عنوان الحلقة (هروب) ..
بين قلب يهوى وعقل يخشى وحيرة في الاجواء هناك قدر يترتب لنا ليخبرنا بأن لاشيء يأتي بالصدف ، هناك امور واقدار نجهلها تمضي بنا
نحو مستقبل مجهول لانعلم هل ستكون نهايته سعادة أم خيبة موجعة ..
صارت دموعي تتقافز من عيوني..
بقيت اكثر من ربع ساعة بالباحة الامامية..
هدأت شوية..
مسحت دموعي وفتت جوة
بركان النيران مشتعل جواتي ويحركني حرك ..
ظليت احوم على غرفة احمد
واريد اروح استفسر منه عن عمر اكثر بس ما امتلك الشجاعة الكافية وبصفتي منو؟ وغير الموقف الي صار من قبل ولحد هسه اني ممتأكدة منو الي راسلني وساومني ..
خلصت حصتين
بس بعدني احس مغيبة بعالم ثاني عالم كله قلق وحزن ، الم وتفكير ..
دخلت للادارة
كعدت وايدي على خدي
صفنت واحاول اسيطر على دموعي
وما اخليها تنزل ..
وارجع اباوع للحواليه واتساءل بداخل روحي
المن اسأل ؟ واني حتى رقمه ماعندي ..
ارفع راسي فجأة واشوف احمد يطالعني بنظرات وملامح غريبة..
ادنك وارجع لعالم القلق والتفكير ..
غير أبهة بنظراته العبثية ..
وحدة من المعلمات اسمها سروى كالت يلله كومي عدنا اجتماع هسه .. شبيج ماسمعتي الاستاذ احمد من يحجي ؟
هزيت راسي برفض
كالت شبيج مو على بعضج !
رفعت راسي احاجيها ومتجاهلة سؤالها
_اكولج الولد الي اسمه عمر ماتعرفين اخبار عنه ؟
_بلي يكولون متصوب ومحاصرين بالبيجي وميكدرون ينقلو لبغداد باقي بمستشفى ميداني ومحتاج عملية هذا الي سمعته ..
صفنت اشو كلامها يختلف عن كلام احمد تساءلت بداخلي ..
ليش انت تعرفيه ؟
لا بس اله فضل عليه هو توسطلي هنا وداومت ..
ها اي هو حباب ويساعد الله يشفي ويرجعه سالم ان شاءالله ..
امين ..
يلله تأخرنا ع الاجتماع هسه بلش امشي ..
طلعنا ورحنا لمكان الاجتماع بلش وخلص
واني كل شي مافهمت منه
بالي يم عمر واتخيل جروحه تنرسم كبال عيني واحس احمد يباوعلي ونظراته كفيله بمعرفة دواخله
حاسس بيه ضايجة على عمر ..
خلص الاجتماع وطلعنا وسروى تلغي يمي ..
كالت يعني هسه اني شسوي يكولون لا تتعبون الطلاب ولاتشدون وياهم زين اوك من يرسبون تجي الام تكول انت ماتقرين عدل وانت ماتشدين وياهم وتضبين حتى يقرون وهمه يبطون الكبد والمرارة سوا شون بلوة هاي احتارينه ..
سارة سارة سارة ... وين شاردة شبيج انت وياي لو لا ؟
ها اي اي وياج اكولج اني رايحة اخذ اجازة تعبانة اليوم اريد ارجع للبيت خلصت حصصي ..
ياا صدك عود ؟ بعدهه ساعة ١١ هسه المديرة متطلعج وخاصة اليوم احمد هنا ..
اكولج هذا احمد اشو صاير نشيط ويجي يومية شعنده ؟ قابل هو مدير مو اكو ادارة .
اي غير مدرستهم ويردون يحافظون عليها ويمشون امورهه ..
اي هم صحيح .. ييله رايحة للمديرة ..
طلعت من غرفة المعلمات ورحت لغرفة المديرة
دكيت الباب وفتت جانت المعاونة يمها
كتلها ست اريد اطلع للبيت هسه من رخصتج ..
كالت عفية ست سارة مبقى شي هيه ساعة وحدة ونطلع ..
_ ست تعبانة الله يخليج وخلصت حصصي ..
_ يمعودة احمد هنا ويسجل ملاحظات عليه هسه يكول تطلعهن قبل ليخلص الدوام شنو مسمعتي اليوم الحجي الي بالاجتماع عن الانضباط روحي هيه ساعة بسرعة تخلص ..
