عمر .. بليلة استشهاد سيف ، بعد الفطور كعدنا نسولف كتلهم زواجي بالعيد ان شاءالله خلي ابلغ سارة ....
كام سيف كال راح انزل اغراضي من فوك حتى تجهزه بسرعة بي مبقى شي للعيد
طفر بسرعة صعد دينزل باغراض غرفته وكال المطبخ الي جهزته فوك خلي الك وللعروسة مااريده منحتاجة عدنا هذا الجوة واصلا مريم كله جوة
كتله اخابرها وتجي اساعدك
ديله بس لتكضيها رومانسيات وغزل يله بسرعة بس بلغها وراك كومة شغلات نخلصها دنريد نفرح بيك
ضربته على كتفه وكتله ديللله روح لا تتصنط وهو ضحك و صعد فوك
دخلت للغرفة وسديت الباب اخذت تليفوني واتصلت بسارة ، فاجئتني برفضها تعاركت وياهه وسديت التليفون شمرته واني اتنفس بضيق ضجت منها ليش دتسوي هيج انوب تتحجج بامي واني مية مرة حاجيلها انتي فوك وامي جوة وامي متصعدلج مستحيل اصبري بس هالفترة ميفيد هالمرة لازم اكون صارم وياهه دنعل ابو الحب
طلعت من الغرفة واني والنار سوا احس مشتعل شعل
شفت سيف نازل من فوك وبيده الدواشك فاتح حلكه ويضحك ذيج الضحكة الحلوة الي خسرتها عمري كله وبعد ما اشوفهه
وصل نص الدرج كتله اوكف اوكف ارجع صعدهن مراح اتزوج
تقدم بايتين كال ليش شكو شصار ؟
كتله ماتريد تكعد بالفوك تريد بيت وحدها
كال ليش شنو السبب ؟
سبب تافه مثلها وهيه اتفه بعد ،، دمشي اصعد فوك رجع الدواشك وبدل ملابسك امشي نروح للكوفي بالكرادة نشوف اللعبة مالة اليوم .
يمعود يالعبة هسه نشوفها هنا مالي خلك اطلع والله
امشي امشي اني ضايج خاف اسوي حادث بالطريق امشي وياي
مدام هيج يله اجي وياك ليش لا
بس اسبح واجي ،، صعد هو واني رحت سبحت بالحمام الجوة وطلعت بدلت ،، نزل سيف من فوك مبدل باوعتله اشوفه عبالك عريس شون مرتب من يوم يومه هو حلو ومرتب بس اليوم عبالك غير شي صاير
دنك على امي باس راسها وطلع
وصلنا للكرادة خليت السيارة بالكراج جاي ادورها
وكف صديقي يم الجامة سلم عليه صار هواي مشايفة
عفت السيارة نزلت سلمت عليه ونزل سيف هم سلم
وصرنا نسولف
سيف كال ها عمر نمشي ؟
كتله انته روح سيف روح اني اجي وراك انتظرني بالكوفي
كال خوش رايح اشتري لزينة بدلة للعيد واروح للكوفي انتظرك هناك
كتله تمام سولفت ويا صاحبي بالعشر دقايق وكفنه نسولف بعدهه كتله انتظر ادور السيارة واجيك نطلع للكوفي كال تمام
درت السيارة وسفطتها وطلعت من الكراج ومشينه مسافة وصار الانفجار القوي الي هززز بغداد هززز
ركضت اشوف النار دتاكل الاخضر واليابس ..
ظليت ادك على راسي واصرخ باسم سيف ظليت اركض مثل المخبل واباوع بالوجوه ادور اخويه
الدنيا محتركة ورة شكد يلله اجت الاطفاء والاسعاف ظلو ينكلون بالجثث وين الكى اخويه من بين المئات بين جريح بين شهيد شجابني للكرادة كتله روووح راح ع الموت دفعت اخوية ع الموت لو ممخابر سارة لو مبقي بالبيت ينزل الاغراض مو احسن كله من سارة لو ما هيه رفضت جان ماجينه لهنا جان التهينا هو ينزل الاغراض واني اطلع اغراض غرفتي ولا جبته ع الموت
كرهت سارة حقدت عليها واني بنص النار ماعرف اذا كرهته مؤقتا او لا بس ناري مجاي تطفى على اخويه
