10
غزوان،،،منو هاي ام فضة؟؟
فيصل ،،،بس لا مو سامع بيها
ليث ،،،منوين يسمع بيها وهو بالشهر مرة او مرتين يجي وكل وقتة يكضيها شغل
غزوان،،،اباوعلهم واضحك واحد يرفع وواحد يكبس هسة منو هاي دحجوا
فيصل ،،،غجر بصحراء ال40 كيلوا بس شنو من سهرات ونسة ضحك وركص وربابة وسوالف شياب كبار بالعمر مينشبع من تعاليلهم
ليث،،،غزوان بشرفك متروح ويانة اليوم خلينة نغير جو انت محتاج هيج شي والله
غزوان ،،،اشوف اذا ماصار عندي شي اروح وياكم
زهراء،،،جنة مشغلين نار وكاعدين برة واسمع سوالف البنات وضحكهم وهمة ينصبون ويضحكون على سوالف الشياب الي يجون
جنت اباوع للكمر واحس اشوف صورة غزوان بي تعبت من التفكير بي ياترى وين صفى بيك الدهر وشنو حالك معقولة تذكرني واجي على بالك مثل متجي على بالي دائما معقولة قساوة قلبك خلتك تنسى حبنا ووعدك الي
بلشت السهرة وراحوا البنات يرتبون نفسهم كمت رحت لخيمتي ولبست الغواشي وجنت لابسة كلابية سودة بيها فتحات رحت كعدت ورة ام فضة كالعادة واني اسمع صوت اغانيهم الي صح يركصون عليها لكن تهيج كل جروحي فجأة دخلوا رياجيل كومة والوادم الموجودة كامت تسلم عليهم ام فضة باوعتلي بخوف ولون وجهة تغير مجنت اعرف ليش
ام فضة،،،عزة العزاني هاي جايبين الشيخ وياهم يمة بنيتي اوف على كلبج شراح يصير بحالج الليلة
زهراء،، من رحبوا بيهم وكعدوا واذا بالصاعقة غزوان كاعد بالصدر بوجهي والناس داير ميدورة كمت ارجف ودمعي يصب صدك جذب حبيب روحي وعمري من بعد هالسنين اشوفة كدام عيني مانزلت عيني ولا كدرت حتى ارمش جنت اخاف برمشة عيني مااشبع منة شوف جان متغير كلش كبران وصاير طول بعرض ولابس دشداشة زيتوني وشماغ لافة على راسة بدون عكال كمت اشهك بالبجي واخلي ايدي على حلكي من فوك الغواشي وابجي بخنيك
ام فضة كامت تدفر بية حتى اكوم ومجنت اقبل اكوم جان كاعد متربع وسبحان الله القساوة واضحة حتى على معالم وجهة البريئة بس مجنت خايفة منة بعكس احساسي من شفت زيد جانن اليركصن يشمرن بنفسهن عليه وينزلن بشعرهن على وجهة جان يدنك بخجل جنت اباوعلة بحسرة وقهر وكل مايمر الوكت ازيد واشهك بالبجي فجأة توقفت الموسيقى وظهر صوت بجي واضح باوعلي هو والموجودين بأستغراب وصارت ام فضة كبالي حتى داريني عن عيونة
غزوان،،،من دخلنا وكعدنا وجانت اكو مرة جبيرة بالعمر وراها كاعدة بنت طول الكعدة يباوعولي اثنينهم و البنت مارفعت عينها عني وكان واضح انها تبجي
زهراء،،،ضيفوا مشروب وماشربة خلاه كدامة همست لام فضة يمة ابوس ايدج لتخلوه يشرب يمة ابوس ايدج شيلي المشروب عنة هو ميشرب
ام فضة،،،زهراء راح تفضحين نفسج كومي منا صحت بيها
زهراء ،،،كمت واني مخنوكة بالبجي
غزوان،،،كامت حتى تطلع البنت وصارت عيني على رجلها الي جانت ظاهرة من الفتحات هاي شنو شامة !!! هاي وين شايفها
كام راسي يوجعني واختلطت علية الامور كمت اشرب كاس ورة كاس وممتقبل الافكار الي دتجيني ردت اجذب عيوني ومااصدك الي شفتة لان مستحيل
زهراء،،،رحت لخيمتي واني ابجي وانحب كمت اباوع منها وانتظرة شوكت يطلع وتندمت لان طلعت وماشبعت منة شوف وجنت متأكدة لو اظل وياه لصبح مستحيل راح يعرفني
