Sinta C Koliput

Part 12

~ Sinta C Koliput ~

By : Tescy Descy

Cerita Rekaan

    ~ Part 12 ~

*** 1 Bulan Kemudian ***

    Sajak 1 bulan yang lalu, c koliput tidak mau sudah pikir pasal adik c joe lapas c koliput tau adik c joe ada tanak wagu sudah. C fifi pun c koliput tidak mau ba'harap, pasal lawa juga gia c fifi, mustahil lah bah tiada tanak wagu.

    C koliput malas sudah di mau pikir pasal mandak-mandak ni, c koliput rasa macam malang saja nasib dia kalau mau cari sumandak, pasal semua pun urang punya gia. C koliput ikut kawan-kawan dia saja mau tingu-tingu sumandak, bikin susi-susi mata saja bah kunun bilang c koliput bah.

    Ni hari c koliput pulang kampung pasal kakak c koliput mau kana tunang sudah lusa. Kalau bukan pasal kakak c koliput mau tunang, mana c koliput mau pulang kampung, malas bah c koliput mau balik kampung, macam sakit butul hati c koliput kalau dia te'ingat c ugou.

    Bulum lagi gia c koliput dapat mau move on pasal c ugou biar pun c koliput tau apa c ugou buat di balakang yang bikin kasi noruta (hancur) lagi hati dia. Bah, sinta dari kisi gia tu, masam mana juga gia c koliput mau kasi lupa sinta dia kan, first lop urang putih bilang bah.

    Koliput sampai rumah beliau dia, koliput tingu rumah durang sunyi saja. Koliput panggil-panggil mama dia pun tiada kana jawab, koliput tingu tu pintu rumah kana kunci dari luar, tidak lah c koliput dapat masuk dalam rumah, jadi c koliput pigi duduk sana dapan rumah saja sambil tingu kawasan sawah padi durang yang baru mama bapa dia tanam padi.

    “aikk.. sana bah pula durang c mama tu.” (koliput cakap-cakap lapas dia nampak mama sama bapa dia tanam padi di sawah)

    “cni saja lah sia.” (koliput pigi baring di lantai tu sulap sambil tingu siling tu sulap)

    “aduiii.. napa lah muka kau lagi ni ugou. Ini lah bah yang bikin malas sia mau pulang cni ni kalau kau balik-balik datang.” (limpas-limpas gia bayangan c ugou dalam pikiran c koliput)

    “tuhan, sia tau c ugou bukan juduh sia. Tulung lah kasi hilang dia dalam pikiran sia tuhan. Sakit butul hati sia ni tuhan kalau ingat balik apa c ugou buat sama c bulat.” (jatuh bogia air mata jantan c koliput bila dia ingat lagi ka'jadian yang dia pigi cubuk durang c ugou sana kabun dulu)

    “tapi, sia akui lah tuhan, sia masi sayang bah c ugou tu biar pun dia sudah kasi noruta ginawo sia. Tapi sampai bila lah sia ni mau macam ni saja? C ugou bukan juga mau sia pun kalau sia sayang dia sampai napatai (mati).” (meluah sudah c koliput sama tuhan pasal hati dia)

    Koliput taru tangan kiri dia atas dahi, tangan kanan dia kasi jadi bantal sama kapala dia, c koliput tutup mata mau tidur dulu sikijap sambil c koliput mau rasa angin yang datang dari ara sawah padi.

*****************

*** Ke-esokan Hari Nya ***

    Tok.. Tokk..

    “oii.. anak wagu ku. Kau sudah bangun kah tu?.” (mama c koliput katuk-katuk pintu bilik c koliput sambil panggil c koliput dari luar bilik saja)

    “aikkk.. tidur mati kah ni anak ni, jam sombilan sudah ni tapi bulum bangun.” (mama c koliput cakap dapan tu pintu)

    Tokk.. Tokk..

    “oliput.. napatai sudah kau sana dalam tu?.” (bahaya butul mulut mama c koliput ni)

    “oliput..”

    Mama c koliput panggil lagi c koliput sambil kasi pusing tu tombol pintu bilik c koliput, tidak kana kunci juga pintu bilik c koliput. Mama c koliput tingu dalam bilik c koliput, tarang sudah tu bilik, sudah kana buka tu langsir, mama c koliput tingu katil c koliput.