Sinta C Koliput

Part 5

~ Sinta C Koliput ~
By : Tescy Descy
Cerita Rekaan

~ Part 5 ~

Tidak lama c koliput nampak c ugou sana pula buat palamin, atukkkkk... jangan kama main-main mata c koliput, lop-lop lagi keluar, nasib tidak juga jatuh tu bihis (air liur) bah.

Makin lawa bah c ugou c koliput nampak, seksi lagi pakaian c ugou tu, sudah lah c ugou ni putih, putungan badan pun mimang buli bikin ba'darah hidung lah kalau c koliput tingu lama-lama.

Apa lagi kalau c ugou sonyum, atuiii.. bikin pingsan c koliput kama, ada lesung pipit bah pipi c ugou dua-dua mana gia c koliput tidak jatuh sinta.

*******************************
*** Mama C Koliput → Mama C Ugou ***

"ama ugou." (mama c koliput panggil mama c ugou yang duduk di sa'balah dia saja)

"apa tu ama oliput." (bilang gia mama c ugou jawab mama c koliput)

"macam mana sudah di c ugou? Okey sudah di dia lapas sudah c bulat kasi tinggal dia?."

"emmm.. macam okey-okey sudah dia tu sia tingu-tingu."

"dia tidak di mau cari tanak wagu lain?."

"ada juga bah kami suruh. Tidak tau lah tu anak tu. Yang dia balik baru-baru, bapa dia nampak kakah c ugou pigi rumah c bulat."

"aikkk.. apa dia buat sana?."

"tidak tau dia tu. Kami tanya tidak mau jawab."

"jangan-jangan dia masi lagi kali bulum kasi lupa c bulat."

"aduiii.. itu lah bah tu kami laki bini susah hati tu ama oliput."

"kau tidak gia kasi cari-cari c ugou juduh?." (mula sudah pancingan mama c koliput kama)

"mau juga dah, tapi siapa di sia mau kasi juduh c ugou tu."

"kau rasa-rasa tiada yang kau ba'kanaan kah sama tanak wagu cni kampung untuk c ugou."

"ada dah tu. Tapi dia mau kah c ugou?."

"siapa kakah?."

Mama c ugou tingu kiri kanan dia sama di balakang dia. Baru mama c ugou pigi kasi dakat mulut dia sama teling mama c koliput.

"sia suka dah c koliput tu. Mau dah sia kasi juduh durang kalau lah kau suka c ugou hehehehe.."

Bahhhhhh... punya main panjang kama sonyuman mama c koliput, apa lagi mama c koliput, sampai dia ampai sudah tu pisau yang dia bikin putung bawang.

Ba'pakat lah kunun mama c koliput ni sama mama c ugou mau kasi juduh durang c ugou. Katawa-katawa durang dua mau rancang macam mana mau kasi bo'juduh c ugou sama c koliput kama.

******************************
*** Koliput ***

"harap-harap lah ni kali ada harapan. Kalau c ugou tidak tulak-tulak sudah, kompom sia kahwin dia ni bisuk." (atuiii.. cakap dalam hati kama c koliput)

Sonyum-sonyum kakah c koliput sambil silik-silik c ugou dari jauh kama. Kosan bah ni anak jkkk, hensom butul sudah pun masi lagi gia kana tulak sinta dia. Macam sinang butul lah bah hati c koliput mau putung-putung tu daging ayam bila nampak c ugou.

"apa juga kau sonyum-sonyum tu oliput?." (kawan baik c koliput pigi gia kasau c koliput baru mau angau-angau pikir pasal sinta dia sama c ugou)

"emmm.. tiada bah apa-apa ni."

"kau kana bairus darah ayam sudah kah sampai mau putung ayam pun pandai sonyum-sonyum?."

"sibuk lah ni urang ni mau kacau." (c koliput cakap kakah dalam hati)

"aikkk.. bila kau pulang oliput?."

Tiba-tiba c buntal pigi kambai c koliput, tidak tau dari mana juga c buntal muncul. Punya lah main bau butul badan c buntal. Koliput kasi kambang kampis kambang kampis lagi hidung dia sambil tingu c buntal.

"kau dari mana juga ni untal?." (mau pigsan sudah c koliput te'hidu badan c buntal)

"dari rumah lah bah."

"kau datang cni tidak pigi mandi dulu kah?."

"ahhh... buat apa mau mandi? Sama juga kana kutur balik."

"kau tau kah kau macam bau urang mati?." (ta'karas saja c buntal tingu muka c koliput)

"kau sambarang saja bah mau cakap." (atuiii.. kici bah hati c buntal kana cakap macam tu)

"cuba bah kau hidu-hidu tu pokilok (ketiak) kau kalau tidak mati tu karabau te'hidu." (c buntal pigi kunun hidu pokilok dia)

"amaaaa... ini bukan karabau saja buli mati ni. Sia pun kapatai (mati)." (barabis lagi c koliput sama tanak wagu yang sama-sama c koliput putung daging katawa tingu c buntal)

"bagus kau pulang dulu pigi mandi baru kau dakat sia. Sia putung kau kalau tidak pigi mandi mau pigi dakat-dakat." (c buntal tingu c koliput sambil pigang dada dia kunun)

"huiii.. bahaya juga ni pulis ni, kau mau putung sia, kau tidak takut jadi banduan."

"silap-silap hari bulan, bukan sia saja yang mati cni, semua pun mati kali kalau ta'dakat kau. Barapa tahun juga kau tidak mandi ni?."

"ishhh.. ya lah. Baru 3 hari urang tidak mandi mau bising-bising sudah bah. Sama saja macam mulut kau macam mama kau ni." (c koliput undur mau 4 kaki dari c buntal. Yang tanak wagu lain pun terus pigi jauh-jauh dari c buntal)

"atukkkk... kanapa juga kau ni untal?? rumah kau lah paling dakat tu sungai pun kau tidak pandai pigi mandi?."

"ishhh.. urang panat bah. Urang baru saja pun pulang dari kabun bah. Sia tidur sana kabun, kau tau lah di kabun mana ada air surang."

"odoiii.. bagus kau pigi mandi dulu baru kau datang cni. Karang hidup balik ni ayam." (mati-mati lagi c buntal katawa dingar c koliput cakap macam tu)

"aa.. oliput, kau tau sudah kah c ugou singol sudah." (aikkk.. bukan nogi c buntal mau pulang pigi mandi kama, buli-buli pula c buntal mau buka cerita pasal c ugou)

"emmm.. tau bah."

"jadi, kau tidak di mau pigi suba-suba nasib mau kuntik c ugou ni kali? Pulis sudah bah kau tu." (aikkk.. macam mau jadi tukang kasi juduh pula c buntal ni)

"baru mau rancang-rancang lah bah kunun ni."

"bah, sia tulung kau lah. Kau mau?." (c koliput kasi be'kerut kunun dahi dia tingu c buntal)

"aikk.. macam makin sampin kau ni mau kasi juduh-juduh urang sikarang?."

"tidak lah bah. Sia mau tulung kawan saja bah ni."

"bah.. bah.. apa kunun cara kau?."

Nahhhh.... pancingan c buntal saja tu mau buka cerita pasal c ugou supaya dia tidak kana suruh pulang pigi mandi kama. Karana c ugou, tidak lah c koliput mau suruh c buntal pulang, main kasi tabal-tabal saja tu taik hidung tahan bau c buntal yang mau 3 hari tidak mandi.

~ Bersambung ~