Sinta C Koliput

Part 28

~ Sinta C Koliput ~
By : Tescy Descy
Cerita Rekaan

    ~ Part 28 ~

    Butul-butul macam hilang bah mabuk c koliput lapas dia mandi. Tapi tu saja lah, c koliput rasa sakit kapala sama lapar. C ann bawa c koliput masuk bilik dulu, koliput masuk saja bilik c ann, buli-buli c koliput mau cubuk-cubuk lagi bilik c ann. Takut c koliput kalau ada mama bapa c ann dalam bilik c ann bah, heran c ann tingu gaya c koliput.

    “apa bie tingu?.” (koliput garu kapala dia sambil senyum-senyum)

    “tiada lah. Butul ni mama sayang suruh bie tidur cni?.” (koliput mau ka’pastian lagi)

    “ya bah. Tu beg bie. Pigi lah pakai baju.” (sambil c ann tunjuk beg baju c koliput)

    “aikk.. Napa beg bie ada cni?.”

    “sayang ambil tadi.” (koliput anguk-anguk kapala sambil senyum)

    “ohhh..” (pindik saja c koliput jawab)

    “bie mau makan? Mau minum kah?.”

    “mau.”

    “bah, bie stay cni dulu lah k.”

    “sayang mau pigi mana?.”

    “pigi ambil makanan bie lah bah.”

    “biar lah bie ikut turun bah.”

    “tidak paya.” (be’kerut dahi c koliput)

    “napa?.”

    “nanti abang joe nampak bie, dia kasi minum lagi. Biar lah sayang ambil makanan bawa naik cni.”

    “tidak kasi susah sayang kah?.”

    “tidak, lagi sayang susah hati kalau bie ikut turun.”

    “emmm… bah. Makasi tunang kita.” (senyum-senyum c koliput cakap macam tu sama c ann. C ann kasi miring saja mulut dia tingu c koliput)

    “pakai lah tu baju. Jangan bie keluar. Kalau bie keluar juga, sayang kasi guling bie di lantai karang.” (koliput pigang kakah dada dia)

    “huiii.. Ganas pula tunang kita ni.”

    “mau cuba?.”

    “eeee.. Tidak lah, nanti bingkuk pinggang kita.”

    C ann tahan-tahan saja tidak mau katawa sama senyum tingu c koliput. Koliput senyum-senyum saja tingu c ann. C ann jalan keluar dari bilik, c koliput pigi pakai baju dia. Siap c koliput pakai baju, c koliput pigi tidur di Katil c ann sambil senyum-senyum mau scan bilik c ann.

    C ann sampai di dapur, c joe ada di dapur masak migi kari. Pura-pura kakah c ann tidak layan c joe. C joe tingu c ann sambil senyum-senyum. C ann limpas-limpas saja c joe mau ambil piring, ambil galas, ambil nasi sama lauk.

    “aikk.. Kau mau bawa pigi mana tu?.” (heran c joe bila c ann taru tu piring sama galas di dalam talam)

    “atas lah.”

    “aikk.. C ed sudah bangun kah?.”

    “bulum. Napa?.” (sangaja c ann tipu c joe. Kalau c joe tau c koliput bangun, kompom naik c joe pigi bilik c ann kama)

    “habis tu napa kunun kau makan di bilik?.”

    “duiiii.. Ni urang ni ahhh.. Sibuk lah bah.” (c ann cakap dalam hati saja)

    “suka hati sia lah bah. Issshhhh.. sibuk lah bah abang ni.” (c ann jenling c joe)

    “emmm.. Mantang-mantang lah tunang dia tu kawan abang, terus luki lah dia mau share-share.” (laju bah kapala c ann tingu c joe)