من شفتهم انصدمت ام عمر ومريم واخته ازهار ،،
لا هاي اكيد لعبة منه .......
معقولة يدز اهله حتى اصدك بي وانو نيته مو سيئة
رحت ركض للتليفون شلت الحظر عنه ودكيت رقمه
بسرعة جاوب ها حبيبتي ..
_ هذا ملعوب منك مو ؟ جايب اهلك يخطبون عبالك تعبر عليه ؟
_ صدك جذب منج سارة يعني ما وكفت بعينج شيبات امي جايبها مناك لهنا عمود ملعوب ؟ شحجي وياج هسه
ارتبكت وبعد مجاوبته هم صدك كلامه ممعقولة لعبة
_ بس اني ملجومة منك عمر
_ طلعتيلهم سلمتي عليهم لو لا ؟
_ لا لهسه ماطلعت
_ ياله ياعيني روحي شتنتظرين
_ ومنو يكول اوافق
_ اووو عاد سارة اشهر صار اركض وراج واريد اراضيج هسه جبت اهلي شكو بعد .
_ اسمع اني راح اطلع لاهلك بس مراح انطي الموافقة هسه افكر عود ماشي ؟ ويله هسه باي
سديته منه واني اضحك فتحت الباب ودا اطلع اغسل صارت بوجهي الاء كالت وينج الناس دينتظروج من شوكت دزيتلج تارة ....
_ اي اي هسه رايحة اغسل ..طلعت غسلت ورجعت لبست فستان ماروني مشجر بورد اسود ناعم وقماشه شيفون مبطن فتحت شعري وخليت مكياج خفيف
طلعت من الغرفة وتوجهت للاستقبال ترددت ادخل خجل ، حيرة ومشاعر ثانية ، فتحت الباب بهدوء ودخلت
مساء الخير رحت سلمت على الحجية بوستها وسلمت على مريم وازهار ، شفت مريم بطنها كبيرة مبينة حامل بالشهر الثامن او التاسع لان كبيرة بطنها وهيه تعبانة كلش مبين على وجه ولادة ..
كعدت يمهم الحجية بادرت وحجت كالت احنه جايين نخطبج لابني عمر واكيد انت عندج علم بللموضوع مو؟ حجتها بشك وجسيت بنفورها البارد مني محفور بقسوة على كل خط من خطوط تجاعيدها .
بلعت ريك وانصدمت احس الدم صعد لراسي بقيت ارجف محتارة شنو احجي كدامهم والاء تباوعلي
طفرت تارة كالت لا ماعدهه علم ابنكم صار ٤ اشهر يركض وراهه وهسه هيه اصلا جانت نايمة لو تدري بيكم جايين ع الاقل جان حضرت نفسها .
ازهار.. لا عيني امي متقصد مو هيج ماما وباوعت لامها بنظرة تحذير ورجعت حجت عمر رايدها للبنية ويحمد باخلاقها هواي .
الاء .. اي عيني نشورها ونشور ابوها ونسأل عنكم ونرجعلكم خبر يصير خير ان شاءالله
دنكت بعد مارفعت راسي ابد هاي امه مبينه مو رايدتني ليش يا ربي عبالها اني مصاحبة عمر ونهار كله افرفر ويا مبين هيج تقصد من حجايتها يله اني ليش مكبرة الموضوع اصلا بعدني منطيتهم موافقة
ترخصو وكامو طلعو بس نظرات امه لعمر ابد مو مريحة مبينة متريدني .. رجعت رأسا للغرفة لزمت تليفوني اريد اخابر عمر فاتت الاء ..
كالت ها شنو رأيج ؟
صفنت بوجهه ثواني ودنكت : بعدني دا افكر ..
