Sinta C Koliput

Part 29

~ Sinta C Koliput ~

By : Tescy Descy

Cerita Rekaan

    ~ Part 29 ~

    Dalam jam 8 lebih baru durang c ann turun pigi sarapan lapas saja c koliput siap urus diri. Masi kogutan lagi bah c koliput, tapi c ann bawa juga c koliput turun pigi isi perut. Durang c ann sampai saja di ruang bawa, sunyi butul rumah durang c ann, mama bapa c ann pigi sambayang sama adik c ann. C joe sama abang tua c ann masi tidur lagi.

    Durang c koliput masuk dalam dapur, ada sudah sarapan mama c ann masak. C koliput pigi duduk di mija makan, c ann pigi buat minuman panas. Koliput tingu saja c ann sambil tongkat pipi sambil senyum-senyum.

    Happy bah c koliput, macam c koliput masi tidak pacaya yang dia sudah tunang c ann, tu lah c koliput macam urang angau sambil senyum-senyum.

   

    Siap c ann buat minuman panas, c ann sanduk lagi mee guring sama nasi guring untuk c koliput, senyum-senyum kama c koliput tingu c ann. C ann kasi be’kerut dahi dia tingu c koliput.

    “napa bie ni?.”

    “tiada.”

Malu sudah c koliput mau kasi tau c ann, pasal balik-balik gia c koliput cakap sama c ann dari di bilik lagi yang dia gumbira.

    “jadi napa bie senyum-senyum?.”

    “tidak buli kah bie senyum-senyum?.”

    “bukan tidak buli, tapi kalau bie bilang tiada, sayang mau tau juga napa bie senyum-senyum.”

    “tiada lah.”

    “emmm.. Ya lah tu. Bah makan.” (c ann ampai piring c koliput di dapan c koliput)

    “makasi tunang kita.” (sambil senyum-senyum c koliput tingu c ann. C ann kasi be’kerut dahi dia)

    “napa bah bie suka cakap kita ni?.”

    “sitail bie bah tu. Napa? Tidak buli kah?.”

    “tiada lah. Saja sayang mau tau.”

    “tidak paya mau heran kio. Andang-andang lah bie punya tabiat ni.”

    C ann diam-diam saja sambil sambung balik mau sanduk nasi guring dalam piring dia sendiri. Durang makan sambil diam-diam sambil juga c koliput balik-balik silik-silik c ann, c ann kasi be’kerut saja dahi dia tingu c koliput.

    Siap saja durang c koliput makan, c ann bawa c koliput pigi tingu tv, tapi c koliput mau sambung tidur. C koliput pigi tidur di sofa sambil kasi jadi bantal paha c ann, c ann sambung lagi picit-picit kapala c koliput sambil tingu tv sambil durang bo’corita.

*** Joe ***

    Jam 11 pagi sudah baru c joe bangun kama. C joe keluar-keluar saja dari bilik, duluan c joe naik pigi bilik c ann mau cari c koliput, sudah c ann bawa c koliput pigi sana dapan rumah. Koliput sama c ann pigi duduk-duduk sana dapan rumah sambil durang bo’corita sana dalam ayunan besi yang macam kurungan burung.

    C joe sampai bilik c ann, tiada durang c koliput dalam bilik c joe nampak, joe pigi cari lagi di ruang bawa, sampai sana dapur bah c joe pigi cari c koliput. Risau butul c joe kalau c koliput sudah balik sandakan.

    “aikk.. Mana sudah c ed?.” (c joe cakap-cakap sambil pusing-pusing mau cari c koliput)

    “takan c ed duluan balik sandakan.” (c joe tulak pinggang sambil tingu sana luar dapur dari jendila dapan singki)