هلاو ..
▪▪مريم▪▪
دفعني سيف لغرفته .. فوتني وسد الباب استغربت من تصرفه بس جانت عيونه مغوركة
خليت ايدي على حلكي بصدمة واكتم شهكة بنفس الوقت ..
كتله مات مات بصدمة وبدت عيوني تصب ..
لزمني من زنودي وكال اششش لتسمع امي اسكتي
مكدرت اسيطر على نفسي ابتعدت عنه طخيت بالباب وايدي على حلكي ..
حاولت بجهد اكتم شهكاتي وانصي صوتي كتله سيف لاتكولها عفية لاتكولها مات ..
كال لا لا ولج لا مامات والله بس متصوب وحالته خطرة كلش ادعيله مريم هذا اخويه
حجى هيج ونزلت دموعه .. ولاتكولين لامي تموت والله ..
ادعيله اي ادعيله .. حجيت بتوتر وقهر وكوة مسيطرة على نبرة صوتي .. رفعت راسي باوعت بعيونه
كتله بس الي لازم يدعيله هيه خالة قلب والدة ودعائها دعاء ام والام دعائها مستجاب ولازم تكوللهه سيف ..
كال لا لا مريم امي ملازم تعرف قبل ميجيبو لمستشفى المثنى العسكري ويسووله عملية وبعد الافاقة اخلي يحجي وياهه حتى تطمأن ومتتعب ..
هزيت راسي واتنفس سريع كتله خوش خوش .. واخواتك كتلهم عرفوا ؟
لا لا مريم اخواتي ميعرفون مكتلهم لان ميضمون شي على امي بس انتِ وكتلج ودااحملج امانة وانت اكيد راح تحافظين عليها ..
رفعت راسي باوعتله شفته مثبت بيه نظراته الي اخترقت احساسي .. مثل بذرة نمت على غفلة مني وصارت اغصانها تنمو و تتشعب حتى لامست مركز الشعور عندي .
سمعت صوت خالة بالممر تصيح مريم مريومة وينج خالاتي صارلي ساعة اصيح عليج ..
بسرعة مد ايده سيف وفتح الباب طلع وطلعت اني وراه كوة وبخجل اباوع الخالة الي انفرجت شفايفها وبينت ابتسامتها ..
كالت ها ولكم ملاعيين شدتسوون وترفع بحاجب وتنزل بلاخ وتقلص تك عين ..
كاللها سيف ها ها امي دنحجي ..
دتحجون ؟ ولكم !! ومن اكوللكم اريدكم لبعض تسووهه ظلمه عليه .. احجوا دادا احجوا بس لتسوون غير شي وظلت تضحك ..
احنا بلحظتها مقهورين كلش وحتى مدنكدر نضحك ..
كال سيف اني اترخص اطلع اشوف صديقي ..
كلتلي يوم دنيا ليل وين طالع ..
ما أتاخر يوم وطلع بسرعة ..
▪▪عمر▪▪
بوقت كانوا الدواعش يحومون حتى يسيطرون على مدينة بيجي وبهذا الوقت وصلوا لاطراف المصفى
توجهنا بقوة كبيرة حتى نصد الهجوم .. ونمنع سقوطه بيديهم .. صار الضرب قوي واحتدمت المعركة بيناتنا سقط منه شهداء ب ال ٥٠ شهيد بأيام ودعنا اخوة اعزاء واصدقاء سمحت النا ساحات الوغى ان نتعرف عليهم وتبقى ذكراهم مؤلمة تحز بارواحنه ..
صاروا داعش يدزون بالمفخخات سيارات مدرعة مفخخة حاولنا بشتى الطرق صدهه مكدرنا استعملنا كل الاسلحة وماكو نتيجة وطيران الجيش بهذه اللحظة تأخر علينه وفقدنا هواي شباب من قواتنا ..
جانوا بالمقدمة شباب اثنين من قوات الرد السريع
حمزة ابن الناصرية تصووب وجان لازم احد يروح ينقذه توجهت اله اريد انقذه
صحت على مصطفى التكريتي كتله غطيني رايح الهم ..
كال سيدي خطر عليك ومستحيل تطلع منها سالم ..
صيحت بوجهه غطينيي كتلك
كال سيدي اروح وياك وخلي محمد يغطي علينه ..
كتله ارجع اني اكدر اسحبه ..
توجهت لحمزة وبيدي سلاحي ارمي عليهم وحسيت بمصطفى وياي ويحميني بكل شجاعة وبسالة
وصلت لمكان حمزة ولسه بس اريد اتأكد عايش لو ميت وطكت مفخخة وانتشرت الشضايا
بالارجاء واخترقت جسمي صارت الدنيا ظلمة ظلام ودخان ريحته ملئت المكان والرطوبة اعتلت جسمي الالم ماينحمل عيوني مااشوف بيها حسيت الموت يحوم عليه متنكر بالدواعش صرت اتشاهد واتذكر امي اخوية سيف خواتي اصدقائي ..
سارة شفتها نرسمت على اجفاني بابتسامتها العفوية البريئة وعيونها البنية الي تشبه قطرتين قهوة فوق غيمة من الحليب تحسرت مراح تصير الي وراح اموت تشاهدت للمرة الاخيرة و غمضت عيوني ..
