بقيت واكفة بمكاني مدنكة واعصر بيديه ماكدر اخلي عيني بعينها ، بلحظة مر كدامي شريط ايامي وياها
جنه هواي نتعارك وجنت ما احترمها هيه مجانت قابلة ع تصرفاتي وواني نشأت ببيئة غير بيئتهه
حسيت بيديها تسحبني وترفع راسي وتباوع بوجهي
حجت بنبرة قلقة تارة شبيج خيرج وشصاير وياج ؟
بدون وعي ارتميت بحصنها وصرت ابجي واتمتم
سامحيني الاء اني مجاية بس لحتى تسامحيني
مو اله تحتويني وتخليني يمج عادي ارجع بيت علاء بس سامحيني جنت قاسية وياج ومادري شون القدر جبرني اجي الج .
حسيتها مصدومة ومتعرف شتحجي اخذتني وفوتتني جوة وهي حاضنتني من اكتافي وتكول لاخوها يفوت جنطتي ويا
دخلت وياها اخذتني لامها ومرة اخوها سلمت عليهم
وبعدها اخذتني لغرفة مابيها احد لان حست عليه انو اني تعبانة و محتاجة ارتاح شوية
دخلت للغرفة كعدت ع السرير بجهد وايديه على حلكي اكتم شهكاتي اباوعلها والندم ينهش بيه
الاء والله
اشش سكتي تارة انسي الماضي انت من ريحة المرحوم ما افرط بيج واحتويج اكيد هسه لاتحجين شي كوليلي متعشية لو اخليلج عشى
حرامات اني ممتعشية واهلي اكلو واضوج اكل وحدي
رفعت راسي ابتسمت والدموع بعيوني اكل وياج ع الواهس
يله مسحي دموعج والحمام بنهاية الممر هذا الي بصف الغرفة روحي غسلي حتى ناكل اني وياج
هزيت راسي وهيه طلعت من الغرفة واني رحت للحمام غسلت وجهي استحي اروح يم اهلها خاف كايلتلهم على سوالفي وياهه كبل من جنت ااذيها بالكلام بسرعة رجعت للغرفة
ورة شوية جتي بيدها الصينية مالة الاكل
كالت مادري بيج تجين جان سويتلج بيتزا تحبيها انتي ولو متحبيها من ايدي تحبين مالة السوك
ضحكت بوجهه بس مالي عين احط عيني بعينهه بسرعة دنكت .. ظلينا ناكل ونحجي
كالت اني اعترف جنت قاسية بالبداية وياكم جنت مقابلة ع تصرفاتكم واريد افرض شخصيتي عليكم واعترف جنت على خطأ المفروض احتويكم
احنا نشأنا ببيئتين مختلفة كلمن من بيئة شكل
بس تبقين انتي بنت المرحوم وابوج الله يرحمه ماقصر ويايه ابد ولا سمعني كلام مو زين اخليج بعيوني تارة ولا يهمج .. رفعت راسي ضحكت الها ...
يوم ثاني تفاجأنا بجية اخوها كال اكو نسوان بالباب يردوكم .. راحت الاء للباب وطببتهم ورجعت الي
كالت ولج ذولي جايين عليج خطابة ..
تفاجئت كلش ، كالت لبسي وتعالي
كتلها مو اني لابسة واريد اروح للشغل
باوعتلي من فوك ليجوا لابسة جينز وتيشيرت
كالت بدلي ولبسي فستان بدلة شي المهم غيري هذا البس..
هسه غير افتهم منو ذول وشيردون غير اعرفهم خو ما كبل اطلعلهم
وشخسرانه طلعيلهم
