الناصرية / سوق الشيوخ/ قبل السقوط تموز 1999
دخلت مثل عادتها لغرفة بنت عمها وصديقة طفولتها وهيه تدفر الباب برجلها مثل الولد
والتفتت لجانب الغرفة المربعة الشكل وحيطانها من الطين والسكف المصنوع من جذوع النخل أو(البواري)
بالاضافه الى الفتحات الموجوده بالحيطان الي تسمح لأشعة الشمس تدخل منها وتنور الغرفه الي جان مابيها اي مصباح كهربائي أو بنكه سقفيه
راحت لفراش بنت عمها وهيه ترفع الكله عنها وتكعد بيها بقوه
-ووولج رحمه كومي كومي يلا رررحممه
-امممم
تضايقت رحمه وفتحت تك عين وهي تشوف كدامها بعيون مغوشه ملامح بنت عمها وترجع تغمض عيونها وتدفن وجهه بالمخده
-ووسم عابتلج كوومي ولج
-اووف اسيل ولي عني
-ولت روحج ياخايبه مو صوجج ولج الفاهيه فرقد موجود بره
فتحت رحمه عيونها اثنينهن على كبرهن حتى تبرز لون قرنيتها السوده أكثر
ومسحت شعرها الاسود الحريري عن وجهه وهيه ترطب شفايفها وتكول بأبتسامه بينت اسنانها من خلالها
-صدك فرقد عدنه
-هاا هسه كعدتي على حيلج من سمعتي بطاري فرقد
كامت اسيل بطولها الفارع وقوامها الممشوق الي تميزت بيه عن بنات عمها الي جانن كلهن قزمات وسمينات ورحمه منهن
كامت وهيه تعدل بعبايتها وحجابها الي جان طالع منه خصلات من شعرها وبارز منه ظفايرها السود الطويلات الي يتميزن بيهن بنات الجنوب وبالأخص بالارياف
-ولج اوكفي وين رايحه
طفرت رحمه من فراشها وهيه تلزم طرف عباية بنت عمها اسيل مانعتها تتحرك
-راح اولي مثل ماكلتي قبل شويه
ابتسمت رحمه وهيه تعرف بنت عمها الحساسه زياده عن الزوم زعلت من حجايتها
-ههههه عابتلج اتشاقه وياج فدوه كليلي فرقد موجود عدنه صدك يعني هسه هوه بره
-اي خايبه بره كاعد يم امج يسولف قبل شويه دخل ماصار هواي لحكي شوفي قبل لايطلعله اخوج عبيد ويروح
-ايي صح
انخبصت رحمه وماعرفت شتسوي
غمت كصتها بنت عمها اسيل على فهاوة بنت عمها
وجرتها من فراشها وهيه تدنك بالكاع وتنطيها حجابها
-الزمي لبسي حجابج وطلعي للهول على اساس ماتدرين واني راح اطلع من الباب الخارجي اروح للحشيش اساعد مروه واسراء
أنت تقرأ
نساء الضلام (وحوش السجن)(الرواية مكتملة)
De Todoرواية مكتملة✅ تدور أحداث الرواية في تسعينات القرن الماضي في عصر النظام البائد حيث غطرسة رجال الدولة والعشائر الجنوبية وتتوالى الأحداث في إطار درامي عند دخول أحد بنات القرية للسجن.... تنويه🚫 جميع الشخصيات من نسج الخيال ماعدا الأحداث فأنها جميعها حقي...
