سالمه:اتصلت بنقولك بعدين بنجي انا واسراء بنتي واختي زهره واخت راجلي الله يرحمه هند باش بنحددو موعد الفضانيه والعرس ان شاء الله
امي:مرحبتين بيكم تنورونا وان شاء الله ربي قدم يلي فيه الخير
سالمه:ان شاء الله ياوخيتي هي سلامتك توا
امي:الله يسلمك
امي:يابتول تعالي نبيك بتوووول
انى كنت فالمطبح وحاطه السماعات كالعاده😅 ويجيني شبشب من حيت لا ادري😁
امي:قداش مره نقول معاش اديرهم بتطرشي في جرتهم😤
انى:ان شاء الله😒
امي:نسيتيني حتى شن بنقول
تعالي نظمي معاي هالدنيا بعدين بيجو اهل معتصم
انى:بتوتر كيف بلحقو😥
امي:والله بدل ماتتكلمي حركي ايديك معاي😒
اني:حاظر بس نبي نفهم علاش ديما قارنتهم يامريومه
امي:وربي كان متمشي من قدامي خصني كاسراتك ومخلياتك مجبسه قدامهم
اني:😂😂بشويه اعصابك ويلي تبيه يصير ومشيت بستها وطلعت جري لداري😅
امي:والله الا مختشه هههه مش عارفه كيف بتفتح حوش بروحها
علي خشت مصعب جي يشوفلها باستغراب🤨
مصعب:يام فيك شي
امي:كملت عاد😒 ومشت وخلاته😂
مصعب قعد واقف زي الاطرش فالزفه😂
عندي فالدار متوتره واتصلت بصاحبتي تسنيم وقلتلها تجي قلتلي مسافه الطريق وجايه بعد مشاورت امها طبعا
سكرت الخط وقعدت نكلم في روحي يارب الصبر كيف بندير في روحي مش موتيه شي
علي خشت مصعب😂
مصعب:لا حول ولا قوة الا بالله خيرها العيله كلها تهدرز مع روحها شن فيه
انى:بلاهي عليك فوتني
مصعب:شن فيه غر قولي
انى:اهل معتصم جاين الليله ومش عارفه شن نلبس
مصعب:توا دولاب معبي قريب ينزح لداري ومش لاقيه شن تلبسي😒
انى:ماهو محتاره كلهم حلوات 😅
مصعب:نقولك نصيحه متلبسيش جو قفاطين😒الان هما جاين يحددو في موعد العرس مش بيشوفوك فلدالك حتى كان قعدتي هكي عادي
علي اساس عمتي سالمه مش شايفاتك لما تنوضي الصبح شعرك تقول خاطفه الضي😂😂
انا:بلاهي اقلب وجهك حتى انا فاضيه نسمع فيك😤
مصعب:😂😂غر بشويه اعصابك والله حق يلي نقول فيه يعني البسي بسيط مش لازم من الاوفر😎
انى:هكي رايك🤔
مصعب:اي بجديات
انى:والله الا منور هي تعرف مرات نحس فيك اختي مش خويا
مصعب:صدق يلي قال العرب ماديرش فيهم الخير😒😒
انا:به شكرا يااحلي اخ فالدنيا ربي يحفظك ليا وجيت حضنته
مصعب:والله وكبرتي وبتولي عروس ياكبدي ويلي بياخدك معتصم ولد سالمه😂
انى:ههههه خزوووه وخيره معتصم من شنو يشكي
مصعب:بدينا نغارو😂 غر ردي بالك تجيني وتقوليلي حتى راجلي والله نقلبك بعدين😂
انى😂😂😂خزوو
مصعب:هي انا طالع وخليك مع اهرمات الجيزه قصدي الدبش متعك😁
انا:شن كنت بتقولي اكيده الزياره هادي مش بلاش 😂🤔
مصعب:خلاها غدوي ونبدو مروقين😊
انى:تمام😊
