بعد مرور سنة ....
طلعت من بيت ابن عمي علاء حتى ادور على شغل
طول هاي الفترة جنت امر بحالة نفسية وعصبية صعبة
كآبة شديدة بكاء على طول اليوم كنت احس راح اجن واخسر نفسي ....
بعد وفاة بابا ما ضل الي شي غير اختي واني جنت احس نفسي غايبة عن الحياة مجرد جثة تتنفس وبس
بعد وفاة بابا طلعنا من البيت لان اني تركت الدوام وراتب بابا التقاعدي كطعو عنا والاء راحت يم اخوها وامها واحنا بقينا وحدنا اني وتارة
اجه عمو من السويد يحضر العزاء مال بابا
ووصى علاء بينا ومن يومها علاء ظل يتردد علينا هو ومرته ومن طلعونا من البيت اخذنه لبيته لان ماظل مكان يؤوينا ..
كل هاي الاحداث صارت بسنة وحدة مريت بايام صعبة يطرأ عبالي انتحر واخلص من حياتي
مرات اكول بابا مات بسببي
لان انصدم بعمر وزواجه
بعدها ماصار زين ابد
الاطباء اكتشفو عنده كانسر بالبروستات
وهذا الاكتشاف كان متأخر للاسف
جنت الوم حالي هواي
ما اهتميت ببابا وماوديته اطباء محترفين
بس شسوي فلوسنا ع كدنا جانت
مات بابا وهو مايملك شبر على هذي الارض
الي تتسمى وطن
صرنا غربة بوطنا ...
قبل اشهر دورت على شغل ملكيت
وفوني غيرته واحمد بعد ماشفته ولا عمر
زوجة علاء ظلت تجيبلي طلاب للبيت ادرسهم انكليزي
واخذ منهم الخمسة والعشرة
رغم نفسيتي متدمرة دمار مصاير ببشر
احس متملخة ممزقة ماعرف شون اوصف الوجع والالم الي احس بي
قطعت طريقي واني امشي بشارع بي اطباء وادور بالعيادات لعل دكتور محتاج سكرتيرة يوضفني يمه
صح اني خريجة اداب انكليزية بس بالعراق كلشي يرهم مرات نشوف مهندس يشتغل بصيدلية ويعرف للدوى كلش عادي .
عجزت واني ادور بالمدارس عن وضيفة وعجزت واني املي استمارات التقديم الحكومي وماكو فايدة
واني دا امشي والجو حار واتصبب من العرك
شفته من بعيد اي هو الي طيح حظي وخذلني غدرني وتركني اشلاء روح في جسد
لازمها من ايدها والايد الثانية لازم الطفلة
اباوعله واباوعلها بطنها منفوخة حامل!!!!
هنا حسيت صاعقة وكعت عليه وفطرت قلبي
كرهته كره الموت تمنيته يموت هسه كدامي
ومراح يرفلي عين
لا لا تمنيت اني اقتله اضربه بقلبه واسيل دمه
عضيت شفتي قوي ظليت ادعي عليه بقلبي
عساك لا تتهنى ولاتفرح دمرتني واذيتني
اناني حقير سافل .
احتشدت كل حواسي لتمتص هذي اللحظة وتخزنها بذاكرتي وتزيدني كره ورغبة بالانتقام
بس شون انتقم واني لاحول ولاقوة
حاولت اتخبى عنه وفتت بفرع جانبي
وابتعدت ماريده يشوفني واني بهالحالة
يائسة وكئيبة ومتدمرة ..
ضيعتهم ومشيت ووصلت للشارع
اريد ارجع للبيت اختلي ويه نفسي ضجت كلش وانزعجت صورته مجاي تروح من بالي ابد
وهو لازمها بقووة اكيد عايش حياته وياهه بحيث صارت حامل منه واني ماتركلي غير الحطام
