نساء الضلام (وحوش السجن)(الرواية مكتملة)

البارت الثاني عشر

السلام عليكم

اعذروني عن التأخير

ولكم بس والله مااكدر ادخل واكتب بارت احس روحي طالعه وخرب واهسي بكلشي

انتو شجاي تشوفون شجاي يصير !؟
شجاي تشوفون أوضاع البلد شلون من سيء إلى اسوء

جاي تشوفون المجازر والشباب بعمر الورد يوميه ينقتلون بدون ذنب

حرام والله حرام حسبنا الله ونعم الوكيل على كل ظالم وقاتل وخاين للوطن

الك الله ياعراق 💔🇮🇶

#نساء_الضلام #البارت_الثاني_عشر
#الكاتبة_حوراء_علي

رحمة

ماصدكت الي سمعته وضحكت على الكالته امي

معقوله يعني!؟

اخوي وولد عمي وشيخ عشيرتنه راحو كلهم بشربة ماي

ههههه ماكو عاقل يصدك هالكلام مستحيل

-ولج انتي ليش اتضحكين عبالج اتشاقه وياج شبيج يمه صرتي مثل اسيل

ياس: عمه حقهن الصار صدمة وحتى انا لهسه مامصدك

رحمة: يمه انا مستحيل اصدك هالحجي

-يمه براحتج لاتصدكين هيه هاي الحقيقة وهوه هذا الصار

اسيل

مرت ايام طويلة وانا كاعده ابيت اهلي

اسد بعد مااجاني ولا عرفت خبر عنه بعدما اجاني ذاك اليوم

وانا اصلا ماريد اعرف اي خبر عنه

كرهته وكرهت العيشه وياي وفكرت اطلب الطلاق

بس خايفه من اهلي شلون راح اقنعهم

دخلت مروة وجانت ضعفانه ووجهه شاحب وحزين

صحتها واجت كعدت يمي

-مروه أريد اكلج بسالفه صار فتره افكر بيها بس خايفه من اهلي

-شنو اسيل خير خوفتيني

-مروه انا أريد اتطلك من اسد

-يمه صخام

ضربت مروه على صدرها بفزع

-ولج اسيل تخبلتي خيه انتي ماصار شهر من اتزوجتي طلاكيش هذا التفكرين بيه

كمت وكفت على حيلي وحجيت بحرگة

-انا بعد مااعيش وي واحد دمر حياتنه وسود عيشتنه

-بس هذا اختيارج ومحد جبرج عليه

-وانا ندمت وبعد مااكدر اكمل

-مو بكيفج خيه اسيل مو بكيفج

اسد ماراح يعوفج بسهوله افتهمي عاد