ولا ردت استغربت فتحت الباب مالكتها دورتها بالبيت صخام الصخمج زهراء وين انكلعتي اويلي كمت اضرب على وجهي رحت للبستان وناديت لزيد وكتلة زهيران شردت يازيد
زيد،،،المنجل بأيدة وصار يصرخ مثل المخبل ويركض بالبستان اني كعدت بالكاع وكمت اخمش بنفسي راح تفضحنا وتنكس روسنا وتضيعنا وياها
زهراء،،،،بعدت حيل عن منطقتنة تفتحت الدنيا وصار الصبح وطلعت الشمس واني بعدني اركض وصلت لمناطق صحراوي كمت افتر بروحي ماكو لا طير ولا حمامة جنس بشر ماموجود خفت وكمت ابجي وتندمت لان شردت من اهلي هسة وين اروح وين انطي وجهي ظليت امشي وصرت عبارة عن تراب بتراب ظليت الى الظهر امشي وشفت باص وكفولي وسألوني شبيج ماجاوبت وغطيت وجهي وانداريت للجهة الثانية
نزلت مرة جبيرة وتقربت مني وكالت يما شمالج شنهي شغلتج يالمزيونة باوعتلها بخوف طلعت الغجرية الي جانت تجي لبيت عمي والي مرة اشترتلي زوجة عمي تراجي ذهب منها
كالت يما تعالي معانا هاذي صحراء مكطوعة وماراح تلكين من يساعدج لتخافين انتي حالج حال بناتي واشرت على الباص كان بي كومة بنات
ترددت ونطتني ايدها وكالت الامان بالله كومة يامزيونة
زهراء،،،نطيتها ايدي وجنت ارجف من الخوف ومااعرف شنو الي دينتظرني
