Sinta C Koliput

Part 14

~ Sinta C Koliput ~

By : Tescy Descy

Cerita Rekaan

    ~ Part 14 ~

*** 2 Minggu Kemudian ***

    “tahniah oliput..” (c buntal pigi kunun salam-salam c koliput sambil pigi paluk-paluk c koliput)

    “makasi untal.” (senyum malu-malu kusing kunun c koliput)

    “apa baca-baca kau pakai ni sampai c ugou terima juga kau last-last oliput?.” (c buntal tanya c koliput)

    “mana ada sia main baca-baca ohh.. sambayang lah bah barabis bah.”

    “akhirnya kau dapat juga c ugou ohh kan.”

    Senyum-senyum saja c koliput. Ni hari c koliput tunang sudah sama c ugou, sah sudah c koliput sama c ugou pasangan yang sudah bo'tunang, mimang urang kampung ta'kajut bogia dingar borita c koliput sama c ugou tunang.

    Tiada angin tiada ribut gia, tiba-tiba bo'tunang durang dua maka tiada pun gusip-gusip durang c koliput bo'sinta, yang urang kampung tau pun, c ugou banci butul c koliput tanpa sabab saja.

    Koliput pigi tingu c ugou sana dapan dakat kek, c ugou kana tarik-tarik sama kazen-kazen c ugou mau bawa c ugou ba'gambar. Koliput senyum-senyum saja tingu dari jauh c ugou, masi lagi c koliput tidak pacaya c ugou sudah jadi tunang dia gia.

    “masam sia tidak pacaya saja c ugou jadi tunang sia juga bah.” (c koliput cakap dalam hati saja)

    “bahh.. tius ni.” (tiba-tiba angkol c koliput pigi kambai c koliput mau pigi kasi minum c koliput tapai)

    “aikk.. banyak juga.” (ta'kajut c koliput kana suruh kasi habis tu tapai dalam galas panjang)

    “kau tius saja ni. Jangan kau banyak sakap.”

    C koliput tius (1 go) juga tu minuman. Apa lagi c koliput ni hari, kana kasi mabuk saja bah. C koliput tidak rasa juga yang dia mabuk pasal sinang hati gia, urang gumbira mana lagi gia rasa tu mabuk, mabuk sinta ada lah.

    Masam lagi bah c koliput tu pangantin, kala-kala masam urang kahwin juga kama durang c koliput ni tunang, ramai lagi urang datang tu biar pun dalam kampung durang saja semua yang datang pigi tingu durang tunang.

    Sampai mau galap bah tu dunia c koliput kana kasi mabuk, tidak sudah c koliput buli jalan, tapi kana tarik juga. C ugou tidak pigi tingu-tingu bogia c koliput. Biar pun c koliput mabuk, masi juga c koliput buli pikir pasal c ugou, buli risau pasal c ugou.

    Tinggal lagi tunggu c koliput mangampai pasal ta'lampau mabuk, mama sama bapa c koliput tarik sudah c koliput mau bawa pulang. Takan lah bah c koliput mau tidur tampat durang c ugou maka bulum pun kahwin.

    “amaa.. anak mama dapat juga sumandak yang dari kisi kana kajar-kajar kan?.” (buli lagi c koliput cakap sama mama dia sambil pigi paluk mama dia bah)

    “odoii.. tii tanak. Bagus kau jalan bagus-bagus oliput, mama kasi guling kau pigi sana kandang kambing durang c boyon ni.” (mama c koliput marah c koliput pasal ta'lampau guyang bah c koliput mau jalan)

    “aissss.. jangan macam tu bah ma. Urang baru saja jadi tunang urang, bulum lagi kahwin sudah mama mau kasi guling anak mama yang hensom ni.” (masi lagi c koliput buli puji diri sendiri kama)

    “atukkkk.. ni lah ni anak c jkkk ni. Kalau sudah mabuk 1 biji butul tu gaya sama bapa dia.” (mama c koliput kasi salah lagi bapa c koliput. Bapa c koliput pura-pura buat tidak dingar saja)