امي كملت الحوسه بروحها😅وانا قعدت حاصله في روحي ونستنى في تسنيم
امي:مازن مصعب
مازن:مصعب طلع وحتى انا زيه
امي:سلم ولدي نبعتك لمحل الحلويات كلمناه بكري قال واتيات حدك جيبهم
مازن:وهو معصب حاظر تبو شي تاني
امي:رد بالك وانت تسوق
مازن:حاظر
وهو طالع يتلاقي مع تسنيم شاده بوكس وكيسه كبيره وتتعارك مع روحها خلوقها ضايقات بسلامتها😅
تسنيم:نهاري الاحرف وخلاص عرفته مقربع من امتى اتصبحت في جارتنا مسعوده😤
طبعا خوها حطها في راس الشارع الان كان مستعجل وعارف اخته عاد ماينخافش عليها😂 وحالتها كانت متبهدله الوشاح قريب بيطير والعبايه نصها مفتوحه من لوطه والبوكس والكيسه وشنطتها في يداها من راس الشارع لين وصلت لحوش بتول وهي تسب وتكفر😅
مازن شاف منظرها قعد يضحك وهي فالبدايه مكانتش منتبه معاه بس لما سمعاته يضحك انتبهت وقعدت مسبوها فيه وتفكر بصوت عالي ياربي شن هالطرف هدا معقوله بتول عندها خوت هكي🤔والله لما نقتلها مخليتني عانز لتوا مقالتش نودك حتى بواحد
مازن:كان معصب بس بعد سمع كلامها خلاص قريب اغمى عليه من الضحك
انا كنت مقعمزه فالدار ونساوي في رويحتي عاد😍 لين سمعت صوت ضحك لوطه وصوت بنت شفت من الروشن لقيت تسنيم واقفه تتكلم وواضح عليها متبهدله ومازن ميت من الضحك
انا:حي عليا شن دارت الفرخه هادي من عمله
نزلت نجري ووصلت فالباب لقيت مازن دموعه ينزلو من الضحك وتسنيم قريب بتموت من الحشمه الان فاقت علي روحها وعرفت انها كانت تتكلم بقوه
انا سرحت للحظه في مازن كيف كان يضحك من قلبه ليا هلبا علاها الضحكه هادي😍
بعدين حبيت ننقد الموقف..
انى:اهلين توتو تفضلي تفضلي
تسنيم:زيد فضلك ياحنه تعالي شدي من يدي ساد نكرلك فيهم من راس الشارع😤
انى:علاش متعبه روحك ياوخيتي نجك ليا
تسنيم:مافي شي من واجبك ياحنه وحسابك عندي
انا:😅😅تفضلي قعمزي فالصاله شوي وجايتك تو نتفاهمو
تسنيم: تمام
طبعا مازن قعد منسجم معانا لين كلمته
انا:مازن
مازن كان سارح في تسنيم وعلي حركاتها
مازن:اه نعم
اني:مدورهاش هادي صاحبتي ديما هكي جوها وتتعصب بسرعه
مازن:زي وحده نعرفها😏
انى:منو😳
مازن:بنت الجيران😒 اكيدا انتي
اني:😅انا اخف شويه مش زيها والدليل انها خلاتك تضحك من قلبك😉
وطلعت نجري قبل مانسمع منه اي شي
ومازن قعد سارح في كلامي وبعدين تفكر شن موصياته امي ومشي بالسياره
عند معتصم.....
.
.
يتبع...😘
أنت تقرأ
قسوة النصيب🔇
General Fictionتحكي القصه عن بنت ليبيه عاديه من طبقه متوسطه قلبها طيب بس الدنيا والنصيب ماكانوش جنبها ابدا فالبدايه وبعدين الامور حاتتصلح........مع الحلقات حاتفهمو اكتر ان شاء الله طبعا هادي اول روايه ليا وان شاء الله تعجبكم
