وكف كبال الباب يباوعلي ، طخت الشمس بعيونه
برزت مثل حجري زمرد ملتهبتين
تملكني الاضطراب والقلق احتاريت افوت لو اطلع
صارت رجلي ع عتبة الباب والرجل الثانية برة وايدي ع اطار الباب والثانية لازمة بيها خالد
ابوه منتبه الي بس احمد صار يباوعلي وممهتم لاحد حواليه
تقرب كم خطوة باتجاهي واني رجعت رجلي للخلف وخرت ايدي من الباب وكفت مثل الصنم بدون حركة
ولزمت ايد خالد بيديه الاثنين
اجه احمد وصار مقابيلي عيونه مفتوحة على اوسعهم
حجب عن رؤية كل شي خلفه واني رافعة راسي اباوعله
كال بتعجب سارة ؟ شلونج
هزيت راسي وكتله زينة
من شوكت تداومين هنا ؟
من بداية هاي السنة
عدل سترته كال تمام لعد ان شاءالله نتشاوف هوايه
بس باوعتله ومجاوبته
هو راح وكلساع يلتفتلي علما طلع يله
حسيت على خالد يهز بيدي
باوعتله ها خالد ؟
كال دا اسالط منو هذا ؟ اول مرة اشوفه شنو معلم جديد ؟
كتله لا هذا جنت اداوم يمه بمدرستهم وهسه صارت هاي المدرسة الهم يله روح على صفك
بعثرت شعره وهو راح يركض .
تارة بعد مرور اشهر واني ابيت خالتي مرتاحة محد عدها هيه ارملة وبس ابنها عبدالله صغير ١٣ سنة عمرة
توة جايه من الشغل تمددت ع التخم وغفيت
حسيت على احد يغرس اصابعه بشعري
فزيت مرعوبة
باوعت هذا وائل
هو من شافني وخر بسرعة
كمت واني اعدل بملابسي وشعري اباوعله متغير شكله هواي يدنك ويباوع عليه عبالك خجلان
كتله شوكت جيت ؟
ظل يبجي وايديه على وجهه
رحت يمه شبيك
كال امي وين ؟
مادري طالعة
كال اريد انام
كام يمشي ويوكع رحت اركض اخذته من ايديه مشيته وديته للغرفة شمر روحه ع السرير وغطيته جان صافن
كتله تريد اسويلك شي تاكله ؟
كال لا تارة تعبان حييل شفت الموت بعيوني ماتو اصدقائي كدام عيوني شي غركو شي انكتلو ع ايد خفر السواحل ولو ما اني اعرف اسبح مجان عشت
اسبح وخايف تاكلني اسماك القرش الي شفته شي ميتصور ابد ومينحجي
ظل يحجي يحجي وغفى كمت طلعت وسديت عليه الباب ، خالة جانت مموجودة طالعة اخذت تليفوني واتصلت بيها وكتلها اجه وائل
كالت بصدمة ولج تتشاقين
كتله والله خالة اجه
سدته بسرعة .. ورة ربع ساعة مخروعة
صيحت يوجهي ولج تارة وينه وائل خو ماجذبين عليه ؟
اشرتلها على غرفته وراحت تركض تسحل بصايتها
وشالها وكع وماتدري بي
تبعتها اركض راحتله للسرير حضنته تبجي بجي مصاير هو نايم وحضنته وهو بس مصدوم وصافن
