طلعت من البيت وصوت تارة شعلوة ورايه تصيح بيه صوتها وصل للشارع ولا يهمها ابد شكد عرمة
شفت واحد يشتغل بالمدرسة
كال صباح الخير استاذ احمد دزني عليج
صباح النور ها اي شكر ،، وصعدت ورة وهو ساق السيارة خلال ٥ دقايق وصلنا للمدرسة لان قريبة
نزلت من السيارة رحت لغرفة المعلمات ماشفت احد جتي العاملة كالت كلهم بغرفة الاجتماعات والاستاذ احمد كال بس تجي دزيها لهنانه .
كتلها ان شاءالله ورحت للغرفة الاجتماعات
كلهم كاعدين كلمن بكرسيه ومتجمعين حول الطاولة
كلت صباح الخير بخجل
وصار كدامي احمد تبادلنا النظرات وهو دنك على الاوراق الي كدامه...
والكل رد صباح النور
بس خطيت اول خطوتين
كال يلله نبلش الاجتماع
رحت اخذت كرسي وكعدت جان ماكو مكان بس المكان الي قريب على احمد رحت خليت الكرسي وكعدت يمه وهو يترأس الاجتماع .
ست رواء تقربت مني وهمست باذني:- الاستاذ احمد مقبل نبدي الاجتماع اله تحضرين انت
باوعتلها بذهول ورجعت باوعت على احمد رفع راسه يباوع كدامه عبالك سمعها وبعدها هز راسه وظل يحجي عن المدرسة وعن الطلاب والحصص ...
طول فترة الاجتماع هو مباوع عليه ابد حتى من حجيت لسبب اجهله وتمنيت اعرفه ،،
خلص الاجتماع والكل كامو واني جاي اريد اكوم
سمعته كال ست سارة ابقي
جان مستغل الضجة الي احدثها قيام المعلمين وتكلم بنبرة يحاول من خلالها يتحكم بصوته وميخليهم يسمعون .
تفاجئت من طلبه رجعت كعدت بصمت
هو رتب الاوراق الي كدامه وكفهن وظل يضرب بيهن ع الميز ،، حسيته متوتر شوية .
سويت احم وهو ترك الاوراق وباوعلي
كال شلونج سارة
زينة الحمدلله
اني سمعت بخبر انفصالج عن عمر بصراحة انصدمت جنتو تحبون بعضكم شنو صار ؟
باوعتله هو ارتبك بنظراته ودنك كال يعني اذا تحبين تحجين احجي ميعجبج نغير الموضوع
لا عادي بس هو مو ابن عمك جان سألته
لا والله احنا علاقتنا متوترة حييل صار هواي
بسببي ؟
قطعا لا وانما هو سوا تصرف محلو وانتهك حرمة بيتنا المهم هذا مو موضوعنا
اني انذهلت لم سمعت كلامه بعد لحظات ما استغرب
ممكن عمر يسوي اي شي لان الي سواه بيه مو شويه .
دنكت واحجي
كال شسوا ؟ رفعت راسي اباوعله
حملني ذنب مو ذنبي يكول انت السبب بموتة اخويه
ناسي اكو قضاء وقدر واني ممسوية شي بس ردت بيت وحدي لان امه متريدني .
معقولة عمر هيج يسوي خاف مصدوم ويتصرف بدون وعي .
حسيت اختنكت وكلبي انعصر والغصة وكفت ببلعوميى دموعي بعيوني راح ابجي ما اكدر ابجي كدامه
اني اترخص وخرت الكرسي وكمت
