6
ام غزوان،،،اجة ابو غزوان وعكالة بأيدة وغترتة على كتفة وخطواتة ثكيلة كعد على الصبة طلعت عليه وصرخت هاي الي جنت تريد تكسر ظهر غزوان بيها هاي الي جنت تريد تعيشها معززة مكرمة وتزوجها ابن الشيخ المثقف الي الكل تحلف براسة اها شوف لبستنا العار جنت اعرف عنها سوالف تسود الوجه الله يسود وجهة بس مكدرت احجيلك كلت نزوجها لفؤاد ونخلص من عارها ثاري شردت والله اعلم مع منو
الشيخ ،،،جان مخلي ايدة على قلبة ودمعتة واكفة على طرف عينة ونفسة ثكيل تقربت منة وهمست شمالك شيخ كامت شفتة ترجف ووكع عليه بعد ميصد ولا يرد صرخت والتمت الوادم علينا وديناه للمستوصف وكالوا جلطة صايبتة ولو نلحك بي للمدينة لو منلحك
رحنة بسيارة الاسعاف وزيد مندري عنة وين صارت بي الدنيا من الصبح وهو يدور عنها اتصلوا بغزوان وجان ينتظرنا بالمستشفى وجان مصدوم وميعرف شصاير دخلوا الشيخ للعناية المركزة وحجيت لغزوان شسوت بينة زهراء وشلون لعبت علينة كل هالفترة وكتلة اكيد شردت مع حبيبها
جان غزوان مدنك وساند راسة بأيدة وماحجة ولا كلمة طلع الدكتور وكال احنة سوينة الي نكدر عليه والاعمار بيد الله الله يرحمة
غزوان،،،،ضربت راسي بالحايط وبجيت وامي تدعي على زهراء واليوم الي لفيناها بي لبيتنا
غزوان ،،،حضنتني امي وقسمت لا اكون ذباحها وميهنالي عيش ولا اطب بيت الشيخ الا وماخذ ثارة ودموعي لاول مرة تنزل على خدي
زهراء،،،من نزلنا من الباص اخذوني على الخيم مالتهم كعدت بعيد عنهم بالزاوية ولميت نفسي وكعدت ابجي ظلوا يحاجواني ويريدون يعرفون قصتي بس مكدرت احجي شي
اجتي المرة الجبيرة وكالولها يمكن خرسة هاي شو من صعدت ويانة ماسولفت كالتلهم خطية تركوها صبولي غدة واكلت شوي وعفتة
تندمت اني شسويت بروحي وشيوصلني لغزوان وشلون اعرفلة طريق بعد
جان عقلي عقل طفلة والخوف سيطر عليه وماعرفت شلون اتصرف بوكتها ومن شردت جان بأعتقادي افضل حل وكنت معتقدة انه راح يجيني غزوان ويرتمي بأحضاني مجنت حاسبة حساب الفضيحة والعار الي راح يلحق اهلي بسبب شردتي
بيومها بالليل كعدت يمي المرة الجبيرة ام فضة اسما وطلعت البنات وكالت ها يمة ارتحتي اكدر احاجيج
زهراء،،،كفيت نفسي وجنت اباوعلها بخوف
ام فضة ،،،احجيلي يمة شنهي قضيتج اذا قتل مااحويج يمي واني ام فضة بس اذا سرقة او غير شي احجيلي نشوفلج دوبارة شنهي علومج
زهراء،،،خفت اكثر وهمست اني ماسويت كلشي وكمت ابجي
ام فضة،،،لعد من منو شاردة وليش؟؟
احجيلي لتخافين ياحلوة الي تشوفيهن كدامج هالبنات كل وحدة بيهن قصتها قصة وكلهن لفيتهن يمي وحميتهم من جلاب الشوارع ومن غدر بني ادم
زهراء،،،بس اني مااريد اصير مثلهن
ام فضة ،،،بنيتي احجيلي قصتج خليني على بصيرة انتي اذا الله ماجذبني بنت عز وخير ودارت بيج الدنيا مثل مادارت على غيرج
زهراء،،،خفت بالبداية احجيلها بس بعدين ارتاحيت الها حجيتلها قصتي كلها
