سارة ... بالليل جنه نايمين واندكت باب الغرفة بقوة جفلنا اني وتارة وشمرنا الغطى وكمنا وحدة تباوع للثانية ونكول شكو شكو شصاير .. ركضنا فتحنا الباب وشفنه الاء واكفة وجهه مخطوف ..
كالت ولجن ابوجن جاي يتألم بطنه توجعه كلش وعنده احتباس ميكدر يبول بسبب تضخم البروستات ولازم نودي للمستشفى .. بسرعة ركضنا لغرفة بابا والاء فتحنه الباب وشفنا جاي يتمرغل من الالم سودة عليه بابا ركضت كرفصت يمه حتى ميكدر يحجي ..
كتلهن خلي نودي للمستشفى ...
رحنه للغرفة وجتي ورانه الاء .. لبسنه كوتات فوك التراكات ودنريد نطلع
الاء كالت وحدة منجن تبقى خما كلنا نروح
ابقي تارة احنه نودي يخلولة جيس ادرار ونرجع
تارة .. ايباااه واني شنو صخل فدوة وابقى وحدي هنا اخاف وثاني شي اريد اطمأن على بابا ..
الاء يابنية افهمي الحجي كنالج هسه نرجع بس نحطله جيس ادرار ..
سارة .. هسه مو وكتها خلينه نروح كلنه بابا خطية جاي يتألم وطلعنا كلنا نركض على صوت بابا ..
سندته اني والاء وتارة ورانه طلعنا للشارع وتارة قفلت الباب مشينه كوة للشارع العام وبابا تعبان حيل كعدنا ع الرصيف وظلينه نأشر للسيارة جانت الدنيا ليل كلش وضلمه ساعة وحدة مدري ١٢ ..
حتى من طلعت ماانتبهت للساعة .. بعد وقت وبرد وخوف وصوت جلاب تنبح قريب علينه وسيارات تمشي من يمنه يباوعون النه سكرانيين مدري شبيهم من يطلون ويشوفون ابويه ويانه يحركون ويرحون الى وكفت النه سيارة وصعدنا بيها كلنا كعدنا بابا بالصدر واحنه التلاثه ورة كعدنا وانطلق بينا للمشفى دخلونه للطوارئ الطبيب فحص بابا وكال ودو للردهه يخلوله جيس ادرار اخذنا وودينا للردهه شفناله سرير فارغ ونومنا عليه راحت تارة صاحت للممرض اجه شافه
كال شافه الدكتور شنو كال ؟
كناله يكول خليله جيس ادرار ..
كال ماعدنه روحي جيبي من الصيدلية البرة قبل لاتعزل ..
نزلنا اني وتارة ورحنا للصيدلية البرة اشترينا ورجعنا برجعتنا باوعت للحديقة شفت شاب جسمه مثل عمر ظليت اباوعله ونبضات قلبي توترت وزادت من وتيرتها
صفنت عليه ووكفت بمكاني ..
ظلت تارة تعت بيه من ايدي لج يلله شكو تباوعين عيب عليج تعالي .. انطيتها جيس الادرار خليته بيدها كتلها هاج رووحي ودي لبابا بسرعة ثواني وجاية وراج اني خووش ..
كالت امشي ولج مو امان عليج هنا تبقين وحدج امشيييي ..
خزرتها وماادري منين جتي العصبية كتلها روووحي كتلج جاية وراج ثواني ..
غمتني وراحت فاتت جوة تركض ..
تقربت منه بخطوات مترددة صرت يمه وهو يدخن وجسمه وراسه كله مضمد ومشدود ..
كتله شلونك عمر حمدلله على السلامه
كام من مكانه بسرعة
كال شسوين هنا بهالوقت ..
بجيت حسيته صدك خايف عليه ردة فعله مال واحد حريص ع الشخص المقابل ..
بجيت كدامه كتله بابا مريض وجبنا للمستشفى ..
كال صدك جذب ماعدكم رجال يجيبه ؟
لا ماعدنا احنا بس نسوان
وانت شسوين هنا وحدج ..
لا مو وحدي اختي وياي راحت ودت جيس الادرار لبابا واني جيت اسلم عليك .. انت هنا بهي المستشفى ؟
اي هنا استكمل علاجي ..
هاي موخوش مستشفى حتى جيس ادرار ماعدهم ..
انت جريح الله يرأف بحالك لعد .. زين شون هيج صار بيك ؟
جنت واكف بنص المعركة ادخن وافكر بيج اجاني صاروخ طشرني تطشر وكوة لموني ..
ضحكت اخذ ايدي وباسهه كال مشتاقلج بصوت اقرب للهمس .. خجلت حسيت الحرارة تطلع من خدودي ..
