عمر... من حجيت هيج امي كالت اي يوم بعد روحي انته ، خالي اندار على امي وظل يصيح
_ مدام ابنج يريدها شكو جايبتنا مناك لهناك
امي دنكت وسكتت كتله خالو من رخصتك لازم تعذر امي تعبانة من بعد المرحوم وسلام متزوج لاتظلم مرتخ خطية ومريم اني اعقد عليها بس شرط عندي يبقى العقد محد يعرف بي
كال بعصبية وشنو محد يعرف بي احنا نريد الناس تعرف بي حتى لايصير حجي والعالم ماترحم احد
اي اعرف اعرف بس لفترة محددة
ليش بلللا
هيج لغاية بنفسي
امي كالتله هسه ميخالف المهم يعقد عليها يا ابو سلام عوفه
كاللها والله هاي الدكة الناقصة السويتيها ماتنسي ام عمر
ميخالف خال امسحها بيه
شوكت تعقدون ؟
هسه خلي نتفق والله كريم
كال خوش لعد يله سلام يله ام سلام امشو امشو
اخذ عائلته ترخصو وراحو باوعت لامي دنكت وسكتت
ومريم كاعدة يمها دموعها مانشفت
كتلها يوم شستفاديتي هسه هيج تتصرفين من وراي
اني اريد مصلحتها ومصلحة زينة وسلام خوش ولد
تحسرت والتفتت لمريم كتلها كافي مريم لتبجين
اني مراح اقصر وياج ..
كالت ماريد اتزوج ماريد شنو اني طوبة واحد يشمرها ع الثاني
كمت ورحت كعدت يمها كتلها لا منو كال هيج ؟ انت بنت خالتي وربيتي عدنا والاكثر من هذا ام لبنت الغالي الله يرحمه اخليج على راسي والله ..
كالت بس انت تحب سارة وتريد ترجعها وتريد تزوجني بالظل ومتريد احد يعرف ؟
هزت راسها برفض وكامت .. باوعت لامي لطمت على رجلها وكالت هسه لو الله ماخذ سارة بدل سيف ومريحني ..
لزمت ايد امي واحس نار اشتعلت بيه
يوم شهالحجي هذا ؟ هذي ارادة ربج سبحانه وتعالى لا اعتراض على امره سيف الله يحبه وعجل بأخذه يمه وسارة ممسويتلج شي اني الي رغبة بيها وانتي تكرهيهه بدون سبب ترة .
ماتفيدك ومن اكلك ماتفيدك يعني ماتفيدك وانت كله الصوج منك كتلك تزوج مريم من البداية اخذها سيف مايريدها وانت الجبير رفضت شوف شون دارت الدنيا وهسه غصب عنك راح تتزوج مريم لو متزوجها من الاول مجان مات سيف مجان مات وظلت تضرب على رجلها بقووة وانهارت كلش وظلت تبجي وتنحب
اخذتها وحضنتها على صدري وابوس براسها شسويلها هسه يربي والله احتاريت ظليت اهدي بيها كتلها خل تولي سارة تروحلج فدوة وهسه رايح اجيب شيخ واعقد على مريم واخلي المادرى يدري بس كلشي ولا زعلج ...
