كعدت الصبح على صوت حركته ، وخرت الفراش عن وجهي وتمططت شفته طلع من الحمام
كتله صباح الخير
كال هللو .. بثكل ..
بقيت بالفراش لامه رجليه لصدري واباوعله
هو ساكت بدل ملابسه ومشط شعره
وظل يجمع اغراضه بالجنطة
كتله شنو حنروح ؟
كال اي وسكت
المفروض نبقى ٣ ايام مثل ما هو كلي قبل العرس بس اني ماجادلته ولا اعترضت عرفت زعلان واني هم ممتعودة على طبعه ، كمت للحمام غسلت وطلعت
بدلت ولميت اغراضي ...
شفته ينتظرني كاعد ع السرير ولازم موبايله
باوعلي كال ها خلصتي ؟
كتله اي
طلع قبلي رحت وراه اخذ من الجنطة ومشينا
كال روحي للمطعم مال الفندق اني اودي الجنط للسيارة واجي ..
رحت كعدت على الطاولة بالمطعم وبقيت انتظره
ورة دقايق اجه يباوعلي من بعيد
وصل يمي كال كومي نجيب الريوك
كمت وياه نجيب الريوك
جان بوفيه مفتوح ..
تريكنا وخلصنا راح هو يحاسب بالريسبشن
واني وكفت انتظره ، بعدها اجه ...
اخذني للكراج فتح باب السيارة صعدت وهو صعد ساقها ومشينا بقينا بالربع ساعة ساكتين
الى ان بادرت اني وسألته
_ وين رايحين
التفتت عليه لحظة ودار وجهه ع الطريق
كال لبيت اهلي مسوين عزيمة اليوم ...
هزيت راسي والتفتت ع الجامة .. وكملنا طريقنا بصمت ..
وصلنا لبيتهم واستقبلونا بالهلاهل والجكليت
جانو هواي اكو ناس جايين
واني الغبية ظليت ادور على اهل عمر مدري شجاني
وصلنا لباب الاستقبال وجان اشوفه واكف
لا اراديا امتدت ايدي لاحمد ولزمته قوي وابتسمت
احمد انتبه عليه وباوعلي مخنزر
بس ماترك ايدي وظل يباوع على عمر
ودخلنا جوة ..
كعدنا بالاستقبال والكل اجو يباركون النا ويقدمولي الهدايا الي اغلبها ضروف ...
بعد ما شفته ابد واصلا استغربت جيته
اباوع لبيتهم فخم جدا الثريات الكرستالية النازلة من السقف شي رائع والاثاث والستائر الملكية وكل شي
تحسرت واني اباوع ..
ناسهم كلش راقيين ومثقفين
بس حسيت بغربة بيناتهم
وامه مغرورة او متكبرة حييل بس تختلف عن ام عمر بهوايه
ذيج تطكها طك بالوجه وتبين كرهه للشخص علنا
بس هاي لا تختلف هوايه ..
تغدينا وخلصنا رحت دا اغسل انمدت ايد لزمتني وفوتتني بغرفة فارغة باوعت هذا عمر
سحبت ايدي منه بقوة
وعطت شبييك تخبلت ؟
كال تدرين ليش جيت ؟
مايهمني
اريد اطلع رجع سحبني من ايدي ....
مستحيل مايهمج لعد ليش من شفتيني تمسكتي بيده وابتسمتي ترة اني حافظج سارة
