بين طهرٌ و خطيئة

شكوك!1

الساعة ١٠ الصبح
خلصت شغلي
ورحت تمددت ع جرباية مالتي
، اخذت تليفوني وفتحت الواي فاي
ودخلت على الفيس
واتصفحت بي
صارت كبالي اعلان ممول
الاعلان لمدرسة اهلية
من قريت اسمها والعنوان
رأسا عرفت مكانها واندليته
تصير براس شارعنه ..

باوعت منا ومنا محد يمي
اريد اتسلى شون هسه؟
خلي اراسلهم وادري بحظي ردي
رغم شكد قدمت على تعيين وشغل
بمدارس اهلية وشركات
بس ماكدرت احصل على وضيفة ابد ..

كلت خلي اراسلهم من باب التسلية
التسلية فقط لاغير
دزيت مسج ...
سلام عليكم ماتردون معلمة انكليزي ؟
وبعدهه دزيت قرد مخلي ايده على حلكه
دلالة ع الخجل ..
وبعدهه دزيت وجه القمر
مادري ودزيته مرتين
وصاروا كلهم ٤ رسايل ..
ضحكت بصوت عالي
واجاني صوت مرة ابوي من ورة الباب
وكالت وسم حتى سم..
خليت ايدي على حلكي
كتمت ضحكتي وحركت اكتافي ..

ثواني وجان يردون عليه المدرسة
وكاتبين <اي> ...
تفاجأت كلش
شبسرعة ردوا عليه
ونوب اي شنو؟اكو واحد يرد هيج؟
لعد شكد متعجرف هذا مدير المدرسة
لا يا مدير المدرسة !!
قابل مخلين المدير يرد
اكيد هذا معلم
او حي الله موضف
ناطينه الصفحة يفتحها ويرد
واكيد هسه هو مو بالمدرسة
بالبيت ومنعس ونايم ع الجرباية ويرد .
رجعت راسلتهم ...
شنو اي ؟
ورة دقيقتين ردوا عليه ..
شنو اسمج؟
كتبت سارة جهاد ودزيتها الهم ..
ورة دقيقة دزلي تعاي ..
تعجبت ودزيت وين اجي ؟
جاوب هسه للمدرسة ..
زادت صدمتي! ..
معقولة ابتسملي الحظ واخيرا؟
لو لعبة هاي ؟
لا لعبتيش مدرسة والها اسمها
.. افضحهم والله ..
خلي ادز مسج اخير
متأكد ؟
بعد ثواني دز اكيد ...

طفرت من الجرباية
ورحت ركض للحمام
غسلت وجهي ورجعت للغرفة
وللكنتور كبل
طلعتلي قميص اسود ابو الصرة
وجينز كابوي ازرك وبي خط اسود على الجانبين ..
مشطت شعري بسرعة وسرحته ورفعته ليفوك ذيل حصان ..
همزين شعري قصير مايتعب ..
بشرتي مهتمة بيها اني..
وميحتاج كونسيلر وفونديشن
بس خليت واقي الشمس وحمرة وردية گلتر ..
لبست سبورت شوز ابيض واسود ..
اخذت جنطتي
وطرت بسرعة وطلعت من الغرفة
ومشاعر محتدمة بداخلي
وممصدكة انو راح احصل شغل ..
صارت بوجهي مرة ابوي
شافتني بهذا الحال وتخصرت
وكالت وييين؟؟ بنبرة متعجرفة ..
كتلها اكو مدرسة طالبين معلمة انكليزي رايحة الها اقدم...
كالت اي ولي بلكي تحصلين شغل نخلص من مصروفج ...
عفتها وحجيت بكلبي عاد هسه مدري شنو مصروفي ...
طلعت ركض للشارع
وتمشيت للمدرسة
بحكم هيه قريبة
ونفس الفرع ..
ياكثرها المدارس الاهلية
طلعت الحكومية بكسر
وصارت اكثر منهه
وطبعا بس العرف يشغلوهم
وبس الي متمكنيين يسجلون اولادهم بيها
والفقير اله الله ..
خطية طلاب المدارس الحكومية ..
يكعدون على رحلات مكسرة وبس حديدة رفيعة .
ومرات بالكاع
الله ع الظالم مانكول غيرها ..

بعد ١٥ دقيقة وصلت للمدرسة المطلوبة
وكفت يم بابها الرئيسي اباوعلها
شكد حلوة ومرتبة وجبيرة
عبالك مو بالعراق
بنائها مرتب كلش مو هوسة ولا مخربطة ..
ارتسمت على ملامحي ابتسامة امل
تمنيت يشغلوني بيها ..

تقدمت ليكدام فتحت الباب وفتت
صار كدامي حارس
اجه يمي كال تفضلي ..
كتله اني راسلوني المدرسة اجي اقدم
كال ها تفضلي الادارة هاي الباب الكدامج
كتله شكرا وتوجهت للباب الي اشر عليها ..
جانت جبيرة وصايرة بنص ابواب ثانية ..
فتحتها وطبيت صار كبالي مكتب ووراه كاعد شاب .
توجهت اله كبل وكلت السلام عليكم ..
رد .. عليكم السلام ..
.. اني راسلتكم قبل شوية عمود وضيفة وكلتوا تعالي!

باوع صفح ورجع باوعلي حسيت اكو كاعدين بالمكتب بس ماانتبهت الهم منو وشنو ..
كال شسمج ؟
.. سارة جهاد ..
كال تفضلي
كعدت ع التخم
وهو ظل يدور بالاوراق الي يمه ..
باوعت على الي باوعلهم
اجت عيني على ولد شاب
لابس سترة رصاصية وجواتها قميص
لونه ابيض ومفتوحة الدكم وظاهر صدره
لابس كلادة فضية وساعة فضية ماركة فخمة..
باوعت لوجهه ملامحة رجولية صارخة جدا
ونظراته جريئة وملعبة
يباوعلي بقووة وجرأة مو طبيعية ..
اسمر قمحي فاتح لون بشرته
لحية كثيفة سودة وشمرة حواجبة مثل السعفة
وغليظة ..

كاتم ابتسامه شكله .. بس جتي عيني بعينه
عظ شفته وتركها بجرأة ورفع تك حاجبه بتحدي ..
لزمتني ضحكة مدري ليش ودنكت بسرعة اضحك ..
يمه ولد لابس اسود بس ماباوعت اله ابد
صاروا يحجون همس ويمهم لابتوب ..

انطاني الشاب ورقة كال امليها
اخذتها واخذت قلم وصرت املي المطلوب مني ..
انتبهت حقل مكتوب بالجاف غير عن باقي الحقول المطلوبة !
مكتوب الحالة الاجتماعية؟
كتبت منفصلة ..
حسيت بنظراتهم تجتاحني رفعت راسي
اجت عيني بعيون الولد الي لابس اسود
انتبهت على ملامحه .. عيونه اخضر فاتح
وبشرته بيضاء معجونة بشكار
ابتسامته تارسة وجهه ترس على شنو ماادري !
ساورتنيى الشكوك ! ...

يتبع

Mrwa....