هلاو بنات
عنوان الحلقة {تارة}
رجعت للبيت
واني بطريقي امشي
و افكر بعمر ..
كل شي بي يجذب بس جريء كلش
بنظراته يربي لهسه احس خايفة منه
لمَ وكفت يمه ..
اول مرة احس بخوف
او يمكن هذا مو خوف
لعد شبيه لهسه اطرافي ترجف
يمكن شعور ثاني .. اعجاب مثلا!!!
مادري خليت ايديه بجيب البنطرون
ومشيت واني مغيبة واحس بعالم ثاني...
وافكر شلون كتبت منفصلة خاف يكشفوني
اني ممتزوجة من قبل بس كتبت هيج بس حتى يقبلوني
زين واذا شافوا مستمسكاتي
يله اكوللهم متزوجة خارج المحكمة
اووف شون ورطة هاي ..
حسيت بصوت وراية يصيحني ..
سارة سارة سارونة سويرة خايبة سويرة ..
التفتت واشوف جيرانه ام وافي ..
باوعت للشارع وعيت على حالي ..
حييييييييييييييييييييييييل ...
هاي شوكت وصلت لهنا
عبالي بعدني دامشي قريب المدرسة
قطعت كل هالمسافة واني ما ادري ..
رحت يمها كتلها ها خالة
كالت شبيج صافنة صار ساعة اصيح عليج .
ها لا ماكو شي ومديت ايدي لشعري اخلي ورة اذني ..
كالت تعاي درسي حميدان ابني موتني وانه تدرين ماعرف انكليزي ..
اي صار خالة تدللين ..
دخلت وياهه قريته صارت ساعة ب١٢ راح هو لمدرسته و يلله طلعت من يمهم ..
دخلت للبيت شفت باب المطبخ مفتوح دخلت منه
جانت الاء مرة ابوي جوة ودايرة ع الكاونتر وتحوس
كلت السلام عليكم
دارت وبيدهه السجينة
وعليكم ردت بنبرة متعجرفة
كالت ان شاءالله قبلوج حتى تشيلين الحمل عن ابوج شوية تعب وهو يصرف عليجن ..
بسرعة وجان يطب بابا من باب المطبخ الي ع الهول
وكال بعصبية .. الاء شنو هالحجي هذا هاااا ..
وطلعت تارة اختي وراه عيونها مورمة وكحلها سايل جوه وصاحت بصوت وتقصد بي الاء ..
غصبا ماعلى خشمج يصرف علينه مو هو ابونه بيج خير خلفي مو صارلج سبع سنوات ويا اسم الطفل ماكدرتي تسويله ..
اندار عليها بابا وكال الها تارة اسكتي عيب هالكلام واني ظليت اشر الها تسكت ..
الاء .. هي هاي تربية امج ؟
تقربت منها تارة تريد تخمشها ولزمتها اني وبابا وهي تصيح
تروحين فدوة لتراب قبرها ياحقيرة ..
بابا كال سارة اخذي اختج ودخلي جوة يلله ..
اخذتها اجرجر بيها ودخلتها للغرفة شمرت روحها على جربايتها وانهارت بالبجي ..
تارة .. الساعة ب ١٢ بالليل خلصت قراية باجر عندي امتحان دور ثاني كلية تربية عربي ..
دخلت للحمام وفرشت اسناني وطلعت للغرفة شفت سارة نايمة اخذت تليفوني اكلب بي شويه
شفت مسجات من وائل ابن خالتي ..
كاتبلي مسج ع الفايبر
شلونه الحلو ؟
رديت عليه بسرعة
توك اتذكرتني؟
بسرعة دك اتصال جاوبته ..
اولا اني مسافر لتركيا وانت تدرين كلش زين
ثانيا ادري بيها امتحاناتج قربت وماريد اشغلج ويايه اقري زين حتى تنجحين اريد مرتي شاطرة وناجحة ..
